¹ Koddi si Pablu, ka migligkatan to soini no sulat. Suguanon a to Diyus hoy apustulis a ni Hisu-Kristu, in-alam a hoy inpa-alap oyjow to poglig-un to pogtuu to mo koot-otawan no inalam to Diyus, hoy og-alap kandan diyo to kamatuuran no inpanulu to katuonan ta. ² No ligkat diyo to pogdaral to kinabuhi no warog katamanan. Ka Diyus no kono iyan og-uubat migsaad kanta to kinabuhi sukad pad to bunsuran. ³ Hoy to saktu on no aldow inpapitow din diyo to lalag din. Inbalagad soini koddi hoy inlalag ku tongod su insugu a to Diyus no manluluwas ta. ⁴ Nigsulat a ki Titu, ka tutuu no anak ku to pogtuu ta ka Diyus no Amoy ta hoy si Hisu-Kristu nomanluluwas ta ogtalad poron koykow to grasya hoy kalinaw. ⁵ In-ongkoran ku koykow diyo to Krita oyjow ogtanul to mo butang no waro pad naponga, hoy oyjow ogpanulu ka to mo agalon to iglisya to matag banwa. Suman-sumana nu ka mo mandu ku koykow. ⁶ Koilangan no ka agalon to iglisya to matag banwa, waro igkabawoy kandin hoy sagboka ro ka asawa. Hoy ka mo anak din koilangan no ogtuu to Diyus, kono og palabi hoy kono og masupilun. ⁷ So insaligan man kandin to agalon to hinang to Diyus kinangulan no kono kandin ogkasawoy, kono no garolon, kono no magaan ogkabolu, kono no palahubug, kono no hanhanon. ⁸ Kinangulan no maab-abiyon kandin, ogkaliyag to maroyjow, ligdong, matarong, balaan hoy mapinogongon to kougalingun. ⁹ Kinangulan no ogpabilin kandin no maroson duon to kasaligan no katuonan no inpanulu kandin oyjow ogmakadaral kan do to duma hoy ogmakasapad to sayjop duon to kono ogtuu to soini. ¹⁰ Su mohon-in ka ogsuwoy hoy amana on iyan ka nigtuu no kinangulan no ogturion ka kono no mo Hudiyu. Nigsuboy kandan to mo butang no waro pulus no iyan naka palaag to duma. ¹¹ Kinangulan no ogpahagtongon kandan su nakasasow to kabalbalayjan pinabayjo to pogpanulu to kono poron no litus no igpanulu tongod do to makasisipod to tood to pogpanalapi. ¹² Sagboka to mo purupita dan no taga Krita no nigkagi, "ka mo taga Krita ubaton, mo waro batasan, koonon do kag suman-sumanon, mo pog-okon." ¹³ Tutuu ka inkagi rin, koy naan pahagtonga nu kandan to waro pugong-pugong oyjow ogmakaabin kandan to tutuu. ¹⁴ Kinangulan no kono kandan ogtuu to tumutumu no lalagon to mo Hudiyu hoy to kasuguan to mo otow no waro nigtuman to kamatuuran. ¹⁵ Kandan no matarong tibo no butang matarong di ka otow no maroot hoy waro pogtuu, waro butang diyo to kandin no maroyjow su maligsom man ka kandan no nataga to Diyus di ka sumsuman. ¹⁶ Nig-abin kandan no nataga to Diyus di ka hinimuwan dan maroot, sawbayjonon kandan hoy kunog mokohimu to maroyjow.