¹ Mo sulod ku, kaniyu no migpalintutuu to totolosi no Magbobayjo ta no si Hesu-Kristu, kinaanglan no ogpog-ilingon now to ogsagipo ka mo otow. ² Panunggiling ko duo otow no ogtambung to pogsimba now no migsisising to bulawan hoy totolosi ka ingkinabo din, no duo mando ogkaayjo-ayjo no ogtambung no migsaluub to dorooti no kinabo. ³ Mono naa ko iyan now ro ogsahipoon ka migkikinabo to maroyjow hoy ogpapinuuwon now diyo to matolos no pinuuwan, no ka ogkaayjo-ayjo ogpasasindogon now ro man do hoy ko ogpapinuuwon naa diyo to soog, ⁴ ogpakasalo kow on to pog-alam now to otow hoy to poghukum now puun to maroot no suman-suman now. ⁵ Paminog kow mo pinalanggo ku no mo sulod, in-alam to Magbobayjo ka ogkangaayju-ayju kayi to ampow to tano oyjow ogkohimu no moiyaman to pogpalintutuu hoy oyjow ogpokougpo to migharian to Magbobayjo no insaad din to tibo no oggoynawa kandin. ⁶ Di impoylawan now ka ogkaayjo-ayjo, hontow buwa ka ogkaayjo-ayjo kaniyu hoy ogsumbong kaniyu diyo to mo huwis? Iya sikan ka mo Datu no ogkaroon. ⁷ Kandan ka ogbaloybaloy to maroyjow no ngaran ni Hesu-Kristu no insabokaan ta. ⁸ Olog ka oghimuwon now ka ogtumanon now ka sikan no mo importanti no balaud no ogkakita diyo to kasulatan no mighononduo, “Goynawoi nu ka mo duma nu iling to poggoynawa nu to koykow mismu no pogkaotow.” ⁹ Di ko og-alamon now ro ka ogsagipoon now, ogpakasalo kow ro hoy ka balaud ka oghukum kaniyu isip nakasalo. ¹⁰ No ka agad hontow no ogtuman to intiru no balaud di ogpasuwoy to sagbuka ro, nakasuwoy on kandin to tibo. ¹¹ Hoy ka Magbobayjo no migkagi, “Kono ka panlibug,” migkagi man do, “Kono ka himatoy to otow,” ko waro ka nakapanlibug, di ko nokohimatoy ka, nakasuwoy kad on to balaud. ¹² Lalag kow hoy himu kow iling to mo otow no oghukuman to balaud no ogpakaluwas to otow. ¹³ To timpu to poghukum, kono ogkohoy-o ka Magbobayjo to sooyjo so waro pogkohoy-u diyo to duma, di ka duo pogkohoy-u ogpakaribabow pad iya to poghukum. ¹⁴ Mo sulod ku, nokoy iyan ka kalaru ko ogkagi ka sagbuka no otow to duo pogpalintutuu rin di kono ogkakita diyo to himu rin? Ogpakaluwas naan kandin ka pogpalintutuu rin no iling duon? ¹⁵ Kono iyan! Ipanggugud ko duon sulod now to popalintutuu no ogkoilingan to kinabo hoy kulang to pogkoon, ¹⁶ no duon sagboka kaniyu no ogkagi diyo to kandan, “Ogpanalanginan kow to Magbobayjo, no kikinabo kow hoy pangoon kow,” di ko waro now kandan bogayji to kinaanglan dan, nokoy naan ka kalaru duon? ¹⁷ Iling soini ka pogpalintutuu, kamatoy soini ko kono ogdumaan to maroyjow no himu. ¹⁸ Di ko duon ogkagi, “Duon pogpalintutuu, hoy kanak oghimu a to maroyjow,” soini ka igtabak ko duon, “Papitawa a to pogpalintutuu nu no kono ogdumaan to himu, hoy ogpapitawon ku koykow to kanak no pogpalintutuu pinabayjo to kanak no himu.” ¹⁹ Ogpalintutuu ka no sagboka ro ka Magbobayjo? Maroyjow! Di agad ka mo busow ogpalintutuu man do, ogpangolkolon pad iyan kandan to kaaldok. ²⁰ Ogbusawon ka! Kinaanglan pad man naan no ogpakanongnong ka to pogpalintutuu no kono ogdumaan to himu, waro kalaru? ²¹ To kabuybuyjagan ta no si Abraham, in-isip kandin to Magbobayjo no matarong tongod to maroyjow no himu rin to sikan no pogbogoy rin to anak din no si Isaak oyjow igpanubad. ²² Hoy amani no kalaru no ka pagpalintutuu rin, indumaan to himu, hoy namalogot ka pogpalintutuu rin pinabayjo to himu rin. ²³ Hoy natuman ka nasulat to kasulatan no mighondoon, “Migpalintutuu si Abraham to Magbobayjo, no tongod duon, in-isip kandin to Magbobayjo no matarong.” Sikan ka ogpuunan no ingngaranan kandin no sulod to Magbobayjo. ²⁴ Mono ka ogkakita now no og-isipon to Magbobayjo no matarong ka sagboka no otow pinabayjo to himu rin, kono no pinabayjo to pogpalintutuu. ²⁵ Iling do man diyo to ki Rahab no migbabaligyo to lawa rin. In-isip kandin to Magbobayjo na matarong pinabayjo to himu rin no pogtanggu to mo talag-iipat hoy to pogpopalagoy rin kandan diyo to loin no bayjaanan. ²⁶ Hoy ka otow no waro goynawa, kamatoy do dow ka pogpalintutuu nu no kono og dumaan to himu, ogkamatoy do.