¹ Meneng kedengan doen mini heman nga menge prupita kidoen te menge otaw te Israil. Iling heman kani se mehitabo kanyo doen mini nga menge megtotoladaay nga domateng kidoen kenyo. Mengibing dan te pegtulun-an nga yan meggobal te kenyo pegpemenal te Timanem. Tenanan dan gani se Timanem nbga negtobos kandan. Nayan te mesalina pelemunun dan te Timanem. ² Medita se sumunod te kandan mekeyayaay nga eg-inanggen aw silahen te menge otaw se kebenalan nge kinitadon pigsunod tongod kandan. ³ Seini mini nga menge megtotoladaay te menge tinomotomo nga keokit mon pengowartahan kaw dan. Weda dan peketagataga nga nenaway den dan, nga pig-okom te Tinamen, aw agpet den dan melaglag. ⁴ Weda gani keidohi te Timanem se menge anghil nga nepekesala kedengan. Pigkeleboso dan beling te medalem aw mengitngit nga awang, aw doton dan doton taman te aldaw te peg-okom. ⁵ Weda din gani keidohi se menge otaw kedengan nga kenan egpenimanem, piglonopan din beling se keneyonan aw nematay dan kelahat. Meneng piglowan din se Nowi nga negsangyaw te pegketolid aw se kandin te pito ke doma. ⁶ Pineokit te pelumun pigsonog te Timanem se menge siyudad te Suduma aw Gumura amon ipekita kon eden se mehitabo te meneg otaw nga kena egpenimanem. ⁷ - ⁸ Meneng piglowas din se Lut tongod kay metolid ini, aw nepuluk onto te menge medaet nga eg-inangen te kandin simbalay lungsud nga wedad menge baruganan aldow-aldow kinita aw dinineg ni Lut se kandan medaet nga menge eg-inangen te dalem neg-ugpa sikandin doma kandan, aw siyan nekepulik gayed kandin. ⁹ Dini kitaen tadon nga se Timanem mekeinang te menge egpenimanem kon domateng kandan se menge pegsolay, aw pegpelumun te menge medaet taman te aldaw te peg-okom. ¹⁰ Ilabi den onto si da menge otaw nga eked pegpesakop kandin aw negsunod olo te kandan melupa nga menge ebeg. ¹¹ Bisan gani se menge anghil nga onto magsen aw onto metolos pa nini menge mini nga megtotoladaay weda pegtempayas te metolos nga menge pig-inang te dalem minikagi dan se pigpetewa nga okom te Timanem alang kandan. ¹² Meneng seini menge otaw neglempayas te menge kedonan nga weda dan gani kelebeti. Iling dan te menge menenanap te kebenesan nga wedad aneng-aneng koneden se kandan pig-inang aw wedad lain nga detengan ken kona dekepen aw imetayan. Laglagen onto seini nga menge otaw. ¹³ Yan ini se balos te kandan pig-inang nga medaet doton te doma. Se kandan pig-aneng-aneng nga keluba yan se peg-inang te menge mekeyaya nga eg-inangen nga kandan neibegan bisan dakel aldaw, yan ini se menge otaw se negelipa aw negebegay te keyayaan keayo kon kitaen dan timaking te kenyo pegtipen, kay se kandan benal nge katuyu-an te kandan pegtaking kenyo te pegpengaen yan olo peglimbong kenyo. ¹⁴ Kon tengtengan dan te menge bayi meg-aneng-aneng dan dayon te pegpemayi. Weda dan lenga te pegpekesala aw egtintalen dan pa onto se menge melumay te pegpemenal awon mekesala. Nebet den dan se pegkedemut. Tinollonan den dan te Timanem! ¹⁵ Pigtenanan dan se metolid nga menge pegtulun-an, nayan nigketading dan. Pigsunud dan se ininang te bata ne Beor nga Balaam nge meibeg nga sildohan te peg-inang te medaet. ¹⁶ Aw tongod kay piglapas din se punu te Timanem, pigsagda sikandin pineokit te Asnu nga minikagi iling te otaw, nayan nepugungan sikandin te kandin peden binang nga inangenun. ¹⁷ Seini mini nga menge megtotoladaay meiling te menge pigtebolan nga neetihan aw te menge labon nga gayed egpeliden te magsen nga kalamag. Nayan intogana den te Timanem kandan se benowa nga mengitngit onto. ¹⁸ Gayed eggemiten se mekedani nga menge ikagi, meneng wedad polos sekandan gayed eg-ikegihan. Pineokit te kandan pegtolada nga kena ekon medaet se pegsunud te ebeg te lawa, gayed dan egtintalen se menge otaw nga kaling pa olo timanan te menge otaw nga negpekesala. ¹⁹ Inpakang dan se kelowaan doton te menge sumunod kandan, meneng sikandan mismo meglaglag tongod te sala nga nege-allang kandan. Kay se otaw allang te bisan eden nga negetolos kandin. ²⁰ Se menge otaw nga kimilala den ki Timanem Jesu-Cristo nga kinitadon Manluluwas nekeluwa den te medaet nga menge kinaiya nga negetolos te otaw dini te keneyonan meneng kon lomiko dan te kandan medaet nga kinaiya aw meinang den dan heman meallang te kandan menge sala, mas medaet pa onto kowani se kandan dangotan kay te kandan kohimtang kedengan te weda memanal ki Cristo. ²¹ Mepiya po kon weda den dan beling peketagataga te pegketolid te Timanem, kay te neketaga-taga dan meneng penganiyan tominggetanb dan te menge punu te Timanem doton kandan. ²² Se kandan pig-inang iling onto te inikagi te olit nga, "Se toyan komaen te kandin pigdulowak, 'Aw' Se usa nga kaling olo pigdigosan lomiko meglonang te pasal."