¹ Penga nidekey nekedateng dan te dibaloy te linaw te Galilea, te ogpaan te mga Gerasenhon, ² so nayan neketena din si Jesus te sakayanan, egsugat sikandin te sebad ke otaw nga limowa lekat te langub nga lebengganan. Sini nga otaw pig-opan te medaet Ispirito. ³ Aw doton din peg-ogpa te mge langub nga lubnganan. Wedad palos otaw nga mekegapos kandin, bisan mekekedina kandin. ⁴ Medita nga den higayon nga egkedinahan se kandin mge benis aw mge belad, meneng nebogtoo din ini. Weded palos mekepogong kandin. ⁵ Aldaw aw delem, doton te mge langub nge lebenganan te mge bontod gayed dikandin eg-olangag aw pigpali-palian din te bato se kandin lawa. ⁶ Te pegkita din ki Jesus doton te mediyo, kimagnan sikandin doton aw limohod. ⁷ Minikagi si Jesus te medaet Ispirito nga mig-ogpa te otaw siyan, “Kamno nga medaet Ispirito lowa ka te lawa te otaw siini!” Mig-olangag se otaw, “Jesus bata te Timanem nga melangkaw te kedita, iden se kamno labet kanak? ⁸ Negpekeido a kamno te ngadan te Tinanem nga ekabag egsilot kanak.” ⁹ Pig-insa dayon sikandin ni Jesus, “Sine se ngadan no?” Timobag sikandin, “Se kanak ngadan si Panon (tongod) kay medita kay.” ¹⁰ Aw gayed dikandin migpekeido ki Jesus nga eked dan pekedasi te ogpaanan siyan. ¹¹ Padapag doton, doen medita mge usa gayed migsepa-sepa te kesendigan. ¹² Negpekeido ki Jesus se mge medaet Ispirito nga togatan dan nga mawop dan te lawa te nedekey mge usa. ¹³ Nayan pigtogotan din dan. Aw limowa se mge medaet Ispirito likat nidekey otaw aw minawop te mge usa. Awyan se kelahat mge usa doton nga mge duwa malalan nogsengga senga te kimagnam timopang te mesandig dimiritso te linaw aw nelimes. ¹⁴ Kimagnan se mge mig-emoma te mge usa aw ig-indan dan se nehitabo doton te mge otaw te longsod aw te baulanan. Nayan dimoton se mge otaw ki Jesus amon tengtengan aw eden se nehitabo. ¹⁵ Pegdateng dan doton kinita dan dekey otaw nga sidekey pig-opan te mge medaet Ispirito, nennoo sikandin nga doen din saol aw mepiya din se pig-aneng-aneng. Nayan nelemitan dan. ¹⁶ Se mge kinita minikagi te mge otaw kon eden se nehitabo te otaw nga pig-opan nidekey mge medaet Ispirito aw se nehitabo te mge usa. ¹⁷ Tepad nedekey nehitabo negpekeido dan ki Jesus nga tomanan te kandan ogpaanan. ¹⁸ So nayan simakay den si Jesus te sekayanan sidekey otaw kedengan pig-opan te mge medaet Ispirito negpekeido kandin nga aw mehumo petekingen sikandin. ¹⁹ Meneng weda keibeg si Jesus, egkegihan din beling, “Uli ka te kamno pamilya aw kegihi dan aw eden se ininang te Timanem aw eden sikandin meido kamno.” ²⁰ Nayan nesayo sidekey otaw aw dimotan te probinsya te Decapolis, aw doton egkigihan din se eg-inang i Jesus. Kandin gayed se kedita nga dimineg kandin. ²¹ Pegbatas dan peman ni Jesus ton dibaloy te linaw, medita mge otaw se negtipon doton kandin. ²² - ²³ Dimateng dan peman doton si Jairus nga sebad te mge pengulo te sinagoga te mge Judio te pegkita din ki Jesus limohud sikandin aw negpekeido, “Se kenak bata nga delegita kemeteyenen din.” ²⁴ Nayan timaking si Jesus kandin, medita onto se mge otaw se simonod ki Jesus aw negdasek dan doton kandin. ²⁵ Doen baye doton nga pigbagwasan te dipanog awop din te sempolo tegduwa si omay. ²⁶ Dakel din onto se kandin negasto te pegpebolong te negkelain-lain nga mge megbolongay. Negasto din den se kelahat din pilak aw kabtangan. Meneng weda pa gayed kegolii megsamot din beling se kandin mesakit. ²⁷ Dinineg din se belita tepad ki Jesus, nayan simoksok sikandin te medita otaw amon mekepadapag te getan ni Jesus. ²⁸ Minikagi sikandin te kandin serili, “Aw mengelam a lay kedi bisan se kandin penenektan, megolian a basi.” ²⁹ Nayan peg-ilam ko se penenaktan i Jesus aw kalit meg-etod se kandin pegdipanog, aw nebati din nga negolian den sikandin te kandin mesakit. ³⁰ Nebati ni Jesus nga doen gahom nga limowa lekat kandin, nayan limingi dayon sikandin aw minikagi, “Sine se nengelam te kanak penakten?” ³¹ Timobag se kandin mge tinuladaan, “Kedita te mge otaw nga negdasek kidoen kamno, nengalay meg-insa ka pa lay aw sine se nengelam kamno?” ³² Meneng gayed limingi pa gayed sikandin aw sine se nengealam kandin. ³³ So natagahan te baye aw eden se nehitabo kandin, megpedapag sikandin ki Jesus ng tinagangtang kay nelemitan. Limohod sikandin aw minikagi te benal. ³⁴ Nayan minikagi si Jesus kandin, “Bata ko, neluwa ka tepad te kamno pegpemenal. Nayan uli aw ika din egkeguol te kamno mesakit kay negolian ka din.” ³⁵ Samtang neg-istorya pa sikandin te baye doen dimating nga midita mge otaw lekat te balay ni Jairus. Minikagi sikandin ki Jairus, “Nematay din se kamno bata. Eka din egsamok te egtulada.” ³⁶ Meneng weda pegtagad si Jesus te kandan inikagi. Minikagi sikandin ki Jairus, “Ika egkelenitan pemenal ka olo.” ³⁷ Nayan migpedeleg dan, meneng wedad pinetaking gawas ki Pedro aw te megtelekeduwa nga si Santiago aw si Juan. ³⁸ Te pegdateng dan doton te balay ni Jairus kinita ni Jesus nga negkegobot se mge otaw aw doen negkelag aw netapi. ³⁹ Minawop dan te balay aw minikagi sikandin te mge otaw, “Ngalay negkegobot aw negkelag kaw? Weda kematay se bata timadogi olo.” ⁴⁰ Pigkebayatan dan si Jesus. Nayan egpaluwa dan se kalahat mge otaw aw egpaawop dan te ibatanan te bata se amay aw inay nini, aw se telo nga kandin doma. ⁴¹ Nayan inawidan se belad te bata aw minikagi, “Talitha, koum,” se pesabot, ‘Inday, enaw!’ ⁴² Aw diritso minenaw se dalegita aw migpanawpanaw. (Se delegita mig-ondanen te sempolo tegduwa si Omay). Onto den peman se kandan netingala te nehitabo. ⁴³ Meneng impenean din dan nga eked dan peg-indan te bisan sine. Aw egkagihandan nga begayan te kanen se bata.