¹ Ke deng ye baling kun ngà Dwata, duhen yó hol kó ye yó kem sidek gel nmò ye. Bê ye tmulón kéng. Bê ye nmò yóm tulón wen lafinen. Bê ye gel sélés nawa. Bê ye abay henwog kem dumu ye. ² Hkél ye bè yóm ngà lomi sut, són nô bè nawahen tmutù ne yó gónón baling lemnok. Yake són Udél Dwata nô bè nawa ye se kuy mò henged kuy tutù anì lemnok kehtahu ye. ³ Lómón se yóm monen bè Sulat Dwata, yóm monen, “Deng gtób ye ne kóó yóm tey kehyuhen yóm gónó ye mogot.” ⁴ Hol ye hloni ebéléen dé. Du se yóm bemlay du kuy yóm klowil laen dù sónen. Hol lómón ke du yóm botu deng kenbê yó kem tau gel hemdà gónô, ofo kul ke botu laen dù muhen. Igoen du he yóm botu bong muhen deng nélék Dwata. ⁵ Ne kdê ye yó kem tau deng hlowilen, lómón ke botu ye snéen kuy. Yu se yó kem botu wen mu Dwata du bè yóm gónô hdaen mò gónóhen gel nô. Ne bè yóm gónóen yó, hol lómón ke yu se yóm tau fen gel demsù ebéléen. Yó henged kuy dsù, duhen yóm kimón ye ke Dwata ne yóm gel kdóyón ye du, hlan ye bè yóm deng nmò Jisas bélê ye. Ni se yóm dsù hol henmóyô Dwata. ⁶ Yakà wen yóm monen bè Sulat Dwata, yóm monen, “Wen botu alì mebtes deng tehe eles néléku. Yó se yóm botu alì bong muhen bè yóm gónô hdau bè Sayun. Deng suu bè yó ne. Ke wen tau hemtahu béléen, là kô wen gónón gsel béléen.” ⁷ Yóm botu monen yó, alì bong muhen bélê ye, yu kem tau hemtahu. Okóm bè kem tau là hemtahuhen, wen monen bè Sulat Dwata, yó monen, “Wen botu deng senkbê yó kem tau hemdà gónô, ofo kul ke laen dù muhen. Igoen són yó yóm botu bong muhen bè kdéen.” ⁸ Ne wen sotu monen bè Sulat Dwata, yó monen, “Yó se yóm botu angat geslob yó kem tau, ne hlós le tlokob du.” Tahu se yóm yó. Tlokob le du lemwót bè yóm là kimón le du yóm Udél Dwata. Tu se tehe eles olu Dwata ebè yó kem tau là mimón le. ⁹ Okóm yu kem tau deng hemtahu béléen, deng nélék Dwata yu mò hol kun tau. Yu se yóm henged demsù ebéléen. Yu se kem tau hol kun nogot, kem tau hol nfunen. Deng néléken yu anì hol heglalag ye bè klamangen yóm tey hyu deng nmoen bélê ye. Deng tnabahen yu igò ye tolo nô lem gónón kmifu anì mili ye ebéléen bè tum gónón alì lemayag. ¹⁰ Tehe yu ekni, là kô ye tau Dwata se kuy, okóm ni kmoen ni, deng ye baling kun tau ne. Tehe là tngón ye du yóm kkoduhen kuy, okóm ni kmoen ni deng tngón ye ne. ¹¹ Ó kem dou dumu swè, sundu hol kut benwu du nim benwu ni, olo tekuy hlun menwu tahen. Yó gónóhu hol mon du mò kuy, bê ye bud nmung yóm sidek gel knóyô lówó ye. Yóm knóyô lówó yó, tendo gel hesbewegen yóm klolò ye ke Dwata. ¹² Hol hninggel ye mò kmò ye lem blóng yó kem tau là hemtahuhen. Abay se ke són hyu yóm gel ton le bélê ye, laen kô sfuhen ke wen tô semtulón kuy. Ngem angat gbót dóyón le Dwata bè yóm kdaw kesfuléken edini. ¹³ Lemwót bè yóm deng klolò ye yóm gónó tekuy mogot, bê ye nulé yó kem udin lem benwu ye. Hol nimón ye yóm tau hol geta bélê ye. ¹⁴ Dalang se yó kem gubérnor deng néléken mò fen tmafak yó kem tau gel mò sidek, ne mò fen gel dmóyón yó kem tau mò yóm hyu. ¹⁵ Yó kóyô Dwata ke lemwót bè yóm kehyu kmò ye gónón laen dù bud udél le eta ye yó kem tau là hulungen hedem, yó kem tau tódô gemsanil kuy hkawang. ¹⁶ Ya mon ke tau talak tonok yóm tahu gónó ye mogot. Syan dé bê ye nmò yóm sidek bè yóm là kogot ye bélê le. Hol henyu ye kmò ye bè kem dumu tau, abay se tauhen yu Dwata. Hol nadat ye kdéen tau. Hol kenbong ye nawa yó kem dumu ye deng hemtahu. ¹⁷ Hol knikò ye Dwata. Hol nadat ye yóm tau hol geta bélê ye. ¹⁸ Ni udélu ebélê ye, yu kem tau gel mò nmò bè dumuhen tau. Hol nimón ye yóm tau gónó ye mò nmò, ne hol nadat ye snéen. Là olon du bè yóm tau hyu kmoen gónó ye mò du nim monu ni, bede hol nmò ye snéen bè yóm tau sidek adaten. ¹⁹ Abay se tey któbóng Dwata kuy ke hol henbala ye yóm sidek gel nmò le bélê ye hkawang. Yó gónó ye gembek hembala du, abay se là kóen mkó bè nawa ye yóm kun kóyô Dwata. ²⁰ Ke wen gónó le tmafak kuy lemwót bè kuy salà, baluen ke gbek ye hembala du, là kô dóyón Dwata kuy, abay se kuy salà. Okóm ke tódô tnafak le yu hkawang igoen laen dù sidek nmò ye, ke gbek ye hembala du yóm yó, tey któbóng Dwata kuy. ²¹ Ni se hol kun kóyô Dwata bélê ye ke gbek ye hembala yó kem gónó ye gel glayam hkawang. Ngem ke Krays kun, tey kehbalahen yóm tehe keglayamen bélê ye. Du se mò gónó ye dmalang anì mkél ye du. ²² Laen kô dù salaen se kun, ne laen kô dù kéng deng btang bè sumóngen. ²³ Bè yóm tehe kehnê le du, là kô nan e bnalà kul. Bè yóm tehe keglayamen, là kô nan e nifis kul. Tódô snaligen Dwata, abay se tngónen yóm kkukum Dwata, tey tedeng. ²⁴ Bè yóm tehe ktutuk le ke Krays bè yóm kros, deng nwiten ne yó kem salà tekuy, ne deng mom du tnafak bè salà tekuy. Yó gónón mò du yóm yó anì tnagak tekuy yó kem sidek gel nmò tekuy, ne anì hol nô bè nawa tekuy mò du yóm hyu. Du se yóm tehe alì glayam, ne yu se yóm fen hyu bè kililen. ²⁵ Gu laan ye là deng hemtahu he, lómón tô ye ubiha gel mógów hetlas. Okóm ni, deng bud niten yu mulék ebè Dwata ne. Du se yóm tendo semgyok ne tendo mentey kuy.