¹ Paulo nanteko amuluku ni nrumeyi ayesu kristu wonayeeli waamini waatthu oothanliya amuluku ni otjuwelatja wokhweeli wonayeeli oreera nrima. ² Mun'roromeloni weekumi yoohimala yamuluku, hinootha, hororomeliha mahuku ahinaphiya oohimala. ³ Nin owakathi wooreerela yena woonihera nuulumonawe, eriyari woolaleiya nuulumo, nen'no kivahatjeriyaaka, otthuna wamuluku. ⁴ Amwantikhelaka Titu, mwaamwanaka okhweeli, wonayeeli waaminiwihu wamotja. Mahala nin'nema namuluku, ni kristu yesu moopoliihu. ⁵ Wiihiye niitthu yoophulessa ocreta, wiira winssathi saana tjitthu tjihimaliheriye, ni waatthenkatjaka ahakheli n'mapooma, toko tjuurumalyaaka. ⁶ N'hakheli haana okhala oohitthukeliya, okhalana nthiyana n'motja paasi, naassaana owaamini, ohootheriya ohiloka wala ohirumiya. ⁷ Onaaphwanela nkhulupale, toko nanteko amuluku, akhale oohivaanhihiya, yena hikhale oohiloka, wala owaakuva orussiya, wala owurya nipha nintji, wala owaattakana, ootjivelatjiya. ⁸ Ohiyavaa, yena haana okhala thayaari woopheela waakhela aletto, okhala ooreera nrima, owiinematjera, ossariya nittakattiifu, ni ootjuwela wiirattavenla. ⁹ Yena haana okhala ootjuwela ossomiha nuulumo wowiira akhale ootjuwela olipihera nketteloni ni tjitjon'mo waavaanhiha ale ahinaamini. ¹⁰ Maana ahaavo entji oohitthuna ohimeeriya, ventji ventji yaale owiineliya, anaathepya nuuwettihenra atthu ephiro yoohikhweeli, moolumo ari oohifayita. Yaayo anphwanela omaalihiya. ¹¹ Ayena anaasomiha ele yahaaphwanela ossomiha, wowiira aphwanhe efayita yoohittittimihiya, akwanhulaka maloko mentji. ¹² Namaloha n'motja ahiira: Atthu ocreta ankhala anawootha, enama tjootakhala ni tjowoopiha, n'mirimani mowoopiha. ¹³ Yoohimiyeela enkhala yokhweeli, phimaana waavahiye ventji wowira ayena akhale ootjuwelatja mookupalini. ¹⁴ Ohiiwelele mihapo tjomajudeu, hata ekettelo tjaatthu tjin'hapussa ekhweeli. ¹⁵ Vano yaale ahiri ooreera, tjooteene tjiri tjooreera, massi waale ari oohireera ni ohaamini kahi ooreera, kontha anpanka akhilyaaya ni muupuwelelwaaya. ¹⁶ Ayena aniira anantjuwela muluku, massi anakhotta n'mitekoniwaya, ayena ankhala oovaanhiha ni oottiya maaru ni anamoonya okhala oorephuwa nteko phunteko.