¹ Siak si Pablo neinang suguanon i Kristo Jesus tanda te ibig te Timanem. Siak aw si Timoteo kedowa tedon ki Kristo, ² nengomusta kenyo kidoen te kulusas, sekiyo menge otaw te Timanem. Hinaut mekinawa niyo se tabang aw kelinaw lekat te Timanem kenitadon amay. ³ Kelikit te pegtawal-tawal day tepad kenyo, gayed kay egpesiontong te Timanem amay te kenitadon Ginoong Jesu-Kristo. ⁴ So dinineg day onto dakel se kenyo pegpemenal ki Kristo Jesus aw dakel se kenyo pedowan te kelahat otaw te Timanem. ⁵ Iling kaw nini tanda te negtagad kaw man te kenyo iniman integilan tepad kenyo doton te langit. Seini kenyo iniman dinineg den niyo kedengan te kidoen inindan kenyo se kebenalan, yan se mepiya ikagi. ⁶ Seini mepiya ikagi dimeleg nedengeg te kebelad te keneyonan, aw medita se nekedawat te kaling pedowan iling heman te kenyo nedawat te siyan netegahan niyo se kebenalan tepad te tabang te Timanem. ⁷ Intolada ini i Epapras kenyo dakel se pedowan day kandin aw iling heman sikandin kenami alagad i Kristo. Impekidoen day sikandin kidoen selilin kenami, aw keseligan sikandin alagad. ⁸ Sikandin yan se eg-indani kenami tepad te kenyo pegkedakel te pedowan tanda te kedakel pedowan imbegay kenyo te Espirito Santo. ⁹ Nayan te pegketaga-taga day kani, gayed kay egtawal-tawal tepad kenyo, eghangyo kay te Timanem se kandin Espirito memegay kenyo te kelahat kebiyasa aw pegsabot amon metegahan niyo se hingpit aw eden se kandin ibeg tepad kenyo. ¹⁰ Pineokit kani, mekeogpa kaw maangayan te Timanem, mekebegay te keleba kenyo aw meinang heman gayed niyo se Timanem, mekebegay te keleba kenyo aw meinang heman gayed niyo se mepiya, aw dinegen pa onto se kenyo ketaga-taga tepad te Timanem. ¹¹ So lobosen kaw te Timanem pineokit te kandin kepelehan tolos, amon pengkey eden se mehitabo meketayod kaw doen keleba. ¹² Aw mekepasiontong kaw te amay tanda te ininang kaw din takos te pegdawat te panolondon tepad te kandin menge otaw, se panulondon kidoen te kelowahan. ¹³ Impelowa kidon din lekat te tolos te kengitngitan aw insawol doton te gingharian te kandin kedekelan te pedowan bata. ¹⁴ Pineokit te kandin bata gitubos kidoen din. Seini egpesabot pigwedad din den se kenitadon menge sala. ¹⁵ Si Kristo yan onto se bawa te eked kitai Timanem, aw sikandin se melangkaw te kelahat. ¹⁶ So pineokit kandin aw tepad kandin ininang te Timanem se kelahat kidoen te langit aw dini te tana, se kitaen aw se eked kitai, unawa te menge Espirito doen olos o ketongod, menge Espirito nengulu o neghari. ¹⁷ Te wedad pa se pengkey eden sawol-sawol si Kristo kidoen den tapay, aw pineokit kandin nahimutang aw negsebad se kelahat te kandan benal ogpaanam. ¹⁸ Sikandin se olo te menge egpemenal yan se kandin lawa. Sikandin se linekatan, se mona neantay amon mapaila sikandin yan onto se mona te kelahat. ¹⁹ So ibeg te Timanem Amay se tayod te kandin pegke-Timanem kitae kelahat kidoen ki Kristo. ²⁰ Aw pineokit te Kristo pegsebaden te Timanem se kandin mepiya relasyon te kelahat ininang din, te langit aw dini te tana. Ininang din ini pineokit te ipanog i Kristo te krus. ²¹ Kedengan mediyo kaw te Timanem, aw neinang kaw din menge kaaway tanda te kenyo medaet menge aneng-aneng aw menge ininang. ²² Meneng seini pigsebad kaw den te Timanem te kandin keotawen pineokit te pegkematay te tawhanon lawa i Kristo. Seini meibing kaw din den te kandin presensya wedad sala, hinlo, aw wedad ikelindo, ²³ meneng kailangan domeleg kaw lobosen te kenyo pegpemenal aw eked kekayong-kayong te peg-iman kemkemen niyo te dinegen niyo se mepiya ikagi inindan doton tayod te keneyonan. Aw siak si Pablo, neinang alagad amon meg-indan te mepiya ikagi seini. ²⁴ Seini neleba a te kenak menge pegtawal-tawal tepad kenyo. So pineokit te menge pegkelebose te kenak lawa, meketabang a pegtayod te menge pegkeleboso i Kristo tepad te kepiyahan te kandin lawa yan se menge egpemenal. ²⁵ Ininang a te Timanem suguanon tepad te menge egpemenal, aw se inangenen imbegay din kenak yan se pegtolada kenyo menge kena Judiyo te tayod te kandin kagi. ²⁶ Se kandin kagi yan se kandin ineles diya te aneng-aneng weda din indani kedengan, meneng seini impelowa din de kenitadon kandin menge otaw. ²⁷ Ibeg din meketaga-taga kidon den seini aw eden kepiya te aneng-aneng pelimanan din tepad te kelahat otaw din. Aw seini ineles aneng-aneng yan si Kristo kidoen kenyo. Aw tanda so si Kristo kidoen den kenyo doen pelimanan niyo meinang mepiya onto se kandin keogpa te domateng. ²⁸ Nayan inindan day si Kristo te kelahat otaw. Inikagihan day aw tinoledaan te kelahat te kebenalan amon meinang day sikandan ietobang te presensya te Timanem melobos se kandan pegsebad ki Kristo. ²⁹ Negpekagsen a onto amon meinang ko ini, aw se tolos i Kristo yan se miglobos kenak.