¹ Kanak si Santiyagu ka inpooyjan to soini no sulat suguonon a to Diyus hoy to Magbobayjo no si Hisu-Kristu, ipangumusta a to mgo kristuwanon no nabolag-bolag to sampulu woy daruwa no Tribu no nokogsuwoy-suwoy kayi to ampow to tano. ² Mongo sulod ko, sumsumana now no mataa kampo kow ko agad no pogsulay ugmokouma diyo to kaniyu. ³ So nataga kow on no ka kaniyu no pogtuu nig-antihan do oyjow kaniyu og makaagowan kow to kalisoran. ⁴ Di aguwantaha now ka tibo no mongo pa-agow-agow so oyjow og katularong kow no waro ogkakulang diyo to kaniyu. ⁵ Ko duon diyo to kaniyu no kulang so pogsumansuman paboyjua no diyo to Diyus woy ogtalaran iyan kandin, ogbogayjan kandin to Diyus no kono og balibaron hoy hoy-owon kandin to tibo no otow. ⁶ Di poboyjua kandin duma to pogpalintutuu no konog duwa-ruwa. Sukag duwa-ruwa ogkoiling to lawa no agad hondoi og alapa to kalamag no diyo. ⁷ - ⁸ Ka otow nog duwa-ruwa konog makapaabut no dog kakuwo din diyo to Diyus su waro oghimuwon din no maroot to tibo ⁹ Kinangolan ogkoholo ka sulod ta no ayjo-ayjo, ko igpaampow on kandin to Diyus. ¹⁰ No ka mongo datu paparilalom on kandan to Diyus sug koiling kandin to kabukaran to hilamunon no og kongo ulod do. ¹¹ To pogsilo to moinit no aldow ogkagango on ka hilamunon hoy ogkaulod on ka kabukaran din, ogpokouma iyan ka aldow no og himatoy kandin. ¹² Koholo to otow no ogpakaantus to mo pog-olog-olog, su omun ko ogpakaantus sikandin, ogpakarawat sikandin to kuruna to umul no insaad to Magbobayjo to sooyo so oggoyinawa kandin. ¹³ Omun ko ogtintalon ka sagboka no otow, kono ogkaayun no ogkahi sikandin no ka a ka Magbobayjo kandin, su ka Magbobayjo, kono ma ogkatintal no oggimu to maddoot woy kono doma sikandin ogtintal to minsan hontow. ¹⁴ Di hoyro ogkabagla ka otow kog koibog kandin woy og koibog kandin to maroot no igkoibog din. ¹⁵ Ko ogtumanon din ka maroot no ogkoibog din ogmakasalo o kandin, omun naan kog pasamboy kandin to oghimu to maroot ogkamatoy iyan kandin. ¹⁶ Pinalanggo ku no mgo sulod, kono kow pagaw-woy. ¹⁷ Ka tibo no maroyjow woy malogot no gasa diyo ogparulug to dibabow diyo to Amoy no nigligkatan to kaawang kono ogkabalbalawan kandin so tongod su kono man noiling kandin to alung no ogkahalin-halin. ¹⁸ Sumalo to pogboboot din inhimu ki din no mongo anak din pinabayjo to tutuu to kandin no lalag, so oyjow ogkohimu ki no labow to tibo no inhimu din. ¹⁹ Bawbantaji now mongo pinalanggo ku no mgo sulod, ka matag sagboka kinangolan no maal da duon ogpaminog di kono maal og lalag way ogkabolu. ²⁰ So ka kabolu to otow ka og-uyjan to pogkatularong no igkaliyag to Diyus. ²¹ Di ongkori now ka tibo no maroot no himu woy batasan, hoy kinawaa now to mapariralomon ka lalag to Diyus no inpamula diyu to pusung now soini kag pakaluwas kaniyu. ²² Kono now ubati ka isip now pinabayjo to pogpaminog duo to lalag to Diyus, ko kono tumana now. ²³ Su ka agad hontow no ogpaminog duo to lalag din no kono ogtuman, ogkoiling to otow no nigpangispiyu. ²⁴ Ogkakita rin so kougalingon din dikog awo o kandin ogkalingow do kandin to langlanguwan din. ²⁵ Di ka otow no amana no ogbantoy to tutuu no balaud nog kaluwas no ogpasamboy kandin ogtuman hoy kono din oglingawan ka nigdinog din su nasi din oghimuwa, ogpanalanginan kandin to tibo. ²⁶ Ko duon sagboka no ogpatuutuu no olog on ka kandin no pogpakoy, di ko kono ogbantoy to nokoy ka ignangon din kono no tutuu ka pogpamakoy din, in ubatan din do ka sumansuman din. ²⁷ Iyan soini ka tutuu hoy maroyjow no pogpamakoy to Amoy no Diyus, to pogtamong to mongo ilu, hoy balu diyo to timpu no mokohihid-u kandan hoy ka pogbantoy no kono kandan ogkataguan to karoot kayi to kalibutan.