¹ Nwuupuwele ayenatja wiira ahaana yaahissimwaka akhulupale ni ahooleli nuuwiiwenla, wiira nkhale owiitthonkomaniha ni miteko tjooteene tjooreera. ² N'hinruwane ntthu, n'hiwanihanatje, oreera nrima ni mwiiyevihe naatthu ooteene. ³ Kontha hiivano, khalayi khanaarina wuupuwela ni naari oohanhuriha, oohiloka, nuutjivelatjiya, hii naakhala nipankaka tjootakhala, ninttima, naari atthu oorussihanatja nissunkaka nrunkwa ntthu ninkhwaawe. ⁴ Massi oreera nrima wamuluku, moopoliihu, ninfentwaawe niwiiyeviha nihoopwaa. ⁵ Woohikhala nimiteko tjossariya tjinipankalyaawe, massi wonayeeli ekiriritjawe, yena honoopola oyariyawihu, nuureerihiya won'nepa nttakattifu. ⁶ Yooyo honikurussela wahii eriyari wa yesu kristu moopoliihu. ⁷ Wowiira nitaphuwatje womahalaawe, nikhale ookela mwiikumini yoohimala. ⁸ Nuulumon'na nokhweeli, kipheelaka wiira wuulume wookhuluveliya tjen'nha tjitthun'nha, wowiira yaale anonroromela muluku akhale owuupuwela orattatjene ovara miteko tjooreera, tjen'nha tjiri tjooreera ni tjofayita naatthu ooteene. ⁹ Massi ratta nimoolumo eetirikhi, ephattuwelo, onhakulihanatja, ni ovaanhihanatja mwaha wokettelo, tjen'nha tjitthun'nha khatjirina ehissapu ni khtjirina efayita. ¹⁰ Munkhotte ntthu nkookhala akawanyaatjaka eriyariinhu, onamuupussenre emaara emotja wala piili. ¹¹ Ni ntjuwelaka wiira yooyo ntthuuyo hohapuwa nttala wowiira nkhala avaraka tjootakhala ni iitthukaka mwaneene. ¹² Koovahenraka Artemas wala Tiquico, wakiipheelatje waryaakawa Nicopoles, kontha kiholakela ovira woowu eyiita. ¹³ Waakuve ni onrume Zenas, taateenhu, ni Apolo, nkwahaniwaya, wiira hoohaleeleni etthu. ¹⁴ Wowiira tootho awihu atjuwele miteko tjooreera ni tjoovara tjoophwanela, wiira ahikhale ohiima mihokhorokho. ¹⁵ Atthu ooteene ari nimi anawoossenlihani. Ni mwassenlihe yaale anfenta waamini. Mahala akhale nunhu. Amem!