¹ To pogkaponga ni Hisus to pogpanulu to mo otow, nighondiyo kandin to Kapirnaum. ² Diyo duon Kapitan to sundalo no taga-Ruma no duon uripon no magaan no ogkamatoy. Nigdakolan din to goyinawa ka uripon din. ³ To duon no nigdinog duto to Kapitan ni Hisus, nigsugu din ka pila no agalon to Hudiyu to poghondiyo ki Hisus oyjow igpohondiyo to baloy oyjow to pogtumbal to uripon din. ⁴ Pog-uma dan diyo ki Hisus igpohoy-u-hoy-u kandan ki Hisus, nigkagi kandan, "Ko ogkabaluy buligin ka Kapitan, su maroyjow kandin no otow ⁵ nigdakolan kandin to goyinawa to mo Hudiyu hoy nigpatukod pad kandin to simbaan para kanta." ⁶ Koy naan ka nigduma si Hisus kandan, to duon no magaan on kandan ogmokouma diyo to baloy to Kapitan, insugu to Kapitan pila no su sulod din oyjow ogtagboon si Hisus hoy ogkagiyan, "Magbabayjo, kono no bantola ka kougalingon nu. Kono an tumanan noogpalopow koykow to baloy ku. ⁷ Iyan no wara a nighondiyo koykow su kona a tumanan no ogdani koykow. Ikagi nu ro no ogkoulian ka uripon ku. ⁸ Natagahan ku soini su diralom a ro to mo upisyal, hoy duon mo sundalu no diralom ku ro to pogmandu. Koy naan ko ogmandu a to sagboka, 'Hipanow,' oghipanow iya kandin, hoy ko ogmandu a to sagboka, "Apas dini,' oghondini kandin. Hoy ko nokoy ka igsugu ku to kanak no uripon, oghinangon din." ⁹ Pogkadinog ni Hisus to soini, nabolong amana kandin. Mig-atubang kandin to mo otow no nigduma kandin hoy nigkagi, "Waro pad otow no nakita ku to Israil no duon pogtuu no iling to soini. ¹⁰ Niglibo ka mo sinugu to Kapitan diyo to baloy hoy nakita dan noulian on ka uripon. ¹¹ To waro nalugoy nighondiyo si Hisus to lunsud to Nain. Nigduma kandin mo sumusunud din hoy ka mohon-in no mo otow. ¹² To duon nakarani on kandan to tangkaan to lungsud to Nain, natomu dan ka masulug no mo otow no nigduma to poglobong to sagboka no namatoy. Ka namatoy sagsagboka no anak to balu no malitan. ¹³ Pogkakita ni Hisus no Magbabayjo to inoy to namatoy, nohid-u amana kandin. Nigkagi kandin, "Kono kad sinogow." ¹⁴ Hoy nigdani si Hisus to langun hoy in-gun-gunan din soi, koy naan nigsagdok ka mo nig-alap to soini. NIgkagi si Hisus diyo to namatoy, "Oto, onow ka!" ¹⁵ Nigbangon ka namatoy, nigpinnu hoy nigkagi. Koy naan inbugoy ni Hisus diyo to inoy rin. ¹⁶ Pogkakita to mo otow nahaldok kandan, hoy indayjan dan ka Diyus. Nigkagi kandan, "Insumansuman to Diyus ka kandin no mo koot-otawan. Inbogayjan din kanta to oggahumanon no Purupita. " ¹⁷ Niglugob to tibo Hudiya hoy to tibon banwa ka balita moyitongod to inhimu ni Hisus. ¹⁸ Soini tibo nohitabu inbalita ki Huwan to kandin no mo sumusunud. ¹⁹ Koy naan ka nig-umow ni Huwan ka daruwan no sumusunud hoy insugo din no oghondiyo to Magbabayjo oyjow ogpangingso ko kandin buwan iyan ka nigtatagaran hoyko ogtagad pad kandan to loin. ²⁰ Hoy nighondiyo kandan ki Hisus hoy nigkagi, "Insugu koy ni Huwan no Tigbawtismu oyjow to pogpanginso koykow ko, 'Ikow on ba ka kanami no intagaran hoy ko ogtagad koy pad tio loin?' " ²¹ To sikan no panahuna, mohon-in ka masakiton ka inpoulian ni Hisus no Magbabayjo, agad pad duon mamaagbot no sakit, hoy ka mo insoluran to maroot no Ispiritu. Maohon-in dan ka butud no noulian din. ²² Intabak ni Hisus ka mo sinugu, "Libod kow diyo ki Huwan hoy kagihi now kandin to, nakita now hoy to narinog now. Kagihi kandin no ka mo butud no nakakita on, ka mo pugkut, nokohipanow on. Ka mo ogoron noulian. Ka mo bongol, nakarinog on. Ka mo nangamatoy, inpamaton on hoy ka Maroyjow no lalagon inpanulu diyo to mokohohoy-u. ²³ Iyan kampo ka mo otow no waro migduwaruwa kanak. ²⁴ To nokohipanow ka mo sinugu ni Huwan, nanginso si Hisus to mo otow, "To poghondiyo now ki Huwan to koyilawan?Nokoy naan ka inpaabot now no ogkitoon?Nighondiyo kow ba oyjow ogkakita now ka otow no anat to kogon no parumaruma to kalamag? ²⁵ Hoy nighondiyo kow ba oyjow ogkakita now ka otow no nigtitinabo to mahal no tinabo? Di nataga kow no ka otow no nigtitinabo to mahal no tinabo hoy nanginabuhi no waro ogkatalongan no nig-ugpo to mo Palasyu. ²⁶ Kagihi a now ko maniyo to nighondiyo kow diyo oyjow ba ogkitoon