¹ Hoy ka tibo nigmanasindog hoy induma dan si Hisus to tangkaan ni Pilato. ² Hoy innangon dan si Hisus ki Pilato. Nigmangagi kandan naumaan doy soin no otow no inlaag din ka mo otow hoy pigpangkagiyan din no kono kandan igpabayjad to buhis diyo to Impiradur hoy in abin din no kandin ka Misiyas no hari.” ³ Si Pilato nanginso kandin, “Koykow iyan ka hari to mo Hudiyu? “Nigtabak si Hisus, “Inkagi nud.” ⁴ Hoy migkagi si Pilato to mo agalon to mo pari hoy dot mo otow, “Waro natagaan ko no salo to soin no otow. ⁵ Di nigmangagi rod iya ka mo otow. Iyan soini nakabugoy to kagulob to mo otow tongod to pogpanulo din, no nigligkat kandin to Galiliya hoy pigligbot din on iyan ka banwa to Hudiya hoy kuntoon soini mando kayi,” ⁶ Ka pogkarinog ni Pilato to soini, nanginso kandin, Nig-ugpo diya to Galiliya soini no otow? ⁷ Hoy to pogkatagahi ni Pilato no si Hisus ligkat diyo to ugpoan no pigpanguhan ni Hirudis, inpaduma rin si Hisus diyo ki Hirudis no sikan diyo to Hirusalim. ⁸ Nahulo amana si Hirudis to pogkakita rin ki Hisus so nalalagan kandin mayitongod ki Hisus, hoy nalugoy on kandin og iman-iman nogkakita rin si Hisus no oghimo to kain-inowan. ⁹ Nanginso si Hirudis ki Hisus buyen to mohon-in no mo butang di waro nigtabak si Hisus. ¹⁰ Nigmangdalapaka ka mo panguo to mo pari hoy ka mo talag-anad to balaod hoy pignangonan dan on iyan si Hisus no dakol on iya ka salo din. ¹¹ Hoy inliliyan-liyan si Hisus ni Hirudis hoy to mo sundalo. Pigsalu-oban kandin to mokohunok-hunok no kinabo hoy inpohondiyo mando kandin ki Pilato. ¹² To sooyjo no aldow, nigpaal-alokoyjoy on si Hirudis hoy si pilato no nahun-a nig uusig man kandan. ¹³ Hoy pigpaumow ni Pilato ka mo panguu to mo pari, ka mo agalon hoy ka mo otow. ¹⁴ Migkagiyan ni Pilato kandan, “Pigduma now dini to kanak soini no otow hoy migkagi kow no nigpalaag-laag to mo otow no pigsukit sukit ko kayi to tangkaan now di waro salo no nohimo rin no innangon now dini to kanak. ¹⁵ Si Hirudis wa mando salo no nakita rin so inpalibod man ipohondini kanta. Waro nahimo rin no og pabaybayjaran kandin hoy og himatayjan. ¹⁶ - ¹⁷ Tigbal ko kandin ogpabarasan hoy og lukaan on.” ¹⁸ Di nasi namangiyak ka mo otow, “Himatayji kandin! Si Barabas kag lukaan!” ¹⁹ (Si Barabas napiriso so iya ka kagubot no nayitabo diyo to siyudad, hoy so nakamatoy man to otow.) ²⁰ Kaliyag si Pilato nog lukaan si Hisus, di migkagi mando si Pilato dito to mo otow. ²¹ Di nigmangiyak kandan no nigtabak kandin, “Ilansang kandin to Kurus! Ilansang kandin to kurus!” ²² To igkatatulo ni Pilato to pogkagi diyo to mo otow, “Di nokoy naa ka salo to soini no otow? Waro nakita ko agad nokoy no salo no og pabaybajaran to kamatayjon soini no otow! Ogpabarasan ko kandin di og pa lukaan korod.” ²³ Di nasi nigmamangiyak to maagbot no si Hisus iglansang to kurus; Hoy to sikan nasagbukahan to mo otow kag kaliyagan dan, no og pabaybayjaran dan si Hisus. ²⁴ To sikan inbogoy ni Pilato to mo otow kag kaliyagan dan no og pabaybayjaran si Hisus. ²⁵ Hoy inlukaan din ka otow no in alam to mo otow, ka napuriso no nigsasamok hoy nangimatoy to mo otow, hoy indihal din on si Hisus to mo otow hoy kag kahimo ran on kag kaliyagan dan. ²⁶ Tagood nigdumaan dan si Hisus duon natagbo ran no otow no nigngaranan to Simun no nig-ugpo diyo to Sirini, no ogpohondiyo to siyudad ligkat to banika. Indakop dan sikan no otow hoy inpatiang to kurus hoy inpa-alundog ki Hisus. ²⁷ Duon hohon-ini no