¹ Kanak si Pablu, duma si Silas hoy si Timutiyu nangumusta kaniyu no mo tumutuu duon to Tisalunika, kaniyu no nasagboka to kanta no Diyus no Amoy hoy ki Hisu–Kiristu no Magbabayjo. ² Poron no ogkarawat niyu ko garasya hoy kaawang ligkat to Diyus no Amoy hoy ki Hisu–Kiristu no Magbabayjo. ³ Mo sulod ki Kiristu, nigpasalamat koy kanunoy to Diyus tongod kaniyu. Hoy litos iyan no ogpasalamat koy kanunoy kandin, su natimulan ka kaniyu no pogtuu ki Kiristu hoy ka kaniyu no poggonanawaay to matag–sagboka. ⁴ Inpamatbat noy kandan no in–antus no ka agad nokoy no pogliyan–liyan hoy kalisod, hoy niparayjon kow to pogtuu niyu. ⁵ Soin ka pamatuud no matularong ka poghukum to Diyus, tongod su ka kaniyu no pog–antus tongod oyjow to kandin no gingharian oghimuwon din no pogpamatuud no kaniyu litos iyan no ogsolod to gingharian din. ⁶ Su ko nokoy ka natularong iyan ka oghimuwon to Diyus. Ogpaantuson din ka nigpaantus kaniyu. ⁷ Hoy kaniyu no nig–antus ogpahimoloyon rin duma kanak. Ogkohitabu soin to poglibod ni Hisus nu Magbabayjo ligkat to langit duma to mo gamhanan nu mo diwata. ⁸ To kandin nu palibos duon nigkalab–kalab no hapuy, hoy inlogparan din ka mo otow no waro nig–ila to Diyus hoy waro nigtuman to Maroyjow nu lalagon moyitongod to kanta nu Magbabayjo no si Hisus. ⁹ Logparan kandan to waro katammanan hoy igpariyu to Magbabayjo hoy kono dan on makakita ka kabulungan no gohom. ¹⁰ Soin ogkoyitabu to aldow no og–uma ka Magbabayjo. Hoy ogdayjanon si Hisus to mo otow rin no iyan nigtuu kandin. Kaniyu ogkaruma kow kandin, su nigtuu ko man to lalag to Diyus nu inpanlalag noy kaniyu. ¹¹ Iyan in ka hinungdan no og–ampu koy kanunoy kanyo. In ampo doy to Diyus no ogboligan kow kandin no kohimu no litos iling no mo in umow din. Hoy in–ampu noy no pinabayjo to gohom din ogkohimu no ka tibo no maroyjow no ogkaliyagan no oghimu tongod to kaniyu no pogtuu kandin. ¹² Su pinabayjo to soin, ogkadayjanon ka kanta no Magbabayjo tongod kaniyu, hoy kaniyu ogkadayjon tongod kandin soin ogkohitabu tongod to kohoy–u to kanta nu Diyus hoy ki Hisu–Kiristu no Magbabayjo.