now ka Purupita to Diyus? Tutuu ba, hoy labow pad iyan kandin to purupita. ²⁷ Tongod to kandin iyan ka inkagi to Diyus to kasulatan, 'Igpaalap ku ka kanak no tigpamatbat hun-a koykow to pogpangandam to koykow no bayjaanan.' ²⁸ Kagiyan ku kaniyu, to pogkatinuud, waro pad nootow to ingod no labow pad ki Huwan. Piru kuntoon agad hontow ogpadiralom to pogpanakop to poghari to Diyus no labow pad ki Huwan. Di kuntoon agad hontow no ogpadiralom to pogsakop to poghari to poghari to Diyus no oglabow pad ki Huwan." ²⁹ To pogdinog to mo otow to panulu ni Hisus, agad ka talagpurut to buwis, nig-uyjun to hinimuwan ni Diyus tongod su nigpabawtismuhan on man kandan ni Huwan. ³⁰ Di ka mo Parisiyu hoy ka mo Talagpanulu to kasuguan waro nig-uyjun kandan totuud to Diyus kandan su kandan waro man nigpabawtismu ki Huwan. ³¹ Nigkagi pad mando si Hisus, "Nokoy man ka igkatandi ko to mo otow to soin no panahuna? ³² Iling kandan to mo bato no naminnuu diyo to Plasa no nigkagi to matag-sagboka, 'Nigparagingan noy kaniyu to sunata to pogsakat di waro kow nigsayjow. Nigkantahan noy kianiyu to kanta para to namatoy di waro kow naninogow.' ³³ Kaniyu iling kow ro kandan, tongod to pog-uma ni Huwan nigkita now no nigpuasa kandin hoy waro nig-inom to inumon koynaan ka nigkagi kow no duon maroot no Ispiritu din. ³⁴ Hoy kanak no Anakto Otow, pog-uma ko nakita now no nigkoon hoy nig-inom a koy naan ka nigkagi kow no talagkoon a hoy palahubug nigkagi kow no duma ku ka talagpurut to buwis noy ka duma no makasasalo!' ³⁵ Di sikan konon tutuu su ka tibo no otow no nigsunud to kabubut-on to Diyus namatuud no maroyjow ka inhimu to Diyus." ³⁶ Hoy duon Parisiyu no nighanggat ki Hisus to pogkoon diyo to baloy rin koynaan ka nighondiyo si Hisus oyjow ogkoon diyo. ³⁷ To sikan no banwa duon sagboka no malitan no namaanan no makasasalo to pogdinog din no nighondiyo si Hisus to baloy to Parisiyu nighondiyo kandin diyo nig-aalap kandin to doisok no tibodno duon solod no poomut. ³⁸ Nigdani kandi diyo to kurul ni Hisus hoy nigsinogow kandin diyo to paa ni Hisus nigtihis ka lowu din diyo to paa ni Hisus. Nigpunasan din to bulbul din hoy nigharokan, pogkaponga nig-og-ogan din to poomut ka paa ni Hisus. ³⁹ Pogkita dutu to Parisiyu no nighanggat ki Hisus nigkagi kandin to kougalingon din , "Ko soinin no otow no purupita ogkamaanandin poron ko nokoy no kalasi no malitan ka niggun-gun kandin su soini no malitan makasasalo." ⁴⁰ Di namaanan ni Hisus ko nokoy ka insumansuman din, koy naan ka nigkagi kandin, "Simun duon igkagi ku koykow." Nigtabak si Simun, "Nokoy man talagpanulu?" ⁴¹ Nigtabak si Hisus pinabayjo to sampitanan, "Duon daruwa no otow no nanginso to salapi duon to talagpoutang, ka sagboka nig-utang to lalimman gatus, ka sagboka nig-utang to lalimman pulu. ⁴² Di tongod su kandan kono ogmakabayjad, warad kandan pabayjan dutu nig-utangan dan. Kuntoon, hontow man kandan daruwa ka nohigugma dutu noutangan dan?" ⁴³ Nigtabak si Simun, "Siguru iyan ka dakol ka utang? Nigtabak si Hisus, "Malogot ka inkagi nu." ⁴⁴ Hoy inlingi din ka malitan hoy nigkagi ki Simun, "Nigkita nu buwa ka nighimu to soini malitan to pogsulod to kayi to baloy no waro a no bugayji to wohig no ighugas ku to paa ku, do soini malitan nighugasan din ka paa kou pinabayjo to luwu din, hoy ka bulbul din iyan din pad inpamunas to paa ku. ⁴⁵ Waro a no haroki hoy induma-duma, di soini no malitan, ligkat pad to pog-uma ku dini waro hagtong to pogharok to paa ku. ⁴⁶ Waro nu tagui to lana ka ulu ku oyjow to pogbatonn kanak, di soini no malitan ka maalon pad iyan no poomut ka in-ug-ug din to paa ku. ⁴⁷ Ognangunan ku koykow ka dakol no goyinawa no inpapitow din kanak nigpamatuud no ka mohon-in din no salo inpasaylo on, di ka otow no doisok no salo inpasaylo on, doisok do ka goyinawa no inpapitow rin." ^{48 50} Hoy nigkagi si Hisus to malitan, "Inpasaylo on ka mo salo nu." ⁴⁹ Ka nangon no duma ni Hisus nigkagi to kougalingon dan, "Hontow man soini no otow no ogpasaylo man to mo salo?" Hoy nigkagi si Hisus to malitan, "Ka pogtuu nu iyan nakaluwas koykow. Uli ka no malinawon."