¹ Koy naan tongod to soin koddi si Pablu pinirisu ni Kristu Hisus tongod kaniyu no mo Hudiyu, no nig-ampu to Diyus. ² To waro pogduwa-ruwa nakarinog kow no ka Diyus nigbogoy koddi to soin to pogpanulu to kandin no garasya no para kaniyu. ³ Inpankagi hoy pigpapitow to Diyus koddi ka pigholos din sumalo to pigsulat kaniyu to marali. ⁴ Kog basahon now ka nakasulat ogkatagaan now ka pasabut to inholos ni Kristu. ⁵ Nahun-a waro soin inkagi diyo to mo otow di kuntoon pigpapitow on soin to Diyus pinabayjo to Ispiritu diyo to balaan no Apustulis hoy mo purupita. ⁶ Ka pigholos pinabayjo to batbaton to kono no mo Hudiyu, koiling to mo Hudiyu, makadawat daan to mo panalangin to Diyus. Mo buyin kandan to sagboka no lawa hoy makapaambit to saad to Diyus diyo ki Kristu Hisus. ⁷ Pighimu a no suguanon para to batbatonon tongod to loin-loin no gasa to Diyus no pigbogoy din koddi pinabayjo to gawum din. ⁸ Koddi no amanan makapadiralom to tibo no kaotawan to Diyus, pigbogayjan to Diyus no inpaumalag to soin pogpamatbat to maroyjow no lalag mayitongod to waro ogtamanan no bahandi ni Kristu diyo to kono no mo Hudiyu. ⁹ Hoy to pogkakita to tibo no otow to hinolos no palanu to Diyus. To nahun-a no panawon pigholos soin to Diyus no iyan nighimu to tibo no butang. ¹⁰ Oyjow ka simbaan ogkatagaan kuntoon to panguu hoy to gowmanan to kalangitan ka kaalam to Diyus no nigkaloin-loin no paagi ¹¹ pighimu soin to Diyus no nig-unog to tuud din to tibo no panawon no pigtuman din pinabayjo ki Kristu Hisus no Magbobayjo ta. ¹² Diyo to kandin mokohimu ki to kabulut hoy makatangko ki to Diyus pinabayjo to pogtuu kandin. ¹³ Koy naan kagholo a kaniyu: kono now awo-a ka poglaum ligkat to pog-antus tongod kaniyu so soin tibo para to karoyjowan now. ¹⁴ Koy naan ka tongod to soin nig-ampu a to Amoy ¹⁵ no iyan nigbogoy to tutuu no pigbogoy to kabuwaran diyo to langit hoy to tano. ¹⁶ Nigholo a to Diyus no tongod to karoyjow to himaya, parusunon din ka Ispirituhanung kinabuyi pinabayjo to Ispiritu din. ¹⁷ Og-ugpo poron si Kristu to pusung now pinabayjo to pogtuu oyjow ogpangugat hoy ogdoson ka pog-ulog. ¹⁸ Hoy ogduma to tibo no kootawan to Diyus, makaangkon kow to gawum to pogpasabut ko nokoy karakol to pogpalanggo ni Kristu. ¹⁹ Poron nogkataga kow to kono ogkatugkad ka pogpalanggo ni Kristu hoy to sikan ogkakinabuyi now ka batasan to Diyus. ²⁰ Dayjanon ta ka Diyus su ka gawum din dini to kanta hoy iyan ogmakabogoy to dakol pad to ogpamoyjuon hoy ogsuman-sumanon. ²¹ Dayjanon ta kandin diyo to simbaan hoy diyo ki Kristu Hisus diyo to tibo no kabuwaran hangtud to katamanan! Amin.