¹ Si Hisus naka-uma on diyo to Hiriku hoy tagod to nigligad kandin. ² No diyo, duon sagboka no datu no inngaranan ki Sakiyu, no agalon to talagsukot to buhis. ³ No ogkaliyag nog makapitow ki Hisus, di waro kandin makapitow so amana mohon-in ka mo otow hoy malupot kandin. ⁴ Hoy nigpalagoy kandin no nighun-a hoy nigpamanoyik diyo to kayjo no ongngaranan to sikumuro oyjow ogpakakita kandin ki Hisus so diyo iyan kandin og bayjo. ⁵ To pog-uma on ni Hisus diyo, niglangag kandin hoy nigkagi, “Sakiyu, magaan ka ro luno! Luno kad so kinaanglan no diyo a kontoo’g datong to baloy no.” ⁶ Nig-agpas nigluno si Sakiyu hoy dakol no kaliyag no nigdawat ki Hisus. ⁷ Pogkapitow do to mo otow, nig am-amuung, “Soinin otowa nanumbaloy diyo to otow no makasasalo!” ⁸ Hoy nigsasindog si Sakiyu hoy nigkagi, “Magbabayjo, paminog ka! Igbugoy ko ka ikatunga diyo to mo makahiy-o hoy ko duon nalimbungan ko og ulian ko kandin to hop-at no lupi. ⁹ Si Hisus nigkagi kandin, “Soinin aldowa nig-uma to kaluwasan ka soinin baloy, so soinin otowa kabuwaran da-an ni Abraham. ¹⁰ So nighondini ka anak to otow oyjow to pogpamitow hoy pogluwas to nal-laag. ¹¹ To sikan no timpu magaan on ogpakauma si Hisus diyo to Hirusalim hoy nigsuman-suman ka mo otow no magaan on poko-uma ka poghari to Magbabayjo. ¹² Koy na-an nigkagi kandin, “Duon sagboka no talahuron no otow no nighipanow diyo to mariyu no banwa oyjow ogdawat to katongod to poghari diyo to banwa din hoy oglibod do kandin. ¹³ To waro pad kandin nigligkat, inpaumow din ka sampulu no suluguanon din hoy ka tagsagboka nigpamugayjan din to salapi no bulawan hoy nigkagiyan din kandan, ‘Paanaka now soini to kono pad ig-uli. ¹⁴ Di nahiubos kandin to mo otow to sooyjo no lunsod, sooyjo na-an nigsugo kandan to mo otow to ogpasundolon kandin diyo to inhundiyaan din hoy ogpakagiyon to kono kandan ogkaliyag to poghari kandin. ¹⁵ Di nayimo iyan kandin no Hari, hoy nig-uli on, hoy inpaumow rin on ka mo sulugu-anon no inpamogayjan din to salapi, oyjow ogkatagahan din ko pila ka Anak to salapi din diyo to kandan. ¹⁶ Ka ay an-ayjan nighondiyo hoy nigkagi, Agalon, nig-anak to sampulu no lupi kla salapi no inbugoy no kanak. ¹⁷ No nigkagi ka hari, ow maroyjow, maroyjow ka no sugu-anon tongod so ogkasaligan ka to doroisok do, ogbogayjan ko koykow to katongod no og dumalo t sampulu no siyudad. ¹⁸ Nighondiyo man do ka igkaruwa no sulugu-on hoy nigkagi, ‘Agalon, nig-anak to lalima no lupi ka salapi no inbugoy no kanak. ¹⁹ No nigkagi ka agalon kandin, ogbogayjan ko koykow to katongod no ogdumalo to lalimma no siyudad. ²⁰ Nokauma man do ka igkatulo no sugu-anon hoy nigkagi agalon soin dod ka salapi nu no inbugoy no kanak inbugsong ko soini to manggad. ²¹ So ogkahaldok a koykow. So mabbolot ka aman, ogkuwo ka to kono no koykow hoy og aani ka to waro no inpamula. ²² No nigkagi ka agalon diyo’t kandin. Maroot ka no sulugo-anon! Oggamiton ko ikow ka kaugalingon no inpangagi no, namaan ka man na-an to mabulot a hoy nigkuwo a to kono no kanak hoy nig-aani ato waro ko inpamula. ²³ Mani man to waro no ipaanak diyo to bangko ka salapi ko? Ogkadawat ko puron