¹ Awyan, dumolod kanak se sebad sidekey ke anghel nga nengibing te menge lipong. Minikagi sikandin, “Niyas ipekita ko kamno kan mennonen se pegpelumun de inila nga baye nga egpemeligya te kandin dengeg, nga doton neke-onsad te dakel wayeg. ² Limayog kandin se menge hari te keneyonan pine-okit te pegtondog te pegtondog te kandin pegtolon’an nga tomalag keda’tan.” ³ Awyan, igtolosan a te Espiritu Santo, aw igpeibing a te anghel te kemingawan. Doton doen a kinita nga baye neke sakay te mellag nga men’nanap pito se olo te men’nanap aw semopolo se kandin songay, aw lokop te kandin lawa dowa nekesolat nga menge ngadan nga egbaet te Timanem. ⁴ Sen baye migsool te pengalapeng mellagen aw mehalon. Migsoot heman sikandin te bolawan, mehalon nga bato aw menge perlas, doen sikandin inewidan nga tasa nga bolawan nga peno te medaet aw melipa nga menge kedu’nan nga pongo te kandin pegkiglayog. ⁵ Doen nekesolat nga ngadan kidoen te kandin angas nga doen ineles nga kedegdagan. Yan ini se nekesolat, “Sen bentogan nga siyudan te Babilonia nga yan se inay te kelehat nga egpemeligya te kandan dengeg aw inay heman te kelahat keda’tan te lokop keneyonan.” ⁶ Aw kinita ko neman nga nehobog sikandin te dipanog te otaw te Timanem nga kandin igmetayan tepad te kandan pegtondog ki Jesus. Nepela a onto te pegkekita ko kandin. ⁷ Meneng minikagi se anghel kanak, “Ika egkepela, indanan ko sikamno te ineles nga kedegdagan te baye apil sen men’nanap nga kandin igsekayan nga doen pito ke olo aw sempolo ke songay. ⁸ Se men’nanap nga kamno kinita antay gebii, meneng siini matay den. Agpel den sikandin lomwa lekat te kinahiladman te tana. Meneng peglowa din degdagen sikandin. Kitaen sikandin te menge otaw te keneyonan kansang menge ngadan weda kelistu kidoen te libro nga iglistahan te menge neketig-apo te pedowan nga wedad Timanem. Sini nga libro nepenga den tapay te weda matoga se keneyonan, awkon kitaen dan se men’nanap, mepela dan onto, tepad kay kedengan antay, aw nematay meneng neantay hemn. ⁹ Keilangan onto se ketaga amon metebetan kon eden se kedegdegan nini. Sen pito ke olo yan se pito ko bontod nga inonsadan te baye. Aw siini migkehologan heman te ke hari. ¹⁰ Se lima te pito ke hari nematay den, sen sebael neghari pa siini, aw sen sebad weda pa dateng. Kon domateng den sikandin, eked den sikandin apet kenamatay. ¹¹ Sen mananap nga antay kedengan, meneng matay siini, yan se ikewalo nga hari. Iling heman sikandin te pito ke hari, aw degdagen heman sikandin. ¹² Se sempolo ke songay nga kamno kinita yan se sempolo ke hari nga weda pa pegtebo te kandan paghari. Sini dan begayan te tolos te peg-hari doma te men’nanap, meneng te mebaba olo nga penahon. ¹³ Sini sempolo hari doen sebad olo ke patay, aw ibegay dan se kandan tolos aw ketongod te men’nanap. ¹⁴ Mekig-bolaw dan te karnero, meneng pildihen dan tepad kay se karnero yan se Timanem nga labaw te kelahat menge Ginoo aw hari nga labaw te kelahat menge hari. Doma se menge metiloto nga pinemalli aw tinwal.” ¹⁵ Minikagi heman kanak se anghel, “Se menge wayeg nga kamno kinita nga inonsadan te baye nga egbeligya te kandin dengeg. Yan se menge otaw lekat te negkelain-lain sopo, nasod aw inikegihan. ¹⁶ Se sempolo ke songay nga kamno kinita aw se menanap megdomot te baye nga egbeligya te kandin dengeg. Ebaten dan se kelahat ke du’nan din aw lowasen dan sikandin aw wedad metenana kandin. Awyan kawen dan sen kandin onod aw sonogen dan deleg sen netenana kani. ¹⁷ Ipenang ini kandan te Timanem amon megemakan se kandin pakay. Megkesabot se menge hari nga ipe-akop te men’nanap se kandan tolos te peg-ibing hangtod nga metoman se inikagi te Timanem. ¹⁸ Se baye nga kamno kinita yan se bentogan nga siyudad nga mighari te menge hari te keneyonan.”