mo otow no nig mangalundog ki Hisus, no nigmangdalugmatoy kag maninugow tongod kandin. ²⁸ Hoy miglingi si Hisus kandan no migkagi, mo buyi to Hirusalim! Kona now og sinogawi’ Iyan now sinogawi ka kaugalingon now hoy ka mo anak. ²⁹ Su duon aldow nog manggagi ka mo otow, “Kampo ka mo buyi no konog manganak hoy ka mo buyi no waro maburos, hoy ka waro nakapasusu to mo bato! ³⁰ To sikan no timpu og mangagi ka mo otow diyo to mo gulangan, “Mga lunawi koy on, hoy diyu to mo bubungan, hoy ka ogkangabunbunan koy on. ³¹ Su ka soini no mo botang no pighimu rot malapung pad to kayju, nokoy buwa ko ogkanga gangu on. ³² Duon mando daruwa no kaotow no pigduma ran no mo talaghimatoy, no oghimatoy no duma ni Hisus. ³³ Naka uma kandan doot ugpaan no pigngaranan to “Ka kalabira” Inlansang dan to kurus si Hisus hoy ka daruwa no otow no talaghimatoy- ka sagboka diyo to kawanan din hoy ka dangub diyo to gibang din. ³⁴ Hoy migkagi si Hisus, Amoy pasaylowa kandan so waro kandan nataga to pigpanghimo ran. Hoy pigbalo ran ka kinabo ni Hisus. ³⁵ Nigmansasindog diyo ka mo otow no og mampitow, no tagood og liliyanliyana si Hisus in-alam to Magbabayjo. ³⁶ Agad ka mo sundalo og liliyan-liyan kandin, ningmangdalapak kandan hoy intarowoy dan ka inomon diyo ki Hisus oyjow ig poinom kandin. ³⁷ Hoy nigkagi, “Ko koykow ka hari to mo Hudiyu luwasa ka kaugalingon no! ³⁸ Ka duot to ampow to kurus insulatan duon to kandin soini ka hari to mo Hudiyu. ³⁹ - ⁴⁰ Ka dangub no talaghimatoy nigliyanliyan ki Hisus, no nigkagi, “Inato koykow man ka Misiyas? Luwasa ka kaugalingon no hoy kanami waro ka nahaldok to Diyus? Kani ki kontoon nabaybayjaran to iling do no salo. ⁴¹ Di ka insilot kanta olog taro so saloan ki di kandin waro salo. ⁴² Hoy migkagi kandin si Hisus, tantanori aro bag ko og hari kad! ⁴³ Nigkagi si Hisus kandin, kagiyan ko koykow, kuntoon no aldow duma kad kanak diyo to paraiso.” ⁴⁴ Tigbal naudto nasagkup on hoy nigdalukilop on ka kalibutan poiling to og alas tres. ⁴⁵ Hoy napuri ka in ulot diyo to timpulu. ⁴⁶ Hoy mangiyak si Hisus to maagbot, “Amoy igdihal kod to mo bulad no ka Ispiritu ko! No ponga rin tog kagi to soini namatoy kandin. ⁴⁷ Ka opisyal to mo sundalo nakakita to nayitabo, hoy indayjan din ka Diyus no nigkagi, tutu-u iyan no maroyjow kandin no otow! ⁴⁸ To pogkakita to nayitabo dot mo otow no niglilimudlimud diyu oyjow og pangpitow, nigmanguli kandan tibo no nig managpi to susulubon. ⁴⁹ Kaila tibo ni Hisus, agad ka mo buyi no nigsundul kandin ligkat to Galiliya no nigmansasindog diyot madmariyu oyjow ogpitow to nayitabo ki Hisus. ⁵⁰ - ⁵¹ Duon otow no pigngaranan to Husi no nig-ugpo to Arimatiya, no ugpoan to mo Hudiyu. Maroyjow hoy bantogan kandin no otow hoy nigtatagad to poghari to Diyus. Agad sakop kandin to labow no hukumanan to mo Hudiyu, waro kandin nig-uyjon dot inhimo ran ki Hisus. ⁵² ighondiyo si Husi ki Pilato oyjow og buyjoon dik ka lawa ni Hisus. ⁵³ Hoy in angoy rin ka lawa ni Hisus diyo to kurus hoy inputos din to hinabol, hoy intago din diyo to lubunganan no in lungag diyo to dalan no waro pad nasabali. ⁵⁴ Aldow sikan to pogpangandam to tinghimuloy. ⁵⁵ Ka mo buyi no nanundol ki Hisus ligkat pad to Galiliya nangduma ki Husi hoy nakita ran ka pigmuno si Hisus to lubong. ⁵⁶ Hoy nigmanguli kandan hoy pig-andam dan mo poomot hoy mo lana no inpamalugo ran to lawa ni Hisus. To sooyjo no aldow no tinghimuloy, nangimuloy kandan so insugu man to balaud.