¹ Yan ini se kanak iketelo nga pegkidoen kidoen kenyo somala te kasolatan, "Kon doen asonto se sebad batok te sebad, kailangan pemetod-an te dowa telo ke menge tistigo." ² Seini, ibeg ko punuan se menge nekesala kedengan, aw iling man heman se kelahat, nga se kanak inikagi sida ikedowa ko pegkidoen kidoen todaen ko seini nga se kanak pegliko kidon wedad onto mekelowa te kanak pegpanton. ³ Inangen ko ini te pegpemetood kenyo nga se kanak pig-ikagi lekat ki Cristo, kay yan man ini se kenyo pinemaha. Metolos sikandin aw kena melomay te kandin peg-iwal-iwal diya te kenyo pedowan. ⁴ Benal nga inlansang si Cristo te Krus tongod kay sikandin negpeinobsanon, meneng seini bohi sikandin tongod te tolos te Timanem. Aw tongod ke kidoen kay ki Crisro negmepeinobsanon kay iling kandin. Meneng te kenami peg-alagad kenyo kitaen niyo nga se tolos te Timanem dini kenami kay sikandin temaking kenami. ⁵ Sosihi niyo se kenyo pegkeotawen kon kebenalan ba se kenyo pegpemenal ki Cristo. Kena ba netegahan man den niyo nga si Cristo Jesus kidoen kenyo? Gawas kon kena kaw benal nga menge egpemenal. ⁶ Negelaom a nga kitaen niyo nga sikami benal onto nga menge segounun ni Cristo. ⁷ Negtawal-tawal kay te Timanem nga eked kaw peg-inang te bisan eden nga medaet. Weda kay pegtawal-tawal nini amon ketaen te menge otaw nga pigsonod niyo se kenami menge intolada kenyo. Kay bisan eked kay niyo ilhi nga menge sogounun ni Cristo, se mehinongdanon yan nga meg-inang kaw te mepiya. ⁸ Kay eked kay pekeinang te bisan eden nga sopak te kebenalan kon kena se alang olo onto te kebenalan. ⁹ Neluba kay te pegpadana day te kenami pegkeotawen nelig-on kaw te kenyo pegpemenal. Kenami pegtawal-tawal nga wedad onto ikesaway kenyo. ¹⁰ Se lekatan nga negsolat a nini kenyo samtang weda a pa kidoen amon nga te pegkidoen ko kena den kailangan nga mikagi a pa te mesakit pineokit peggamit te kanak katongod. Kay inbegay kanak te Timanem seini nga katongod amon lig-onen kaw, aw kena amon gobalen. ¹¹ Dini olo taman se kanak solat kenyo. Te temanan, menge kedowa, neghangyo nga tarongen niyo se kenyo pegkinabuhi. Ilingi niyo se kanak menge tambag. Pegsebad kaw kailangan mepiya se kenyo relasyon te sebad seba. Aw kon inangen niyo ini se Timanem nga linekatan te gogma aw kelinaw tomaking kenyo. ¹² Pegkemostahay kaw isip menge telekedowan ki Cristo se kelahat menge otaw te Timanem dini nengomosta kenyo. ¹³ - ¹⁴ Hinaot pa nga kidoen kenyo kelahat se pesiontong te kinitadon pengolo Jesu Cristo, se gogma te Timanem, aw se pegtaking taking te Espirito Santo.