¹ Soin ka kaap-apuan ni Hisu-Kristu no kabuwaran ni Dabid, no kabuwaran ni Abraham. ² Si Abraham ka amoy ni Isaak, si Isaak ka amoy ni Hakub, no si Hakub ka amoy ni Huda woy to mgo sulod din. ³ No nakaasawa si Huda ki Tamar woy duwon daruwa no anak dan no si Piris woy si Sara. Si Piris ka amoy ni Hisrun, woy si Hisrun ka amoy ni Aram. ⁴ No si Aram ka amoy ni Aminadad, si Amindad ka amoy ni Nasun, woy si Nasun ka amoy ni Salmon. ⁵ No nakaasawa si Salmon ki Rahab no iyan dan anak si Buas, no nakaasawa si Buas ki Rut no iyan dan anak si Ubid, no si Ubid ka amoy ni Hisi, ⁶ no si Hisi ka amoy ni Hari Dadid. No si Hari Dabid ka amoy ni Sulumon,woy iyan din inoy ka asawa dongan ni Uriyas. ⁷ Si Sulumun ka amoy ni Rihubuam,si Rihubuan ka amoy ni Abyas, si Abyas ka amoy ni Asa, ⁸ no si Asa ka amoy ni Husapat, si Husapat ka amoy ni Huram, si Huram ka amoy ni Usiyas. ⁹ Si Usiyas ka amoy ni Hutam, si Hutam ka amoy ni Ahas, si Ahas ka amoy ni Isikiyas. ¹⁰ Si Isikiyas ka amoy ni Manasis, si Manasis ka amoy ni Amun, no si Amun ka amoy ni Husiyas. ¹¹ No si Husiyas ka amoy ni Hikuniyas hoy to mo sulod din. To sooyjo no timpu, in-uyan ka matig-Israil diyo to Babilunya oyjow og-uriponon. ¹² Pogkaponga uyana to matig-Babilunya ka matig-Israil, nakaanak si Hikuniyas ki Salatiil, no si Salatiil ka amoy ni Surubabil, ¹³ si Surubabil ka amoy ni Abyud, si Abyud ka amoy ni Ilyakim, si Ilyakim ka amoy ni Asur, ¹⁴ si Asur ka amoy ni Saduk, no si Saduk ka amoy ni Akim, si Akim ka amoy ni Ilyud. ¹⁵ Si Ilyud ka amoy ni Ilisar, si Ilisar ka amoy ni Matan, si Matan ka amoy ni Hakub. ¹⁶ Si Hakub ka amoy ni Husi, no asawa ni Mariya no inoy ni Hisus no ogngaranan to Kristu. ¹⁷ Purisu duon sampulu hoy hop-at (14) no kabuwaran puun ki Abraham taman ki Dabid, hoy sampulu hoy hop-at (14) doma no kabuwaran puun ki Dabid taman to panawun no nouyan on ka matig-Israil diyo to Babilunya, hoy duon pad man-o sampulu hoy hop-at (14) no kabuwaran puun to nouyan ka matig-Israil taman to nootow on ka Kristu. ¹⁸ Soin ka guguron to pogkootow ni Hisu Kristu. Ka inoy rin no si Mariya, napamalayan on ni Husi, piru to waro pad sikandan migpowuliroy, naboros on si Mariya pinaahi to Panisingan to Magbobayjo. ¹⁹ Na, si Husi so ogpangasawa kandin, matularong no otow hoy kono sikandin ogkoupian no ogpoyilawan din si Mariya. No puun dutu, nakasuman-suman sikandin no ogpasuwayoy sikandan to holos do. ²⁰ Piru to migsusuman-suman pad kandin dutu, duon panalihan to Magbobayjo no Diyus no migpakita kandin pinaahi to tahoinop migkahi, “Husi, kabuwaran ni Dabid, kono ka kaaldok no ogpangasawa ki Mariya su naboros sikandin pinaahi te Panisingan to Magbobayjo. ²¹ Og-anak kandin to lukos hoy ngarani nu ki Hisus tongod su kandin ka ogluwas to koot-otawan din puun to mo salo dan.” ²² Nohitabu soin so langun oyjow ogkatuman ka ingkahi to Magbobayjo no Diyus pinaahi to purupita: ²³ “Ogkaboros ka mongobay no waro pad noyilaboti, hoy lukos ka ig-anak din hoy ogngaranan kandin to Imanyuwil” (Iyan kaluwasan to Imanyuwil, “Duma ta ka Magbobayjo.”) ²⁴ Purisu to poggimata ni Husi, intuman din on ka insuhu to panalihan to Magbobayjo no Diyus, hoy in-asawa rin on si Mariya. ²⁵ Piru waro din hilaboti si Mariya to waro pad mig-anak. To inlosutan on si Mariya, lukos iya ka anak din hoy ingngaranan on ni Husi ka bato ki Hisus.