¹ Neketagataga a nga wedad polos kon megpesigarbo a bahin te kanak pegkeotawan, meneng nalegus a seini iindan indan ko kenyo se menge inpekita aw inpedayag te Timanem kanak. ² Kidoen a den ki Cristo te dihang nehitabo ini kaak aw menge sempolo den teg epat ke omay se minokit, nga siak inibing doton te eketelo nga langit, ³ - ⁴ te Paraiso. Inday kon olo se kanak lawa doton ba onto se Espirito ko do. Se Timanem olo onto se neketagataga. Nekedateng a te Paraiso aw doen nedineg ko nga menge kagi nge eked kelitok aw weda togoti nga iindan indan daya te menge otaw. ⁵ Sida kanak kasinatian yan se kanak ipesigarbo; Meneng kon bahin te kanak pegkeotawen, eked a pegpesigarbo gawas kon bahin olo te kanak menge kelomayan. ⁶ Hinoon, kon ipesegarbo ko man onto se kenak pegkeotawen eked a keinang wedad inenegnen kay neg-indan-indan a man te kebenalan. Meneng eked a pegpesigarbo kay basin kon megsobra se kandan pegkilala kenak. Ibeg ko nga se kandan pegkilala kanak tepad olo te kandan kinita aw dinineg dini kanak. ⁷ Amon eked ko kepelebihi se pegpesigarbo tongod te kepelahan nge menge inpedayag te Timanem kanak, pigtogotan din si Satanas nga begayan a dipirinsya te lawa. Pigpebeyaan te Timanem nga peentosen a ni Satanas nini te kanak dipirinsya amon eked a pegpesigarbo. ⁸ Te telo onto ke higayon peghangyo ko se Timanem nga ebaten din ini kanak. ⁹ Meneng weda din ebati hinonoa minikagi sikandin, "Se kanak tabang yan olo se kamno pigkailangan. Kay kitaen onto se kanak tolos kidoen te kamno kelomayan. "Nayan neluba a onto te pegpesigarbo tepad te kanak menge kelomayan amon betien ko gayed se tolos ni Cristo kanak. ¹⁰ Nayan neluba a seini te kanak menge kelomagan, te menge pegtempeyen kanak, temenge kelimahan te menge peglotos aw te menge kekolian tongod te kanak pegtaking ki Cristo. Kay kon megkelomay a lig-onen a te Timanem. ¹¹ Pigleges a niyo nga megpesigarbo iling te wedad enenengen. Kay angay peden nga idugan a niyo doton te menge egpelingo-lingo mga menge sogounun, meneng weda a niyo deyuni. Bisan netegaha ko nga se kanak pegkeotawen wedad a ikepesigarbo, eked a man kelopigi siyan menge otaw nga menge labi mepiya eken nge menge sogounun. ¹² Te kidoen a pa kenyo, mekedita a peg-inang te menge pengilala aw menge kepelahan bisan pa doen menge kelimahan nga dimateng kanak. Aw seini negpemenal te kanak pegkesogounun. ¹³ Se kenak ininang diya kenyo iling heman te kanak ininang te menge egpemenal te doma menge ogpanan, gaway olo te weda a peghasol kenyo pineokit te pegpemoyo te tabang. Kon kenyan nga peokit nekesala a kenyo, peseyloi a bag niyo. ¹⁴ Seini andam a den komidoen kidoen kenyo aw seini meinang iketelo den ke higayon. Eked a gihapon mepoyo to tabang kenyo, tongod kay kena man se kenyo kekana se kanak pig-apas kon kena sikiyo mismo. Kay iling ko sikiyo te menge mengisa? Aw kena se menge mengisa yan megbuhi te kandan menge obanen kon kena se menge obanen yan megbuhi te kandan menge mengisa. ¹⁵ Se benal, meluba a pa gani kon mekebegay a kenyo, aw bisan pa se kanak pedowan ibegay ko kon pigkailangan amon meketabang a kenyo. Meneng nenga ba nga bisan dakel se kanak pedowan kenyo, deitek olo se kenyo pedowan kanak? ¹⁶ Sikiyo mismo mekepemetood nga weda a pegpebahi kenyo. Meneng basin kon doen meg-ikagi nga mig-akal a aw piglegawa ko sikiyo. ¹⁷ Meneng te eden pemeokit? Kay netegahan niyo man nga weda a onto penguwarta kenyo pineokit ki bisan sinu nga kanak inpeibing kidoen. ¹⁸ Pighangyo ko heman si Tito nga komidoen kidoen aw ipetaking ko heman kandin se sebad pa onto ke kedowa ki Cristo. Eked kaw pekeikagi nga nemintaha si Tito kenyo, eked keinang nga tontohen kaw din kay kinita niyo man nga mig-onawa se kenami pig-inang aw katoyoan. ¹⁹ Basi kon nenamay kaw den neg-aneng-aneng nga gayed kay olo egpenelipod te kenami pegkeotawen diya kenyo. Menge nedekelan ko te pedowan, sikami nga kidoen ki Cristo neg-ikagi kenyo te sinelowan te Timanem nga wedad kay lain toyo te kelahat nga kenami inikagi kon kena se peglig-on lang te kenyo pegpemenal. ²⁰ Nelemitan a kay basin kon te pegdateng ko kidoen, kitaen ko nga se kenyo ininang lahi kay te kanak pigtegadan kenyo. Aw kon mahitabo iyan, kitaen niyo heman nga lahi a kay te kenyo pig-tegadan kanak. Nelemitan a kay basin kon mesaban ko sikiyo nga negbalawbalaw, negpeingaay, negpeopalay, negpedemetay, neglinibakay, tabian, negpepesigarbo, aw negkesamok. ²¹ Nelemitan a heman, kay basin kon te pegdateng ko kidoen meyaya a heman te Timanem tongod kenyo. Aw basi megool a olo tongod kay medita kenyo se negpekesala kedengan aw lamig seini weda pa pegselsel te kandan menge melipa nga ininang iling te pegsimbol te kena kanak asawa aw menge melaw-ay nga ininang.