¹ Peg-okit te sempolo teg-epal siomay, limiko te Jerusalem doma ko si Barnbas, aw inibing ko heman si Tito. ² Limiko a tongod kay negpadayag se Tiamnem kanak nga kailangan domotan a doton. Piglagbak ko se menge nengibing e menge nemenal, aw te dalem sikami den olo, pig-indan-indan ko kandan kon eden se mepiya i-indan nga kanak pigwali te menge kena Judio. Pig-inang ko iyan kay eked a keibeg nga meinang wedad pulus sa kanak menge pagod kedengan taman seini. ³ Netegahan ko nga uyun dan te kanak pigwali, kay bisan kenaJudio si Tito nga doma ko, weda dan pegleges nga tolien sikandin sumala te punu ni Moises. ⁴ Se menge otaw olo nga negelingo-lingo nga menge nemanal se nekeikagi nga kailangan nga sikandin tolin. Sida nga menge otaw migdagpo olo te menge nemenal amon panid-en se kenami kelewaan lekat te punu ni Moises, nga punu. ⁵ Meneng weda kay onto taking te kandan ebeg bisan deitek olo amon meempingan daye alang kenyo se kebenalan nga intolada te Mepiya Indan. ⁶ Se menge kelengkawan te menge nemenal doton te Jerusalem wedad palos indugang te kanak pigtolada. Hinuon wedad bali kanak ko sinu dan lay onto, tongod kay te Timanem migunawa kay olo. ⁷ Imbis nga megdugang dan te kanak pigtudlo, pigkilala nga siak yan se pigpiniyalan te Timanem te pegtolada te Mepiya Indan doton te menge kena Judio, iling heman ki Pedro nga pigpiniyalan te pegtudlo doton te menge Judio. ⁸ Kay se Timanem nga neg-inang ki Pedro nga apostol alang te menge Judio yan heman se neg-inang kanak nga apostol alang te menge kena Judio. ⁹ Nayan pegketaga-taga te menge kinilala nge menge egpengibing te menge egpemenal, nga sikandan Santiago, Pedro, aw si Juan nga pigbegayan a te Tiamnem nini nga inangenun, kininawa kay dan Barnabas isip kandan menge doma te pegtulada te Mepiya Indan, aw negkeoyon kay nga sikami si Barnabas megsangyaw te menge kena Judio aw sikandan te menge Judio. ¹⁰ Se kandan olo nga pighangyo kenami yan nga tabangan day se wedad pegkeabat nga menga egpemenal doton te Jerusalem. Aw iling heman kenyan sekanak ebeg inangen. ¹¹ Penga niya, te dalem doton si Pedro doton te Antiyokya ko sikandin tongod kay sayop se kandin ininang. ¹² Yan ini se nehitabu te dalem weda pa dateng se menge otaw ni Santiago , kimaen si Pedro doma te menge kena Judio nga menge nemenal. Meneng pegdateng te menge otaw ni Santiago, timanan sikandin aw weda den sikandin kain doma te menge kena Judio, kay nelemitan sikandin nga bisan sagdahen sikandin te Judio ng menge nemenal nga nekeikagi nga se kelahat nga nemenal ki Cristo kailangan sumunod te punu no Moises. ¹³ Lakip se doma Judio nga menge egpemanal doton te Antiyukya smunod heman ki Pedro bisan netegahan dan nga kena medael se komaen doma te menge kena Judio. Bisan gani si Barnabas neibing heman te kandan pegpelingo-lingo. ¹⁴ Te dalem kinita ko nga weda dan sunod te kebenalan nga intudlo te intudlo te Mepiya Indan, pig-ikegihan ko si Pedro sinelowan te kelahat. Minikagi a kandin, "Ngalay ininang no sida? Iling den nga igleges no se menge kena Judio te pegsunod te menge punu te menge Judio. SIkona gani mismo nga Judio weda man sunod te menge punu te menge Judio, kon kena negekinabuhi iling nga sebad ke kena Judio." ¹⁵ Ne otaw kay nga menge Judio, aw lahi kay te menge kena Judio nga pig-aneng-aneng day kedengan nga menge mekesasala. ¹⁶ Meneng seini netegahan day den nga pigtolid te Timanem se otaw pineokt te kandan pegpemenal ki Jesu-Cristo aw kena te pegtoman te punu ni Moises. Nayan sikami heman nga menge Judio nemenal ki Cristo Jesus amon toliden kay te Timanem tongod te kenami pegpemenal aw kena tongod te kenami pegtoman te punu, kay wedad onto otaw nga toliden te Timanem pineokit ta kandin pegtoman te punu. ¹⁷ Seini, kon te kenami ebeg nga toliden kay te Timanem pineokit te kenami pegsebad ki Crsito kitaen nga sikami mekesasala, nekehulugon ba ini si Cristo negetolod te peg-inang te sala? Eked onto! ¹⁸ Meneng kon likoen ko den heman se pegsalig te punu nga kanak tinenanan, siak den se negpemetood nga mekesasala atongod kay piglapas ko se punu. ¹⁹ Se bena, pineokit te punu netegahan ko nga eked ko keangkon se pegketolid pineokit te kanak ebeg te pegsunod nin. Aw seini nga weda a den kesiyong te punu, nekelowa a den nga megkinabuhi te Timanem. ²⁰ Nematay a doma ni Cristo te krus. Kena den kanak se negkinabuhi seini, kon kena si Cristo den se negekinabuhi kanak. Aw seini kinabuhi nga kanak pigkinabuhi seini yan se resulta e kanak pegpemenal te Bata te Timanem nga dadekl se pedowan kanak aw negdogso te kandin kinabuhi alang kanak. ²¹ Weda ko pegwedadi te pulus se keido te Timanem. Kay kon se pegtoman te punu yan se pemeokit yan toliden te Timanem se otaw nan wedad kekemowan se kemetayen ni Cristo.