¹ Ou Pitér gónón lemwót nim sulat ni. Ou sotu bè yó kem gel hógów Jisas Krays. Smulate ebélê ye yu kem tau deng nélék Dwata deng gotu mlóy sekla ebè yó kem prubinsya boluy le Pontus ne Glasya ne Kapadusya ne bè Asya ne bè Bitinya. ² Deng tehe eles tngónen kuy Dwata, yóm Mà tekuy bè longit, ne deng néléken yu ne nmoen yu hol kun tau mlan bè yóm kun Tulus. Yó gónón mò du yóm yó anì hol nimón ye Jisas Krays ne anì gotu hnifóten yó kem salà ye mlan bè yóm deng khamà Jisas litóen. Dwata he hol tendo tmóbóng kuy ne hol tendo henek nawa ye. ³ Hol dóyón tekuy dé Dwata. Du se kun Dwata yóm gónó tekuy mogot Jisas Krays, ne bud Maen snéen. Tódô lemwót bè yóm tey kkodu Dwata tekuy, wen yóm lomi klowil blayen tekuy hlanen bè yóm tehe klowilen ke Jisas Krays gu lem hatay. Ne yó se yóm hendón tekuy yóm klowilen tekuy hulin kdaw snéen. ⁴ Bud nangat tekuy snéen yóm tey hyu fan Dwata bè yó kem kun tau ditu bè longit. Laen kô dù hemsidek du yóm fanen tekuy yó, ne laen se kô dù belenen sidek, ne là se monolen yóm tey kehyuhen. ⁵ Hono kuy se funen yóm hyu yó. Ne lemwót bè yóm kehtahu ye, tódô senflós Dwata mofin kuy mlan bè yóm tey kegbeken. Yó gónón mofin kuy, abay se deng eles wen ne yóm klowil laen du sónen angat blayen tekuy, yóm hegfanen bélê tekuy bè yóm hol són kdaw. ⁶ Yó gónóm mon, hol ye hligal baluen ke dê gónó ye glayam nim kmoen ni. Tek olo likóten yóm keglayam ye yó mò gónó Dwata tmilów kuy. ⁷ Yó gónón tmilów kuy anì gfan ke hol tahu duhen yóm kehtahu ye duhen ke là. Yóm kehtahu ye, lómón ke yóm blówón gel hlan le bè ofi anì gfan yóm hol tahu duhen. Bong bè yóm blówón, olo kem hlun kimu. Okóm yó dum kehtahu ye, bong muhen senta yóm blówón. Milud he ktilów Dwata du anì tngónen ke hol tahu duhen. Ke là lanahen, tey kdóyónen kuy bè yóm kdaw bud kesfulék Jisas edini, lelen tey hegeta kuy ne tey kadaten kuy. ⁸ Balù yóm là deng kton ye ke Jisas he, deng sana eles bong ne yóm nawa ye du. Balù là ton ye du ni kmoen ni, ewenem deng ye sana hemtahu béléen. Ne lemwót bè yóm kehtahu ye, laen selen yóm tey kligal ye, yóm kligal là gbek ye hmingón du. ⁹ Abay se yó nefeten yóm kehtahu ye bè Jisas, duhen yóm deng kegewà ye gu lem hatay. ¹⁰ Nim kmò kegewà tekuy ni, ya tey kehnagì le du yó kem tehe tugod Dwata ekni. Tehe eles gel tulón le snéen nim tóbóng tódô blay Dwata tekuy ni. ¹¹ Bè yóm kehnagì le du, hnebel le ke kilón yóm angat kmò Dwata du, ne yóm mò angat kmoen du. Hol ni sem kmoen ni yóm tehe hetngónen kul yóm Tulus Krays nô bélê le. Eles hetngónen kul yóm keglayam yóm Krays, ne yóm kehegeta Dwata du bè kogolen. ¹² Ne bud hetngón Dwata bè yó kem tehe