¹ No sikaniyu, namatoy kow o dongan to madoot no himu niyu hoy to mo salo niyu. ² In-ikul niyu dongan ka pogbobatasan to mo otow kayi to kalibutan. Intuman niyu ka agalon no iyan nigmandu to mo Ispiritu diyo to aw-awangan. Taman kuntoo, nigpabulus sikandin no nig-andal diyo to mo pusung to mo otow no nigsupak to Magbobayjo. ³ Sikanta dodma, tibo ta dongan no nokoiling kandan ka pogbobatasan hoy inhimu ta ka agad nokoy no madoot no igkaroyjow ta no oghimuwon. In-ikul ta ka madoot no igkaroyjow to mo lawa ta hoy ka madoot no ko suman-suman ta. No duon to pogko-otow ta, olog do iya no oglogparan ki to Magbobayjo, iling dodma to duma no mo otow. ⁴ Nokoy naan tongod to amana no dakol ka kohid-u to Magbobayjo hoy amana ki goynawoi nikandin. ⁵ in-oyjag ki dod nikandin duma ki Kristu agad namatoy kid o duon to madoot no hininang ta. Nokoy naa pinabayjo do iya to karoyjow hoy kohid-u to Magbobayjo no naluwas ki. ⁶ No tongod to pogsagboka ta diyo ki Kristu Hisus, in-oyjag ki to Magbobayjo hoy ipapinuu ki nikandin duma ki Kristu diyo to langit. ⁷ Inhimo to Magbobayjo soini oyjow igkapakita din to oghinguma no mo timpu ka amana no dakol no kohid-u din kanta hoy ka karoyjow din kanta pinabayjo ki Kristu Hisus. ⁸ So duon to karoyjow hoy kohid-u to Magbobayjo naluwas kow pinabayjo to pogpalintutuu niyu ki Kristu, no kono no duon sikan himuwan niyu su gasa do kaniyu to Magbobayjo. ⁹ Kono no duon to mo himu ta no inluwas ki Magbobayjo, nokoy naa waro otow no ogpahambug moytongod duo. ¹⁰ So ka Magbobayjo ka nigbalow-balow kanta pinabayjo to pogsagboka ta ki Kristu Hisus, oyjow ogkoymu ta ka maroyjow. No duon pad dongan in-andam o sikan to Magbobayjo no oghinangon ta. ¹¹ Na, sikaniyu so nootow no kono no mo Hudiyu, sumsumana niyu ko nokoy kow-a dongan, ingngaranan kow to “Luop” to soyjo so mo Hudiyu no nigpoila no “Natuli” tongod su duo inhimu dan diyo to lawa dan. ¹² Sumsumana niyu soyjo no timpu no waro kow pad nokoila ki Kristu, waro kow nasakup to koot-otawan to Magbobayjo hoy waro kow nakalagkos to mo kasabutan to Magbobayjo no insaad din diyo to kandan. Nig-ugpo kow kayi to ampow to tano no waro Magbobayjo hoy waro inparatong. ¹³ Nokoy naan kuntoo, duon to sagboka kow o ki Kristu, sikaniyu so madiyu dongan to Magbobayjo, kuntoo nakaparani o diyo to kandin pinabayjo to langosa ni Kristu. ¹⁴ So si Kristu ka ogpog-uli to maroyjow no goynawa ta hoy iyan nigsagboka kanta to mo Hudiyu to soyjo so nokoiling to olotanan no iyan nakapogsuwoy kandan. ¹⁵ No duon to pogpoymatoy din, in-awo din o kayi to kanta ka katongod to balaud to mo Hudiyu no duo kalibutan to mo sugu hoy to soyjo so igpangkono. Inhimu din ka iling duo so oyjow ogsabuon din ka daruwa no punduk hoy oyjow ogkasowoy o sikandan. ¹⁶ No kuntoo, pinabayjo to kamatayon ni Kristu diyo to krus, nokoiling to sagboka naan do no lawa soyjo so daruwa no punduk hoy inpog-uli ki nikandin diyo to Magbobayjo. No duon dutu, naawo o ka kasamuk ta. ¹⁷ Nighondini sikandin hoy nigpanggugud to maroyjow no panugtulon moytongod to pog-ulioy to maroyjow no goynawa duo to kaniyu to kono no mo Hudiyu no madiyu to Magbobayjo hoy diyo dodma to soyjo so mo Hudiyu no marani kandin. ¹⁸ No pinabayjo ki Kristu, warad o tapid kanta to mo Hudiyu ka ogpakaparani to Amoy pinabayjo to sagboka no Ispiritu. ¹⁹ Sikan naa, sikaniyu so kono no mo lomalaag hoy magaliyug, ko kono, mahingod kow o duma to koot-otawan to Magbobayjo hoy sakup kow o dodma to pamilya din. ²⁰ Sikaniyu ka ogpokoiling to baloy, no iyan pos-ok ka mo apustulis hoy ka mo purupita, no ka batu no pabunsuran to baloy, iyan sikan si Kristu Hisus. ²¹ No pinabayjo kandin ogmokogsumpul ka tagso baad to baloy, hoy ogkoymu no matolos no timplu to Magbobayjo. ²² No duon so nasagboka kow o ki Kristu, duma kow o dodma to soini so oghimuwon no baloy to Magbobayjo no in-ugpaan to Ispiritu din.