¹ Duon kalibwasan ta tongod to intalaran ki ni Kristu to kalibwasan. Koy naan ka pakanokal kono kow ogka-uripon mando to balaud. ² Koddi, si Pablu, ogkagi a kaniyu no ko ogpaturi kow, soini ogpasabut no waro pulus ni Kristu diyo to kaniyu. ³ Ogdayjon a ogkagi diyu to kaniyu no ka ugpamaturi kinahangulan no ogtuman to tibo no balaud. ⁴ Kaniyu no nanamantaman no ogsumsumanon to Diyus no matularong pinabayjo to pogtuman to balaud nakabulag nasi ki Kristu hoy to grasya to Diyus. ⁵ Di iling kanta nu niglaum nu pinabayjo to Ispiritu, ka Diyus nigsuman-suman kanta no matularong tongod to pogtuu. ⁶ Su ko nasagbuka ki diyo ki Kristu Hisus, kono no koilangan ko naturi ki hoy ko waro. Iyan do koilangan nu ka pogtuu ta, ugkakita pinabayjo to goynawa ta. ⁷ Maroyjow on poron ka inhimu nuw! Hontow man ka nakapasuwoy kaniyu to pogtuman duon? ⁸ Kono no ka Diyus ka nakapa-suwoy kaniyu, su kandin ka mig-alam kaniyu oyjow ogtuu kow. ⁹ Sumalo to pigkagi ran, “Agad doisok do ka patulin, ugmakapatulin sikan to inluyang nu harina.’’ ¹⁰ Di migsalig a no diyo to pogkasagbuka ta to Magbobayjo, koddi iyan kag tuuhan now, no ka otow no migtalad kaniyu to kalibug, agad hontow pad kandin oglogparan to Diyus. ¹¹ Di mo sulod, ku tutuu iyan no nig-panulu a to kinahangulan no ogpaturi, maniyu man to inpabayjara a rod? Ko tutuu sikan, no ka inpanulu ku mahitongod to kuros ni Kristu kono poron ogkohimu no samuk. ¹² Aman naan soini no mo otow no nakapalibug kaniyu, kono do no ogpaturi su ogpakapun on poron! ¹³ Mo sulod, in-alam kow to Diyus oyjow ogpaka-angkon to kaluwasan. Di kono now himuwa ka kalibwasan now no pasangil oyjow ogkatuman ka igkaliyag to lawa now no makasasalo ko kono, pagbuligay kow poron nog ogkasagbuka kow. Duma to dakol no goynawa now. ¹⁴ Su ka tibo no balaud, natuman on pinabayjo to sagbuka no lalag, “Goynawoi nu ka duma no iling to poggoynawa nu to lawa nu.’’ ¹⁵ Di ko ogpalunglunggunoy kow iling to ayjam, bantoy kow no kono ogkarootan ka matagsagbuka kaniyu. ¹⁶ Soini ka iglalag ku kaniyu: paruma-ruma kow to Ispiritu oyjow kono kow ogpokohimu to igkaliyag to lawa now no makasasalo. ¹⁷ Su ka igkaliyag to lawa now no makasasalo no supak to igkaliyag to Ispiritu, hoy ka igkaliyag to Ispiritu supak to igkaliyag to lawa now no makasasalo. Waro nakog-uyjun soi daruwa, koy naan ka kono kow ogpokohimu to igkaliyag now poron noghimuwon. ¹⁸ Ko ka Ispiritu ka migkagi kaniyu, kono kow on ogkasakup to balaud. ¹⁹ Malomu no og-iloon ka hinimuwan to lawa no makasasalo: ogpahihilabotoy ka kono no mag-asawa, oghimu to malow-oy, maligsom hoy maroot no mo suman-suman. ²⁰ Ogsimba kandan to mo diyus-diyus hoy ogpamarang, ogdumut to duma, usig, talikuron, magaan ogkabolu, to pogpamikil, kahan-hanon, to pogsuwoy-suwoy, ²¹ iimo-on, polowubug, ugmaab-abiroy, woy duma pad no iling duon no ogpanghimuwon. Koy naan kagpatahanan ku kaniyu kuntoon anat to inhimu ko nahun-a: kono ogpoko-ugpo to diyo to inharian to Diyus. ²² Di ka Ispiritu nigtalad to poggoynawa to duma, pogkaholo, waro kasamuk, pog-antus, maroyjow to duma, mabinogayjon, ogkasaligan, ²³ mapadiralomon, hoy ogpakapugung to pogkootow din. Kono no supak to balaud ka anat to soini. ²⁴ Soini no nasakup on ni Kristu Hisus, inlansang dan on diyo to kurus ka lawa din no makasasalo hoy ka maroot no igkaliyag dan. ²⁵ Ka Ispiritu iyan nigtalad kanta to kinabuhi, koy naan ka igpahari ta mando ka Ispiritu dini to kanta no kinabuhi. ²⁶ Kinangolan no kono ki ogpagarol woy ogpangugut, hoy ogko-ima.