¹ Nayan pegsonod kaw kanak kay pigsonod ko heman si Cristo. ² Pigdeyen ko si keyo kay gayed a niyo eg-eneng-enengan aw pigtolo niyo se mge pigtolada ko kenyo. ³ Seini ibeg ko nga metegahan niyo nga si Cristo yan olo se matag meama. Aw se meama yan se olo te baye aw se TImanem se olo i Cristo. ⁴ Nayan te kenyo penegtigom, kon se meama meg-ampo o mekeikagi te kagi te TImanem nga doen tedong te kandin olo, igpemoya din se kandin olo ngo yan si Cristo. ⁵ Aw kon se baye meg-ampo o meg-ikagi te kagi te Timanem nga wedad tedong te kandin olo igpemoya din se kandin olo nga yan se meama aw iling heman nga migpeopaw sikandin. ⁶ Kon se baye kena egtedong te kandin olo mepiya pa nga migpetepo den beling te kandin logay. Meneng tepad kay mekeyaya man tepad te baye kon sikandin megpetepo aw te logay o meopaw. Angay din tedongen se kandin olo. ⁷ Se meama kena angay megtedong te kandin olo kay pineokit kandin gipadayag se tolos aw dengeg te Timanem aw ininang sikandin nga keanggid te Timanem. Meneng se baye ininang te Timanem alang te kedengegan te meama. ⁸ Kay se meama weda inangi lekat te baye kon kena baye yan se ininang lekat te meama. ⁹ Aw weda heman inangi se meama alang te baye kon kena se baye ininang alang te meama. ¹⁰ Yan sian nga se baye keilangan onto megtedong te kandin olo, amon bisan se mge anghel meketagataga nga egpesakop sikandin te meama. ¹¹ Meneng angay heman tadon eneng-enengan nga se kenitadon pegkinabuhi kidoen te Timanem, keilangan se baye se meama aw keilanganen heman te meama se baye. ¹² Kay e menge baye, ininang lekat te meama, aw sine meama lekat te baye meneng se kelahat lekat te Timanem. ¹³ Timbang-timbangi niyi ini angay ba se sebad ke baye nga meg-ampo doton te Timanem nga wedad tedong te kandin olo? ¹⁴ Natural te meama nga mebaba se kandin logay kay keyeyaay kon melayat ini. ¹⁵ Meneng dengeg te sebad ke baye se melayat se logay kay binegayan sikandin te Timanem te melayat nga logay nga megtapon te kandin olo. ¹⁶ Meneng doen ibeg megsopak sini kenami intolada se meikagi ko olo nga wedad kay lain nebetasan gawas kani, aw yan heman se sine intondog te menge egpemenal te Timanem te bisan kenan nga lugar. ¹⁷ Doen book ko isaysay kenyo aw behini ko sikeyo kedeyen tepad kay sen kenyo penegtigom weda pekeibing te kepiyaan kon kena medaot. ¹⁸ Kay nekedineg a nga kon megtigom kaw, negkebahin kaw aw medyo mengintoo a nga doen pegkebenal kani. ¹⁹ Tingali keilangan nga mehitabo ini kidoen kenyo maon metegahan kon sine onto kenyo se benal nga egpemenal. ²⁰ Kog megtigom kaw amon pegseolog te penihapon te Timanem se kenyo ininang sayo. ²¹ Tepad kay weda kaw pegdengan te pegpengasen. Se doma kenyo besog aw hobog den onto meneng sen doma binal'los. ²² Nenga eked kaw man kaen ona aw minem doton te kenyo kaugalingon nga balay. Kay siyan ininang niyo pigpemuyaan niyo se menge kabos aw apil se kelahat menge egpemenal pigtamay niyo. Eden ba se kanak kagi kenyo? Deyenen ko ba sikeyo te siyan kenyo ininang eked onto! ²³ Sini ini se pigtolada kanak te Timanem, aw pigtolada ko heman kenyo nga se Ginoong Jesus sida delem nga igkependayan sikandin nengabat te pan. ²⁴ Aw pena din peselamati si Timanem, igbela bela din ini aw minikagi," Sini se kanak lawa nga igbegay alang kenyo. Inangi niyo ini te peghandom kanak." ²⁵ Pegkepenga dan te pegkaen te pan, nengabat sikandin te kopa nga doen inemenen aw pigpeselematan dan hena ini. Aw mikagi," Sini nga inemenen yan se kaling kesebotan nga palig-onon pineokit te kanak dipanog. Inangi niyo ini te peghandom kanak. ²⁶ Te kad kaen niyo nini nga pan aw peg-inem nini nga inemenen, gimantala niyo se kemetayen te Timanem hangtod te kandin pegliko. ²⁷ Nayan bisan sine se mekekaen kani nga pan aw minem kani nga inemenen te Timanem te pemeukit nga kena lobas mekesala batok te lawa aw di panog te Timanem. ²⁸ Keilangan megsusi ona te kada sebad te kandin keotawen te weda pa sikandin komaen te pan aw menem te inemenen. ²⁹ Kay kon komaen sikandin aw menem nga weda din eneng-enengi pag-ayo se kedegdagan tepad te lawa aw te Timanem, mekebegay olo ini te pelemen te kandin keotawen. ³⁰ Sian yan nga medita kenyo se megkelomay aw elegen, aw se doma gani egkemematay. ³¹ Apan kon susihen tadon ona se kenitadon keotawen kon nebetan tadon ba se kegegdagan tepad te lawa aw depanog te Timanem, eked kidon pelimeni te Timanem. ³² Kon kenitadon menge egpemenal igpelemen te Timanem, pigtolodan kidon din amon eked kidon mekeakop te peg okom te mge otaw dini te kelibotan nga kena egpengintoo kandin. ³³ Nayan menge kedowa ki Cristo, kon megtigom kaw te pegseolog te penihapon te Timanem pegtegaday kaw te pegpengasen. ³⁴ Kon doen binal'los, komaen ona sikandin doton te kandin balay amon eked kaw pelemune te Timanem tepad te kenyo ininang kon megtigom kaw den se tepad te doma nga menge kedo'nan, hisgoten ko den olo te kanak pegdateng kidoen.