tugoden yó, là bè kul kehyu du yóm hennagì le yó, okóm bè kuy kehyu. Ne tahu se. Yóm tehe gel tulón le yó ekni, deng gel gungol ye se kuy nim kmoen ni lemwót bè yó kem tau gel tmolok bélê ye yóm Tulón Hyu hlan le bè kfasang yóm Tulus Dwata gu bè longit. Yóm kegewà tekuy gu lem hatay, balù yó kem hógów Dwata gu bè longit, tey tô kóyô le temngón du se kul yóm kmò Dwata du. ¹³ Duhen yó, hol sù ye bè nawa ye sen yóm kimón ye ke Dwata. Bê ye hningay. Hol ken‑gel ye nawa yóm hyu angat blay Dwata kuy bè yóm kdaw kesfulék Jisas Krays edini. ¹⁴ Hol nimón ye dé Dwata. Bê ye abay heskél yóm kmò ye bè yóm tehe tey dê nóyô ye gu laan ye là deng temngón ke Dwata he. ¹⁵ Okóm ni, hol bê ye abay benelen sidek yóm kdê gel nmò ye, abay se là kóen gemsalà yóm Dwata deng mélék kuy. Yó gónóm mon, hol ye heskél béléen yóm klaen salaen. ¹⁶ Yakà deng mon Dwata du bè Sulaten, “Hol bê ye benelen sidek yóm kdê gel nmò ye, abay se laen kô salau dou.” ¹⁷ Bè yóm gel kni ye bè Dwata, gel taba ye du Mà. Ne tahu se yó, Mà ye yóm Dwata. Okóm angat knukumen yóm nmò tau, yóm ket kuy na sotu, ke hyu duhen ke sidek. Ne laen kô dù tau knihuhen. Duhen yó, bè yóm klawi ye mowil te tonok, yake hol knikò ye Dwata. ¹⁸ Tódô tngón ye se yóm tehe ksok Dwata kuy lem yó kem nmò laen dù muhen tehe dnalang ye bè yó kem tehe fù ye. Yóm ksoken kuy yó, là kô kem kimu wen són le yóm soken tekuy, lómón ke filak. ¹⁹ Okóm yó soken tekuy, duhen yóm litô Krays, yóm litô laen dù gembek mayad du. Yóm Krays, hol lómón yóm ubiha gel hnatay le mò dsù le ebè Dwata, yóm ubiha alì hyu, bà udì ke wen gónón sidek. ²⁰ Deng eles nélék Dwata ne gu laanen là deng dmimun du yóm benwu, okóm ni ne yóm khógówen du ete tonok mò tmóbóng tekuy. ²¹ Mlan bè Krays yóm gónó tekuy hemtahu bè Dwata, yóm Dwata tehe hlowil du gu lem hatay, ne tey kehegetahen du. Yó gónón alì mbegel yóm kehtahu tekuy bè Dwata ne yóm hendón tekuy béléen. ²² Lemwót bè yóm deng kimón ye yóm ktahuhen, deng ye baling mólós ne, ne deng wen ne yóm tahu kesbong ye nawa. Hol hewót ye lem nawa ye yóm kesbong ye nawa yó. ²³ Wen lomi klowil blay Dwata tekuy hlanen bè udélen, yóm udél laen dù tul sónen. Là kóen lemwót bè kul klowil yó kem tuha tekuy yóm klowil yó, bede hol lemwót bè Dwata, yóm laen dù tul katayen. ²⁴ Lómón se yóm monen bè Sulat Dwata, yóm monen, “Là kóen té kun yóm klowil tau, hol lómón ke bnes. Ne yóm któtól yóm tau, lómón ke bulók lem bnes. Mahil menes yóm bnes, ne mahil mifù yóm bulók. ²⁵ Okóm yóm kun Udél yóm gónó tekuy mogot, laen kô dù tul sónen.” b Yóm udél monen yó, yó se yóm Tulón Hyu gel hetngón le kuy yó kem tau gel tmolok bélê ye.