soin no duon anak to poglibod ko. ²⁴ Hoy nigkagiyan din ka mo otow no nigsasindog diyo puruta now ka salapi duon to kandin hoy ibugoy now diyo to nakasalapi to sampulu np lupi. ²⁵ Di nigkagiyan dan kandin, agalon duon on man salapi din no sampulu! ²⁶ No nigtabak kandin ognangonan ko kaniyo to sooyjo so duon kandin og puruton pad iyan. ²⁷ Di mayitongod to mo usig ko no kono ogkaliyag no oghari a kandan. Alapa now kandan hoy pangimatayji now kayi to tangkaan ku! ²⁸ Si Hisus nigkagi to soini hoy nigparayjon kandin diyo to Hirusalim hoy nighun-a kandin. ²⁹ To magaan on kandin to banwa to Bitpahi hoy to Bitanya no diyo to bubungan to olibu inpahondiyo ni Hisus ka daruwa no tinuonan din. ³⁰ Hoy intugonan hipanow kow on diyo to kahun-na-an no banwa hoy to pogpoko-uma now on duon og kapitow now ka nati to asno no in bagkosan hoy waro pad nauntori to agad huntow. Hukari now na-an saoin hoy alapa dini. ³¹ Ko duon og panginso kaniyo, mani to og ongkoran now sikan? Nanguni kandin inkinaanglan soini to Magbabayjo. ³² Hoy nighondiyo kandin, hoy napitow ran ka tibo sumalo iyan to inpangagi ni Hisus kandan. ³³ Tagood to’g hukaran dan to nati to asno, nanginso-an kandan do to kamunoy, “Hoy mani to og hukaran now sikan? ³⁴ No nigtabak kandan, “Inkinaanglan soini to Magbabayjo.” ³⁵ Hoy in-alap dan on ka asno diyo ki Hisus. Hoy inbunbunan dan ka bukobuko to asno hoy inpauntod on si Hisus. ³⁶ To nig-untod on si Hisus, inbulatan to mo otow to kinabo dan ka daan no ogbayjaan din. ³⁷ To ogtupang on kandan to bubungan to olibo no marani on To Hirusalim, nangaliyag-liyag ka tibo no tinuonan din hoy nigdayjan to Magbabayjo to maagbot no lagong tongod to mo koin-inuwan no nakita ran. ³⁸ Nigkagi kandan, “Ogdayjanon ka hari no inpohondini to Magbabayjo no Magbabayjo ta! Kaliyaganan diyo to langit hoy ogdayjanon ka Magbabayjo. ³⁹ Hoy duon mo parisiyu no diyo to kohon-inan no nigkagi ki Hisus, “Mag-aanad, sapari no ka mo tinuonan nu! ⁴⁰ No nigtabak si Hisus diyo to kandan, “Ognangonan ko kaniyo no ko ogmanhagtonng kandan, og mangiyak ka mo bato. ⁴¹ To ogpalinghinguma on si Hisus to Hirusalim hoy to napitow rin on soin nigsinogow on kandin. ⁴² No nigkagi, “Ko namaan apa poron kuntoon no aldow ko nokoy ka kinaanglan para to kalinaw! Di kuntoon kono ka’g makapitow to soini. ⁴³ So ogtirow ka mo aldow no og libongan ka to mo usig no hoy og atangan kow kandan to oglusod. ⁴⁴ Ogguguson dan ka siyudad now hoy og pangimatayjan ka mo otow no nan-ugpo diyo’t koykow, hoy waro sagboka no bato no ogkasamo diyo to nauntoran kayi, so waro now ilaa ka panahon to pogluwas poron to Magbabayjo kaniyo. ⁴⁵ Nigsulod si Hisus diyo to timplu hoy inpandugil din ka ogmanitinda. ⁴⁶ Hoy nigkagiyan kandan, “Nasulat on diyo to kasulatan, ka baloy ko og ngaranan to baloy no ampuanan; Di inhimo now soi no hulosanan to mo takaw-won! ⁴⁷ Tara aldow nigpanulo si Hisus diyo to timpulu ka mp agalon to mo pari, ka mo mag-aanad to balaod hoy ka mo pangulo to mo otow. Nigpamitow to paagi to oghimatoy kandin. ⁴⁸ Di waro kayimo ran so ka tibo no otow nigparayjon man nig maminog to tibo no inpangagi ni Hisus.