¹ Ligkat ki Pablu, apustulis Kristu Hisus pinabayjo to pogbuut to Magbobayjo, ogpangumusta a to koot-otawan to Magbobayjo duo to Ipisu no nigpalintutuu ki Kristu Hisus. ² Ka kohoy-u hoy karoyjow no nigpuun to Magbobayjo no Amoy ta hoy to Magbobayjo no si Hisu-Kristu, ogkaangkon now. ³ Ogsayjoon ta ka Magbobayjo hoy Amoy to Magbobayjo no si Hisu-Kristu. Tongod to pogsagboka ta diyo ki Kristu, inpanalanginan ki kandin to tibo no Ispirituwanon no panalangin no diyo to langit. ⁴ To waro pad nohimu ka ingod, in-alam kid to Magbobayjo no ogkasagboka diyo ki Kristu oyjow ogkohimu no maroyjow hoy waro mo salo ta diyo to tangkaan din. ⁵ Tongod to goynawa to Magbobayjo kanta, punga rin on palanuwa sumalo to igkaroyjow hoy to pogbuut din no ogkohimu ki no anak din pinabayjo ki Hisu-Kristu. ⁶ Mono naa ka ogsayjoon ta ka Magbobayjo tongod to maroyjow amana ka kaliyag hoy kohoy-u rin no inbogoy to waro duwa-ruwa kayi to kanta pinabayjo to anak din no niggoynawaan din. ⁷ Hoy pinabayjo to langosa ni Kristu, nalokat kid on to pogkauripon ta to salo hoy napasaylu on ka mo salo ta. Mono naan ka dakol iyan ka kohoy-u to Magbobayjo ⁸ no inbogoy kanta to waro pogkanugun inbogayjan ki to dakol no kaalam hoy katuonan ⁹ oyjow ogkatagahan ta ka nokoholos no palanu no igkaroyjow to oghimu pinabayjo ki Kristu. ¹⁰ Soini ka palanu rin to poghinguma to panawon, ogsagbokahon din ka tibo no inhimu din diyo to langit hoy kani to tano dow igpasakup din ki Kristu. ¹¹ Oghimuwon to Magbobayjo ka tibo sumalo to inpanulu rin hoy pogbuut din no ligkat pad nohun-a, inpili kid o kandin no ogkohimu no koot-otawan din pinabayjo to pogsagboka ta diyo ki Kristu. ¹² Iyan katuyuan to Manama, no kanta ka an-anayjan no nigsalig ki Kristu, nogsayjo to himaya din. ¹³ Dow soi man do ka nig-uma kaniyu, to pogkarinog now to tinuud no batbaton to maroyjow no binatbat no nigbogoy kaniyu to kaluwasan nigtuu kow ki Kristu, hoy inbogayjan kow on to Magbobayjo to panisingan no insaad din no kaniyu mo koot-otawan din on. ¹⁴ Ka Ispiritu iya ka pasalig nogkarawat ta iyan ka inpanaad to Diyus poiling tog karawat tad ka kanta no kagawasan. Sayjoon ta ka kandin no karoyjow! ¹⁵ Tongod to soini, ligkat to narinog ko mahitongod to kaniyu no pogtuu to Magbobayjo no si Hisus dow to kaniyu no goynawa to tibo no mo otow to Diyus, ¹⁶ waro a nighimoloy to pogpasalamat to Diyus tongod kaniyu, insuman-suman ku kaniyu to mo pog-ampu ku. ¹⁷ Dow nighangyu a to Diyus to Magbobayjo no si Hisu-Kristu, ka gohomanon no Amoy no bugayjan kow poron to kaalam dow pogkataga to mo inlalag oyjow kaniyu ogmokoila kandin. ¹⁸ Nighangyu aman do nogkaawangan poron ka suman-suman now oyjow ogkataga kow ko nokoy ka inpatonguran to soini no inpili din, hoy oyjow ogpakataga kow man do ko mono karakol ka insaad din to mo koot-otawan din. ¹⁹ Og-ampu a man do no ogkatagahan now ka karoson to gohom din kayi to kanta no pogtuu. ²⁰ Ka inggamit din to pog-uyjag ki Kristu hoy ka pogpapinnuu kandin diyo to kakawanan din diyo to langit. ²¹ Diyo niglabow si Kristu to talagmandu, to tibo no duo katongod hoy gohom diyo to kaaw-awangan hoy kayi to ampow to tano. Labow iyan kandin to tibo kono to kuntoon no panawun ko kono ka og-uma pad. ²² Hoy inparilalom to Magbobayjo to katongod ni Kristu ka tibo, hoy inhimu kandin no panguu to nigtuu to inggad pad nokoy. ²³ Ka simbahan iya lawa ni Kristu, no nigtuu to tibo no butang inggad pad nokoy.