¹ Siak si Pablo nga Apostol i Cristo Jesus kag te suga te Timanem nga megpelowa i Cristo Jesus so yan se kenitadon peglaum. ² Nengumusta a kamno, Timoteo, eg-iling taden benal bata te pegpemenal. Medawat nikaw peden se grasya, keido aw kelinaw lekat te Timanem nga Amay aw ki Cristo Jesus nga kenitadon Timanem. ³ Aw kon mepakay kidoen kad ulo una te Efeso, yan man gaw se kanak pighangyo kamno se telobo apa migpesalo doton te Macedonia? Doen menge otaw kidoen sayop se egtulada din aw keilangan peetoden nikaw dan. ⁴ Kegihi eked dan pegbaet te kandan penahon kidoen te menge kebolalawindan-indan te menge obanen aw te pegpenoltol aw sine se kandan linekatan. Yan ini se doen aw nenga neglantogi se menge otaw, aw eked ini peketabang ti pegpetaga-taga te kebubut-on te Timanem. Siini matagahan ta ulo pineokit te pegpemenal. ⁵ Se tuyo te kanak insugo kandan yan meghigugmaan dan aw siini mepakay ulo dan aw linesen se kandan pedowan aw kunsensya aw benal se kandan pegpemenal. ⁶ Se duma kidoen kenyo weda den toltol nini aw gayed da ulo eglentogi te menge kedonan nga wadad kekemuwan. ⁷ Mepakay dan man megtulada te punu te Timanem, meneng weda dan gani ketagahi aw eden se kandan inikagi aw pigleges dan nga pemenalan. ⁸ Natagahan tadon se belaud mepiya aw benal se peggamit nini. ⁹ Angay tadon peman eneng-enengen nga se balaud weda inangi alang te menge metolid. Aw kana ininang ini te menge melapasen te menge metegel se ulo, te menge weda kelemitan te Timanem, te menge mekesasala, te menge kana egpenimanem aw weda Timanem te pusung den, se menge egpengimatey te kandin amay aw inay aw te duma dan otaw, ¹⁰ te menge nengesawa te kena kandin asawa, te menge neg-asawa te kandan duma ne maama, te menge nengidnap, te menge bolalawen, te menge te kebolalaw, aw pengkey sine se nagabatok te kebenalan nga netagahan. ¹¹ Se inikagi te mepiya indan, se mepiya indan tepad te metolos aw doen keluba nga Timanem, nga egtugyan kanak amon itulada doton te menge otaw. ¹² Negpesalamat a ki Cristo Jesus nga kenita Timanem nga nemegay kanak te kebasku amon mekepenimanem a kadin, kay kinilala a din nge meseligan. So nayan penemalli a din nga mengelagad kandin- ¹³ pengkey kedengan minikagi a te medaet tepad kandin. Gawas pa niyan, pinemeleng ko aw egyaya ko se menge nemenal kandin. Meneng piakeidohan a te Timanem, kay weda a peman pemenal kandin kedengan, so nayan weda a ketagataga aw eden se kanak inangen. ¹⁴ Dakel onto se grasya te kenitadon Timanem kenak kay binegayan a din te pegpemenal aw peghigugma, dini kenitadon menge kidoen ki Cristo Jesus. ¹⁵ Se inikagi ko siine benal ini aw angay onto dawaten aw pemenalan te kelakat: SI Cristo Jesus dimini te keneyonan amon pegpelowa te menge mekesasala. Aw netegahan a yan onto se mekesasala te kelahat. ¹⁶ meneng keidohan a amon ipekita i Cristo Jesus se kandin pagkamapailubon, nga odad mekesasala aw eked kepesaylo. Se ininang i Crsito kanak negsilbi nga panig-ingnan doton te duma nemenal kandin aw domawat te pedowan nga wedad tamanan. ¹⁷ Pasidunggan aw deyegen gayed te Hari nga wedad tamanan aw wedad kemetayen- se eked kitai te bugtong Timanem. Amin. ¹⁸ Timoteo, pig-iling ta te bata ko, so nayan ini se kenak pehimangno kamno: Aneng-anengi se inikagi te menge pruprita kadengan tepad kamno, amon pineokit nini mekeato ka te menge sumopak te kebenalan. ¹⁹ Empingi se kamno pegpemenal aw siguroi nga se kamno konsensya melinis gayed. Se duma weda penalan te kandan konsensya, nayan netalon se kandan pegpemenal. ²⁰ iling ki Hemeniyo aw ki Alixander, siini dan egtugyan ko den ki Satanas amon dan metagahan nga kana mepiya se meg-indan te medaet batok te Timanem.