¹ Su nakanongnong ki no omun ko ogkagugos on ka pinaysag no in ogpaan ta kayi to ampow to tano, no iyan sikan solawba ta, duon dod ogpougpaan to Magbabayjo kanta diyu to langit, sikan so waro ugtamanan nolawba no innimo to Magbabayjo para kanta, no kono no himimuwan to otow. ² Kontuon, ogkawangalan ki tungud so amani ki ogkaliyag no ogkabalbalawon on ka lawbata ta. ³ Su oyjow ka igsaluob tad ka sikan no lawba no diyu to langit, konad on ogkakita no nigpalawas dod ka gimukod ta. ⁴ Taguod to kayi ki pad kontion nig ugpo to soini no lawba. Ogpakaagulo ki pad iyan to pag-antos ta. Di konu no iyan ka igpasabut duon no muno ogkaliyag kid on no og-awo to lawba ta kayi to ampaw to tano, ko konu, ogkaliyag on ogkasaluoban to lawba no ligkat to langit, su oyjow soini so lawba no ogkamatoy pad og kaliwbanan on to lawba no konad iyan ogkamatay. ⁵ Ka Magbabayjo ka nig-andam kanta oyjow ogkarawbat ta ka soini so bag-o no lawba, hoy inbogayan ki nikandin to Ispiritu isip palino-uwan no ogtoman din iyan sikan. ⁶ Koy naan ka waro nig pasalig nataga ki no taguod no kayi ki pad to soini no lawba, waro ki pad naan diyo to Magbabayjo. ⁷ Su ka pog ugpo ta kuntoon pinabayjo pad to pogpalintutuo, kono no pinabayjo ko nokoy ka og kitaan ta. ⁸ Waro ki nigpasalig agad ka ogkaliyag kid on poran no og ogkud to soini no lawba hoy og ugpo on duma to Magbabayjo. ⁹ Su agad ko kayi ki pad to ampow to tano hoy ka diyad on to langit, ogkaliyag ki no ogkohulo kanta. ¹⁰ Kinagulan no og tagkoki tibo diyo ki Kristu oyjow oghukoman din no ka tagsagboka, ogpakarawbat to ilig kandin sumalo to hinimo rin kayi to ampow to tano, maroyjow man hoy maroot. ¹¹ Su tungud su duon kahaldok noy to Magbabayjo inpogus noy ka mo otow nog palintutuu. Nataga ka Diyus no maroyjow iyan ka tu-od noy, hoy iman-iman koy no nakanongnong kow rod iyan duon. ¹² No kono no inlalag ku soini ogdayjon koy, kona ogbugayjon noy ro sikaniyo to ligkatan no ogdayjon koy ni kaniyo, su oyjow ogpakatabak kow to souri iyan do kag dayjon nokoy ka ogkakita diyo to otow, kono no sikan ka diyo to posung din. ¹³ Umon ka duon ogkagi no hunduon koy to langung, inbalabad do duon tungud su ka tibo nog himuwon noy para sikan to Magbabayjo no umon ka duon man on ogkagi no mahitungud to suman suman noy, sikaniyo mismo ka nataga no para kaniyo ka himo noy. ¹⁴ Su tungud to goynawa ni Kristu kanami, warad on lain no ogkuyimu noy gawas to pogtuman kandin. Su nataga koy no namatoy si Kristu para to tibo. Kay naan, nakailing do to namatoy on agad ka tibo no otow. ¹⁵ Iyan ogpasabot duon no namatay kandin para to tibo no otow oyjow ka mo otow nouyjag pad, konad-on no iyan pad og-ikulan ka igkaliyag ran ka kono sikan on so ogkaliyag to sikan so namatoy hoy no uyag para kandin. ¹⁶ Di ligkat kuntuun kono koy on ogpaunangon to duma no otow iling to innimu to kono ogpalintutuu to Magbabayjo. Dungan, iling duon ka pog sumit-sumit noy ki Kristu, di konad on no ilingduon kanta. ¹⁷ Di agad hontow no nasakboka on diyo ki Kristu, inbalbalawan on kandin to Magbabayjon. Naawo on ka tapoy no pogku otow rin, hoy nighingumaan ka bag-o. ¹⁸ Ka Magbabayjo ka nighigugma to soini su tibo, hoy sikandin ka inpog-uli to maroyjow no goynawa ta diyo to kandin pinabayjo ki Kristu. Inbagayan koy to Magbabayjo to hinimu to pog-uli to maroyjow no goynawa to mo otow diyo to kandin. ¹⁹ Iyan noy igpasabut no ogpag-ulian to Magbabayjo ka maroyjow no goynawa to tibo no otow diyo to kandin pinabayjo ki Kristu, hoy kono din on ogsumsumanon ka salo din. Sikan ka insalig ta Magbabayjo kanami no gugoron no igpapanlalag. ²⁰ Di sikanami ka inpaalap ni Kristu, hoy nokuiling do to ogpakiglalag mismu ka Magbabayjo pinabayjo kanami. No oghangyu koy kaniyo isip ki Kristu no poghangyu no pog ulian now ka marayjow no goynawwa to Magbabayjo. ²¹ Waro salo ni Kristu, di sikandin ka nigpaparusahan to Magbabayjo tungud to mo salu ta, su oyjow to pogsaboka ta ki Kristu og isipon ta no Magbabayjo no matularong.