¹ Menge kedowa ibeg day ipetagataga kenyo se ininang te menge egpemenal doton te masidonya pineokit te grasya te Timanem kandan. ² Pengkey midita se kandan nasinatian nge menge pegsulay, neluba gihapon onto sikandan yan kena nge egpemegay onto sikandan pengkey onto dan sagkep. ³ Makapamatood a kenyo nge se kandan imbegay kena olo sumala te kandan mekaya kon kena subra pa nini, aw kabobot-on dan ini eg-inang. ⁴ So sikandan onto se nemoyo kenami nge aw mepakay memegay dan aw kahigayonan nge mekatabang heman kandan te menge otaw te Timanem nge nelimahan doton te Jerusalem. ⁵ Aw kena so siyan olo kon kena mona te kelahat imbegay dan se kandan pegkeotawon te Timanem aw kenami sumala te kebobot-on te Timanem, weda onto so pegdahom nge mekeinang dan dekey. ⁶ Tungod te kandan mepiya inang, igdeyun day si tito te peliko diya kenyo aw ipedaleg se nasugdan din-den nge inangen se pegtipon te kenyo menge tabang te menge nelimahan te Jerusalem. ⁷ Sikiyo kidoen te Corinto weda pegkulang te kelahat magsen se kenyo pegpemenal te Timanem, mepiya kaw megtolada aw medita se kenyo netegahan measeb kaw te kenyo peg-alagad te Timanem, aw onto se kenyo pedowan kenami bisan ibeg day nge ipakita kenyo nge weda heman kay pegkulang se nemegay. ⁸ Weda ko sikiyo sogoi te memegay kon kena ipatagataga ko olo kenyo se netebangan te doma amon mapamatud-an heman niyo nge se kenyo pedowan benal onto. ⁹ Neketagataga heman sikiyo te inang te kanitadon Ginoong Jesu-Cristo, nge pengkey datu sikandin doton te langit negpekepobre sikandin pineokit te kandin pegkeotaw tungod te kandin keido kenitadon amon meinang kidon datu. ¹⁰ Pengkey yan ini se kenaken tambag mepiya aw ipadeleg niyo se pegpemegay nge kenyo den nesugdan te minokit omay. Sikiyo onto se mona nge memegay aw sikiyo heman se mona nge neke aneng aneng nge meg-inang nini. ¹¹ Pengkey ipadeleg niyo ini, peningkamote niyo nge mepenga se igplano niyo, inangen aw begeyan sikiyo sumala te kenyo meinang. ¹² So aw tinguha onto niyo nge memegay kinawaen te Timanem se kenyo ikebegay weda sikandin pegtegad nge memegay sikiyo te eked niyo kekeya. ¹³ Kena a keibeg nge kelimahan sikiyo tungod olo te pagpasayo niyo te pegkesewol te doma, kon kena amon nge meg-onawa se kenitadon pegkesewol. ¹⁴ Te pegkeseini mepiya se kenyo pegkesewol, meneng angay olo nge megtabang sikiyo te menge nenginahanglan. Aw se penahon nge sikiyo den heman se megkeilangan, aw sikandan se mepiya aw pegkesawol te metag sebad. ¹⁵ Kena ba iling men kenyan se inkagi te kesolatan, sikandin nge negtipon aw medita weda lampas aw sikandin nge negtipon aw deitek wedad kolang. ¹⁶ Migpesiontong kay te Timanem nge insewol din te pedowan i Tito se iling te kenami kahangawa olo kenyo. ¹⁷ So weda olo sikandin kaibeg te kenami pengemoyo kon kena sikandin mismo se doen plano nge komidoen kenyo. ¹⁸ Ipataking ko kandin se kenita kedowa nge indeyun te menge nemenal te pengkey kenan tungod te kandin pegtolada te mepiya balita. ¹⁹ Sikandin yan onto se pinili te menge nemenal te negkalain-lain mgne ugpaanen nge timaking kenami te kenami peg-ated seini hinabang alang te menge nengihanglan in-inang day ini maon meluba se Timanem aw amon ipekita te menge otaw nge ibeg onto dan nge megtabang. ²⁰ Ipataking day ini nge kedowa ki Tito tungod so kena day ibeg nge te kenami pegtepeg-teped seini dakel nge hinabang mekesila kenami. ²¹ So se kenami tumong yan se peg-inang te mepiya, kena olo to mona te Timanem kon kena te otaw heman. ²² Doen sebad pa onto ka nemenal nge ipataking day kandan sini nge otaw mekedita den day nesulayan te nagkalain-laing pemeokit aw napamatud-an den day doen tinguha onto sikandin te pegtabang, aw lai den onto seini tungod so dakel se kandin pegsalig kenyo. ²³ Kebahin ki Tito, doma ko sikandin te pegtabang kenyo bahin heman seini dowa ka menge kedowa nge timaking kandin, sikandin se menge pinaibeng te menge nemenal lekat te negkalain-laing menge ugpaanen, se kandan pedowan nagapasidungog ki Cristo. ²⁴ Meneng ipekita se kenyo pegkemehigugmaon kandan amon metegahan dan nge benal se kenami menge pegduyun kenyo aw pineokit kandan, netegahan heman ini te menge nemenal te doma ugpaanen.