¹ Senged se kuy kem libun deng myehen. Hol gel nimón ye tuha logi ye, anì yó ke wen bélê le là hemtahu du yóm Udél Dwata, angat gwit ye lu tódô hemtahu lemwót bè yóm kton le yóm hyu kmò ye, baluen ke là bud wen udél ye ebélê le. ² Abay se ton le yóm klaen dù belenen yóm kuy kmò ne yóm tey kadat ye kul. ³ Bè yóm gel kehtilob ye, béen olo són bè yó kem gel hegfan ye ta, lómón yóm gel kmò ye yóm wek ye, ne yó kem ngom gel leket ye, ne yó kem nes gel lesek ye. ⁴ Okóm yóm ktilob ye, yake bè nawa ye hol gónón lemwót, abay se yóm ktilob nawa yó, là kóen lana bélê ye. Ne tey hyu kton Dwata du yóm libun ke hol ganag ne menek nawahen. ⁵ Hol lómón yó se tehe kul gel kehtilob yó kem libun hemtahu bè Dwata ekni, kem libun alì mogot nawa le bè Dwata. Nimón le kem tuha logi le. ⁶ Lómón yó se tehe nmò tuha libun Abraham ekni, boluyen Sara. Sal gel nimónen yóm tuha logihen, botong tabahen du dou gónó mogot. Ne yu kem libun hemtahu bè Dwata ni kmoen ni, yu se henged kun sfu Sara ke hyu yóm gel nmò ye, ne ke laen kô dù knikò ye bè tuha logi ye. ⁷ nged se kuy kem logi deng myehen, hol gel hendem ye yóm kuy tuha libun, abay se là gsenged le du yóm kuy kgis. Hol gel nadat ye lu, abay se senged kguta le du se kul yóm klowil laen dù sónen lómón se yóm kuy. Hol nmò ye nim ni, anì laen dù gónón gseng yóm kni ye bè Dwata. ⁸ Duhen ni, hol sensotu ye nawa ye ne hol ye skodu, ne hol ye sbong nawa ne hen‑ganag ye nawa ye. Hol heglaan ye knô ye bè kem dumu ye. ⁹ Bê ye abay bnalà sidek yó kem tau mò sidek bélê ye. Ke wen tau semdekà kuy, bê ye bud semdekà se kuy. Yó dé balà ye du, duhen yóm hyu bélê le. Abay se bè yóm tehe ktaba Dwata kuy, yó fasaden kuy yóm hyu bélê ye. ¹⁰ Hol lómón yóm monen bè Sulat Dwata, yóm monen, “Yóm tau ke nóyóen yóm kehyu klowilen ne yóm kwen kligalen, yake nafasen ksumóngen, ne béen abay tmulón kéng. ¹¹ Yake hol knogolen yóm sidek, ne tles nmoen yóm hyu. Ne hotuhen gelen mò du bè kem dumuhen tau yóm gónón menek nawa le. ¹² Abay se yóm Dwata, là kô kó matahen du yó kem tau tedeng kmò le, ne sal gel henklinguhen yóm gel kni le béléen. Okóm yó kem tau gel mò sidek, hohonen lu.” ¹³ Ke hol nô bè nawa ye mò du yóm hyu, laen kô tau hemsidek kuy. ¹⁴ Okóm baluen se ke wen hemsidek kuy lemwót bè yóm hyu gel nmò ye, wen kligal ye du myó. Bê ye hlikò, ne bê ye htafa nawa ye. Okóm hewót ye bè nawa ye dé mimón ke Krays, ne hol nadat ye, yakà du se yóm gónó ye mogot. Eles tendo hendem ye yóm kmò kbalà ye du ke wen tau smólók du yóm hendón nefet nawa ye. ¹⁵ Okóm hewót ye bè nawa ye dé mimón ke Krays, ne hol nadat ye, yakà du se yóm gónó ye mogot. Eles tendo hendem ye yóm kmò kbalà ye du ke wen tau smólók du yóm hendón nefet nawa ye. ¹⁶ Okóm hol hen‑ganag ye nawa ye malà kul mung du yóm kadat ye kul. Hol gel ten‑gama ye anì laen dù sidek gmò ye. Baluen ke wen tau semdekà kuy bè yóm klolò ye ke Krays, ke laen dù sidek tonen bélê ye, bud mulék myak yóm tau semdekà yó. ¹⁷ Ke kun kóyô Dwata ke glayam ye, là sideken se yó, syan ke lemwót bè yóm kehyu yóm deng nmò ye. Okóm ke glayam ye lemwót bè yóm ksidek nmò ye, tey bong sidek se yó. ¹⁸ Yakà dengen tehe matay Krays lanen fen mayad salà, ne là kô bud sneefen du ne yóm yó. Deng mom fen matay yóm tau hol hyu kmoen mò leyu lówó tekuy kem tau gemsalà anì wen lanen mit tekuy ebè Dwata. Ghatay le lówóhen, okóm là yó dum lóyófen, tódô hlós mowil. ¹⁹ Kogol yóm kehtohen, ominen lemwót yóm lóyófen nan e mógów ebè tu kem lóyóf yó kem tau tehe matay deng tehe heblanggù Dwata. Wen hetngónen kul bè yó. ²⁰ Yó kem lóyóf heblanggù Dwata yó, lóyóf tu kem tau là mimón ke Dwata bè yóm tehe kun kdaw Nuwa. Tey tehe khanay Dwata nawahen bélê le tu kem tau tu, tô hatanen kimón le efet kdeng yóm kafal bong nmò Nuwa. Ewenem, tek wolu tau husek elemen ne gewà gu lem yóm tey él. ²¹ Yóm kegewà le yó ekni, hningónen yóm kegewà tekuy gu lem hatay bè yóm kehbabtays tekuy. Bè yóm kehbabtays ye, là kô mò lan mkó using bè lówó du, okóm yó lanen mò ilô yóm deng eles kehkodu ye bè Dwata anì kóhen yó kem salà ye, ne anì laen dù blóng ye ebéléen. Ne yó gónó ye gewà gu lem salà ye mlan bè yóm tehe klowil Dwata ke Jisas Krays gu lem hatay. ²² Ne ni kmoen ni deng nô bè longit ne Jisas, myón fi bè kwanan Dwata mò ilô yóm kehkamal Dwata du du yóm kdéen hógów Dwata gu bè longit, ne kdê yó kem dumu mtulus wen kwalis le ne wen kfasang le bè yó bè longit.