¹ Paminog kow ka mo datu, maninogow kow hoy pandalawit kow tongod to pogkalagow now no oghinguma kaniyu. ² Namowu on ka mo karatuan now hoy ka mo kinabo now nigpangotkot on to ipos. ³ Nigtaangon on ka mo bulawan now hoy ka mo salapi now, no sikan so taang dan ka ogpamalohot no makasasalo kow hoy sikan ka ogpakaroroot go lawha now iling to hapuy. Niglimud kow to mo karatuan now to katapusan no timpu. ⁴ Paminog kow! Ka mo otow no nighimu diyo to mo kamot now, no nigsalow-salow on no waro now bayari, hoy narinog to maroson no Magbobayjo ka pogsalow-salow to niggaani. ⁵ Maroyjow amani ka pog-ugpo now kayi to ampow to tano hoy nakuwa now ka tibo no igkaliyag now. Iling to inpalambog now ka mo lawha now tagana to aldow to pogpangimatoy kaniyu. ⁶ Inlogparan now hoy inhimatayjan now ka maturarong no otow, no waro nigsukul kandin. ⁷ Koy naan mo sulod, kono kow kapoloyi no ogtatagad taman to poglibod to Magbobayja. Pitawa now ka inhimu to talabasukan ko kon-u ogkagaani ka duroysawba no inpamula rin. Kono kandin ogkapolahan no ogtatagad ko kon-u og- uran. ⁸ Di kono kow kapolahi no ogtatagad kow su magaan on ka poglibod to Magbobayjo. ⁹ Mo sulod, kono kow amamulog oyjow kono kow oghukuman to Magbobayjo, su diyad on to gumawan to talaghukum. ¹⁰ Mo sulod, sumsumana now ka purupita no nigwaliwali to ngaran to Magbobayjo. Kagihi now sikandin no waro napoloyi no nig-antus to makabayjad. ¹¹ Paminog kow, og-isipon ta no maroyjow kandin su nakaantus man. Nakarinog kow on moyitongod to pog-antus ni Hub, hoy nataga kow on no ka inhimu sikandin to Magbobayjo to pogbulig, su hohoy-owan ka Magbobayjo hoy mabuligan. ¹² Labaw to tibo, mo sulod, kono kow kagi, “No ogpagonhibot to langit, hoy tano,” hoy to agad nokoy. Ko kono, kayo kow ro to “og-ujun” ko og-uyan kow, ko kono kayo kow ro to “kono” oyjow kono kow oghukuman to Magbobayjo. ¹³ Ko duon ogkakalisud duon to kaniyu, kinangdan no paampua now kandin, ko duon ogkoholo poulaginga now sikandin to mo ulagingon to pogsayo. ¹⁴ Ko duon ogkadaluwan duon to kaniyu, koilangan no og-umow kandin to igbuyag to nigpalintutuu oyjow og-ampu kandin hoy to pog-itis kandin to lana pinabayjo to ngaran to Magbobayjo. ¹⁵ Ka pog-ampu nu ogdumahan to pogpalintutuu, ogpakabawi to ogkadaluwan. No ka Magbobayjo ka ogpakauli kandin hoy ogpakapasaylu to mo salo din. ¹⁶ Di manangnangonoy kow to mo salo now hoy ampu kow to tagso-saboka oyjow ogkoulian kow. Su dakel ko ogkohimu to pog-ampu to otow no matarong. ¹⁷ Si Ilyas, otow rod iling kanta. Di nig-ampu sikandin ligkat to pusung din no kono poron og-uran, no waro iyan nokouran solod to tatolu no tuig hoy liwaro. ¹⁸ Nataman, nig-ampu mando sikandin no og uran, no nig-uran iyan hoy nanubu on ka mo pinamula. ¹⁹ Mo sulod ku, duon diyo to kaniyu no ogpakasuwoy to kamalogotan, hoy ka duon ogpakapalibod kandin, ²⁰ . koilangan no ogkataga kow no ka agad hontow no ogpakapalibod to makasasalo ligkat to maroot no hinimuwan din, kandin ka ogpakapangabang to gimukud to otow ligkat to kamatayon, hoy masalig ka mo salo no ogkapasaylu tongod kandin.