¹ Nokoy ba ka sinugdanan to kaniyu no nagoloban hoy mgo kasamuk? Kono ba tongod man to kaniyu nomaroot no mgo pogtinguwa no nigsamuk to kaniyu no huna-huna? ² Duon mgo botang no kaniyu no pigpandoy, di kono now ogkaangkon, di ogkoholo kow nogpamono to kaniyu no karumaan. Duon botang no noibogan now on iyan hoy ko kono now ogkaangkon ogpan-ongoy kow. Kono now soykan ogkaangkon tongod so waro kow man nig nigpamuyju to Magbobayjo. ³ Hoy ka pamuyju kow kono kow ogbogayjan su maroot man ka kaniyu no tood, ka mgo botang no kaniyu no pigbuyju iling do to mgo kaniyu no kaugalingon no kaholo. ⁴ Kono kow matinoowon to Magbobayjo iling kow to malitan no manlilibog. Waro kow nataga no ko ogpalabiyon now ka mgo botang kayi to kalibutan, usig now ka Magbobayjo? Koy naan inhimu now ka kaniyu no kaugalingon no usig to Magbobayjo ko igpalabi now ka mgo botang kayi to kalibutan. ⁵ Kono kow ogsuman-suman no waro pulus ka inkagi to kasulatan, duma to pogpanalikud inpanganduy to Diyus ka Ispiritu no impamuyju din kanta. ⁶ Di inkohid-uwan ki to Magbobayjo, iyan soykan no nigkagi ka kasulatan, insompo to Diyus ka mopohitas-on, di kohid-uwan din ka mapaagad-agaron. ⁷ Koy naan ogpasakup kow to Diyus, atowi now si satanas hoy igpariyu kandin kaniyu. ⁸ Parani kow to Diyus, hoy ka Diyus ogdani kaniyu, kaniyu no mgo makasasalo ogkinabuwi kow no mahinlu! Hoy kaniyu na maal-alangon, hinlui now ka kaniyu no mgo pusung. ⁹ Kangatalong kow sinogow kow amana tongod to kaniyu no mgo salo, anoy nog ngisi kow hoy karago, katalong hinoon. ¹⁰ Pogpoilub kow duon to Magbobayjo, hoy kandin kaniyu pabantogan. ¹¹ Mgo sulod, kono kow ogkagi hoy maroot batuk to matag sagboka, ka nigkagi to maroot batok to kandin no sulod, hoy nighukum kandin, nigkagi batok to kasuguan hoy nighukum daan soi so koykow ro ka nighukum to kasuguan, waro ka nigtuman to soi so koykow ro man ka nohimun maghuhukum. ¹² Di ka Diyus ka nigbogoy to kasuguan koy naan kandin do iyan ka maghuhukum, kandin do iyan ka makaluwas hoy pakasilut to otow, koy naan hontow ka man no oghukum to karumaan? ¹³ Paminog kow koddi, kaniyu no nigkagi kuntoon hoy asolom hondiyo koy to sagboka no siyudad, hoy diyo kanami nig-ugpa to songo tuig ogpaninda koy hoy oghimon hoy mohon-in ka salapi. ¹⁴ Ka tutuu, waro kow gani nataga no nokoy ka nohitabu kaniyu asolom, su ka kanta no kinabuwi angod do to gabun no napitow kuntoon, hoy to konog kalugoy ogkalalag. ¹⁵ Iyan hinuun soi ka aangay no igkagi ku igtugut to Magbobayjo, hoy buhi pad kanami iyan soi, hoy iyan soykan ka kanamin binuhatan. ¹⁶ Di kuntoon nigpaambog hinuun kow hoy nigparayjan ka tibo no mgo pogpaambog no iling to soykan maroot. ¹⁷ Ko natagaan to otow no nokoy ka maroyjow no aangay poron noghimuwon, di waro din soi himuwa nigpakasalo kandin.