¹ Soini no basoon, moyitongod to inpakita ni Hisu-Kristu no magaan on ogkayitabu. Inpanongnong to Magbabayjo soini diyo to kandin oyjow igparong di on soini diyo to suguanon din no si Huwan pinabayjo to pogsugu to panaligan din. ² No inpanggugud ni Huwan ka tibo no nakita rin inpamalogotan din ka lalag to Magbabayjo hoy ka inpanongnongan ni Hisu-Kristu diyo to kandin. ³ Kaliyag to sooyjo so ogbasa diyo to kasulatan moyitongod to inpanongag kayi, hoy ka ogpamminog hoy ogtuman to nasulat kayi so magaan on ogkatuman ka tibo. ⁴ Igsulat kayi hoy igpoondiya ku to pitu no punduk to nigmalintutu-u diyo to prubinsya to Asya. Awka koyid-un koy karoysawba no ogligkat to Magbabayjo uramo. ⁵ Ogkaabin now man on ka kayid-o hoy kaliyaganan no ogligkat ki Hisu-Kristu, ka matinumanon npo talagpanulu, ka an-anayjan, no nouyag, hoy ka ogmando to mo pangulu to kalibutan. Indakolan ki to goynawa ni kandin hoy inlokat ki ligkat to mo salo ta pinabayjo to langosa rin to namatay-on. ⁶ Hoy inhimo ki nikandin no nigharian din, hoy talagpanubad to Diyus no Amoy rin. Sikan na-an, ogdayanon kandin hoy oghari to waro ogtamanan. Malogot iyan. ⁷ Pamminog kow! Oghondini si Kristu duma to mo gapon hoy, ogkitoon kandin to tibo no tribu kayi to ampow to tano tongod kandin. Malogot iyan. ⁸ Ka amana no maroson no Diyus no Magbabayjo, no iyan ka Diyus kuntoon, ka Magbabayjo dongan, hoy ka Diyus uromo, nigkagi “Koddi ka Alpa hoy ka Umiga.” ⁹ Koddi si Huwan no sulud now to pogpalintutu-u. Tongod to nasabogka kid on diyo ki Hisus, duma ad nikaniyo to pog-antus to mloyirap hoy to pogpatibolos duon ki Hisus, hoy duma ad kaniyo tongod to poggugud ku to lalag to Magbabayjo hoy to pogpamalolot ko moyitongod ki Hisus. ¹⁰ To aldow to Magbabayjo, indumahan to Ispiritu to Diyus, no duton duon narinog ko no lagong diyo to ogkoin-inowan no og[pokoiling to trumpita. ¹¹ Nighohon duon soini, “Isulat no diyo to linulun no atog ko nokoy ka nakita now hoy ipa-alap no to pitu no panongan to nigmalintutu-u: Diyo to, Ismirna, Pirgamu, Tiyatira, Sardis,Piladilpiya hoy diyo to Lawdisya.” ¹² To sikan do, nigbalikid ad ka ogpitow ko hontow ka niglalag koddi, hoy pitu no bulawan no tagoanan to kalaysag ka nakita ku. ¹³ No duon nigsasindog diyo to taliwwaro no honduon to otow no nigkikinabu to malayjat hoy inboloburan to bakus no bulawan ka kumong din. ¹⁴ No ka bulbul rin ogpokoiling to maputi no gapas, hoy ka mata rin iling tog kalab-kalab no hapuy. ¹⁵ No ka paa rin ogpokoiling to inlalab no burunsi no nigsokol, ka lagong din ogpokoiling to dakul no sampusu. ¹⁶ No niggongonan ka kawbanan no bolad din to pitu no bituon, hoy niglibuwas no magalag no kampit diyo to bo-bo din. No ka lagolago rin ogpokoiling to aldow no malayjag nog panginikini. ¹⁷ To pogkakita ku kandin, napolod a diyo to tangkaan din no honduon to namatoy on no intol-oban a nikandin to kawbanan no bolad din no nigkagi, “Kono ka kahaldok! Koddi ka binunsoran hoy ka katapusan, ¹⁸ hoy ka duon kinabuwi, namatoy a di tongtongi no naoyag ad hoy kona ad ogkamatoy to waro ogtamanan. Koddi ka indiyalan to kamatayjon hoy duon yabi ko to Hadis no iyan ka ingod to mo gimukud. ¹⁹ Koy na-an isulat no ko nokoy ka nakita now no ogkoyitabu kuntoon hoy ka ogkoyitabu uramo. ²⁰ Soini ka holos no kaluwasan to pitu no bituon no nakita no kayi to kawbanan no bolad ko hoy to pitu no bulawan no tago-anan to sulu ka igpasabut to pitu no bituon iyan ka mo panaligan no nigbantoy to pitu no panongan to nigpalintutu-u, no iyan ka pitu no sulu.”