¹ To katamahan mo sulod, ampui a now. I ampu no ka batbatonon to Magbabayjo ogtangkap dayjun inat noyitabu to kaniyu. ² I ampu now mando no ogpangabangan koy to Diyus puun to makasasalo hoy madoot no mo otow su kono man no tibo no otow duon pogtuu. ³ Di matinumanon ka Magbabayjo. Oglig–onon kow kandin hoy ogbantayjan koy ligkat to karootan. ⁴ Moyitongod kaniyu, nigsalig koy to Magbabayjo no kaniyu nigimo hoy parayjun no nigiyimu to insugu ku kaniyu. ⁵ Poron no ka Magbabayjo nig anak to pusung diyo to goyinawa to Diyus hoy to pog–antus ni Kiristu. ⁶ No kuntoon mo sulod, ogsugu koy kaniyu pinabayjo to ngaran to Magbabayjo no si Hisu–Kiristu, no nigpariyu kow to agad hontow no mo solod ta no mo pohulono waro nig–ikul to batasan no inpanulu niyu. ⁷ Su natagaan now no angayjan kow no og–ikul kanami. Waro koy nigpupugul to diyo koy pad to kaniyu. ⁸ Waro koy nigdawat to ogkakoon no ogpuun to agad hontow ka waro doy pigbayjaran. Nigmanokal koy to oghimu to maaldow hoy marusilum oyjow kono ogkagiyimu ka agad hontow kaniyu. ⁹ Piggimu doy soin, kono no tongod to waro katongod to pogpamuyju to suhu kun kono oyjow oggimu koy no tamanan. ¹⁰ Su tagood to duma koy pad kaniyu, Pigkagiyan ku kaniyu, "Kono now pakoona ka kono ogtalabahu." ¹¹ Piglalag doy soin tongod su nakarinog koy no duon kun duma now no mo nigpopogul hoy waro din pigiyo ko kono to pogpongilabut to giyimu to duma. ¹² Koynaan, to ngaran to Magbabayjo no si Hisu–Kiristu, nigsugu koy hoy ogpatahanan to soin mo otow no kinangolan no og–ugpu to malinawon hoy ogtalabahu para to kougalingon panginabuwi. ¹³ Mo sulod, kono kow papogul–ougul to poggiyimu to maroyjow. ¹⁴ Ko duon kono og–ikul to pigsugu doy pinabayjo to soin sulat, tantanuri now kandin hoy kono now paduma–dumahi kandin oyjow ogkoyilow kandin isip duma now to pogtuu. ¹⁵ Koy naan kono niyu sumsumana no usig niyu sikandin, ko kono, panpanayi niyu sikandin isip sulod niyu to pogpalintutuu. ¹⁶ No ka Magbabayjo no ogkaholo to inbogoy kaniyu to karoyjawan to tibo no timpu hoy to agad nokoy no paagi ka Magbabayjo ka ogduma kaniyu tibo. ¹⁷ No kuntoon, kanak si Pablu, ka nig–unoy nigsulat to tibo no mo sulat ku. ¹⁸ Ka garasya to Magbabayjo ta no si Hisu–Kiristu ogduma kaniyu tibo.