¹ Atok nigsuman-suman kow nu indayjan noy un ka kougalingon doy. Kono koy nu iling to duma nu nigkinangulan pad to mo sulat to pogpoila oyjow dawaton now hoy ug pamoyjo a kaniyo to loin sulat to pogpoila oyjow ug dawaton kandan to loin ingod. ² Waro koy nigkinangulan to mo sulat to pogpoila, su kaniyo ka sulat nu nangutob to pusong noy. Tungud su ka nu pogkinabuyi iling to sulat nu ugkakita hoy ug ka basa to tibo. ³ Kalaro nu kaniyo anat to sulatan ni Kristu nu in pasulat pinabayjo kanami. Ka in gamit to pogsulat kono nu gitow ko kono ka Ispiritu to Diyus nu oyjag, hoy waro daan soin nasulat to mo bato nu sulatanan ko kono diyu to pusung nu. ⁴ Ugmakakagi koy to soin tungud to inhimo ni Kristu pinabayjo kanami hoy tungud to pogsalig doy to Diyus. ⁵ Su ka kanami ruw kono koy ugmokohimo to iling duon, di inbuligan koy to Diyus. ⁶ Kandin ka nigtalad kanami to ulog nu katuonan oyjow ig kalalag doy ka inhimo rin oyjow ug makarani ki kandin. Ka soin nu kasabotan kono pinabayjo to insulat nu kasugoan ko kono pinabayjo to Ispiritu Santo. Su ka kasugoan nig-alap    to lugpad nu kamatayjon. Di ka Ispiritu Santo nig talad to kinabuhi nu waro katammanan. ⁷ To pagtalad to Diyus ki Muwisis to kasugoan nu insulat rin to mo bato ka mo Isralinhon kono ug makatungtong to lawlangowan ni Muwisis su nasilang kandan. (Di ka kalayjag to lawlangowan din nananoy-nawoy tog kawaro.) Kuntoon ko ka Diyus nigpakita to gohom din to kasugo-an nu ug alap to kamatayjon. ⁸ Labow pad    to soin ka igpapitow rin nu gohom ku ka Ispiritu Santo un ka ogwoil. ⁹ Su kow inpapitow to Diyus ka gohom rin to pogtalad to kasugoan din nig-alap to lugpad, kono buwa nu labow pad ka inpapitow nu gohom ko ugsumsuman din ko matularong ka otow? ¹⁰ Ka tutuo, ka gohom to kasugoan nuon-a waro og mokoiling to gohom to soin bag-o nu pamaagi. ¹¹ Su ko duon gohom nu inpakita ka Diyus to sooyjow nu kasugoan nu lumiligad do, labow pad ka gohom nu igpakita rin to soin bag-o    nu pamaagi nu kono ug kaawo hangtud to katapusan. ¹² Su tungud to iyan soin ka in-imanan doy, waro kahaldok to pogpanggugud to lalag to Diyus. ¹³ Kono koy nu anat ki Muwisis nu nigbunbun to lawlangowan din oyjow kono ogkakita to iling din nu mo Israelinhon ka nanoy-nanoy to pogkawaro to kalayjag to lawlangowan din. ¹⁴ Waro makasabot ka mo Israelinhon ku nukoy ka kohulugan to sooyjow su inbunbunan to sumsumanan dan. Hoy agad kuntuon duon inbunbunan to sumsumanan dan ku ugbasahon dan ka katahan nu kasabotan. Su waro dan masaboti nu ku duon kid-u ki Kristu, ka tahan nu pamaagi na awwo un. ¹⁵ Awo iyan, agad kuntoon ku ugbasa kandan to mo sinulat ni Muwisis kono iyan kandan ug makasabot su duon nakabunbun to sumsumanan dan. ¹⁶ Di sikan nakabunbun ug ka awwoo ko otow ug dani to Magbabayjo. ¹⁷ Kuntoon, ka inkaagi kayi nu Magbabayjo iyan ka Ispiritu Santo, nu ko ka Ispiritu to Magbabayjo iyan duon to otow, konod kandin og katalugon. ¹⁸ Hoy tungud su waro un nakabunbun to kanta nu sumsumanan ugkakita tad ka gohom to kanta nu Magbabayjo. Hoy soin nu gohom nu ligkat to Magbabayjo, nu iyan ka Ispiritu Santo, nigparayjon to pogbag-o kanta oyjow to ogkoili kid kandin.