¹ Di ka ikow Titu, kinangulan no ogpanulu ka sumalo to tumanan ka olog no igpanulu. ² Panului no ka buyag-buyag no mo lukos to pogbalabag to kandan no pogko-otow dan, kinangulan ka kohimu kandan no tahuronon, makabuligbulig kandan to maroyjow hoy kono, maroson ka kandan no pogtuu, magogoynawoon kandan to isigka-otow dan, dow maaguwantahon ka tibo no ogpohimulus. ³ Dow panului no ka beyi no kinangulan no maroyjow ka kandan no hinang to suman-suman to pogtuu to Diyus. Kinangulan no kono kandan ogpanlibak hoy og-inum, kinangulan no igpanulu dan ka maroyjow. ⁴ Oyjow ogkataga ka mo beyi ko og-umawon dan tog-ulog ka kandan no asawa dow mo batu. ⁵ Hoy ko ogmonuwon dan to ogsuman-suman ka maroyjow dow kono, oyjow kandan ogkataga to kinabuhi no maroyjow, hoy pogtanol diyo to baloy, hoy poghinang to maroyjow, dowug tuu to asawa rin, oyjow waro makakagi to ogpakigkalaban to maroyjow no pulung to Diyus ka tibo no inpanulu. ⁶ Darala now ka mo uulitawo no mo lukos no nigsuman-suman now ka maroyjow dow kono. ⁷ Kinangulan koykow ka lawan to poghimu to maroyjow, kinangulan tutuu ka inpanulu nu. ⁸ Siguruwa ka pigpangi no untol hoy kono ogkasawoy, oyjow ka mo otow no nakigkalaban kanta ogkangasikawa, hoy waro nigkagi to maroot bahin to koddi. ⁹ Panulua now ka mo uripon no kinangulan no matinuorun kandan oyjow kangaholo ka mo agalon, dow ko kow atu-atu. ¹⁰ Hoy kagihi now man do kandan no kono ogpanakow to kalaglagan to agalon dan, ogpakita kandan to maroyjow hoy kasaligan, oyjow ka pinabayjo to tibo no hinimuwan to mo otow no maroyjow iyan kagkatagahan ta mahitongod to Diyus no manluluwas. ¹¹ No nigpakita on to Diyus ka tibo no maroyjow no otow hoy ka garasya no nigbugayjan to kaluwasan. ¹² No soi no garasya nakapanulu koddi no kinangulan inbalabag ta ka kapogkinabuyi no kono diyusnon hoy ka mo kalibutanon no mo kaibog, kinangulan og-ugpo ki dini to kalibutan no ogsuman-suman ka maroyjow hoy kono, kinangulan nogtularongon ta kaghimuwon no ligkat iyan to Diyus. ¹³ Tagood no ogtatagad ki to igpadatong ta no iyan sikan poglopow to katolosan to maroson no Magbobayjo no manluluwas no si Hisu-Kristu. ¹⁴ Dihal din-on ka kaugalingon din oyjow kaluwas ki to mo salo ta, oyjow kohimu ki no kandin no kaot-otawan, no na awu on ka salo ta dow maali kid oghimu to maroyjow. ¹⁵ Igpanulu no soini diyo to kandan, hoy himuwa no ko nokoy ka koykow natuonan no maroyjow tagood nogdaral ka diyo to kandan to poghimu to karoyjowan. Kono no himuwa ka agad nokoy no iyan hinungdan nogkakuingowan ka.