¹ Kuntoon, mo sulod, moyitongod to puglibod to Magbabayjo ta no si Hisu–Kiristu hoy ka poglibulung to pogduma ta kandin, ogholo koy kaniyu. ² No kono kow kalibog hoy katalung ko duon ogkagi no mo otow to mig–umaun ka Magbabayjo. Agad ko ogkapabayjo kono ki pad kandan no impanlalag ku soini to Ispiritu woy ko narinog dan naan, hoy ko sulat naa no dini kun nigligkat to kanami. ³ Agad nokoy no pabayjo kono kow pailad agad hontow. Su kono og–inguma ka sikan no aldow ko kono pad ogkohitabu ka katapusan no pogpakig–usig to Diyus hoy kono pad ogpokouma ka busawon no otow no in–andam diyo to Impirnu. ⁴ Og–usigan din ka og–ilohon to mo otow no mo Diyus dan hoy ka tibo no ogsimboon dan hoy ogpoila no kandin ka labow to soin no ogsimboon dan. No ogpinnuu kandin diyo to timpulu to Diyus hoy og–angkon no kandin ka Diyus. ⁵ Waro niyu nasumansuman ka inkagihan kud kaniyu to soin tibo to aldow no duma ku pad kaniyu? ⁶ Di duon nibalabag to soin tibu oyjow kono ogkohitabu kuntoon, hoy nataga kow to soin. ⁷ To soin no timpu, nigwoil o to holos pad ka goom din to poggimu to maroo kayi to kalibutan, asal duon pad iya sika so nakabalabag kuntoon. Sikan naa, ko ogpaawoon o sika so nakabalabag. ⁸ Dayjon ka busawon no otow oghondini hoy oghimatayjan kandin to Magbabayjo no si Hisus pinabayjo to hiyup hoy to kasilang din. ⁹ Ka busawon no otow oghondini no duon gawon ni Tanas hoy oghimu to tibu no mo koin inuwan. ¹⁰ Oggamitun din ka agad nokoy no kalasi to maroot oyjow ogkaubaton ka mo otow no ogpokohondiyo diyo on to karorootan no ogpokoluwas kandan. ¹¹ Tongod to soin, inhimu to Diyus no ogkaubatan kandan hoy ogtuu to ubat. ¹² Oyjow ogkalogparan ka tibo no waro migtuu to kamatuuran su nigpatuyjang no oghimu to salu. ¹³ Mo sulod no iggoyinawaan to Magbabayjo, kinangolan no layjun koy ogpasalamat to Magbabayjo moyitongod kaniyu. Su in alam kow to Diyus oyjow iyan ogkahun–a no ogkaluwas pinabayjo to goom to Ispiritu hoy pinabayjo to pogtuu now to kamatuuran oyjow ogkohimu kow no balaan no mo koot–otawan to Diyus. ¹⁴ Soin ka oglikatan nu in alam kow kandin pinabayjo to moupiya nu Nangnangonon no impanggugud noy kaniyu, su oyjow ogkatalaran kow to katolosan to Magbabayjo ta no si Hisu–Kiristu. ¹⁵ Koy naan, mo sulod, ampingi ka mo kamatuuran no inpanulu noy kaniyu, pinabaylo to lalag hoy to sulat. ¹⁶ No poron, no ka Magbabayjo ta no si Hisu Kiristu hoy ka Diyus nu Amoy ta no dakol to goyinawa kanta hoy nigtalad kanta to aral no waro ogtamanan hoy maroyjow no dansug pinabayjo to garasya din. ¹⁷ Ogdaral hoy ogbalad to kunusun kaniyu to poghimu hoy to pogkagi to tibo no moupiya.