¹ Rwaale vai wan'nyooyo, oreera wa athiyana oteene! Kusale ephironi wan'nyooyo, wo wiira nivira nimpheelaka ninyuuva! Nthiya ole uluma veekha: ² Wan'nyaka khuruwenle ojardim, wa ekanteero tjo tjithu tjoonukhela wo wiira alihere ejardim ni para othukumaniha ethutu tjoonukhela. ³ Mi awan'nyaka, awan'nyaka ayo awaka; yena nalihera wa riyari wa ethutu tjoonukhela wooreerela. Wan'nyawe nthiyana ole amulumanaka yena: ⁴ Ohoreera tjinene toko Tirza, nifento naka, ofentyaa toko Jerusalem, otjiviha ethu toko anakhotto ni epantera tjaya. ⁵ Orukusele ottayi waka mentho ayo, kontha anakihuviha. Ekharari tjaa tjiri toko nikhoto nopuri tjikhuruwelaka mapuro owattamenla Mwaako Gileade. ⁶ Men'no aa ari toko nikhoto noo pwittipwithi tjiruaaka orapihiya. Wakuta ehaana mwaana nivatta, ni khiivi eri wo hin'huwo. ⁷ Marama ari toko emetaade wo miri tjooreera ottuli wa nleeso. Wan'nyawe nthiyana ole amulumanaka yoole: ⁸ Ahaavo mapwiyamwene sapiini, mimweetti thamaaniini ni athiyana ohalikelyaa. ⁹ Maasi ekhuntta aka, yoreera, eri emotja; yena mwaana ophuanela wa anumwaane; yena opheeliya naale an'yarale. Asaana anamalima ahomoona ni ahomwiihana oreerihiya; mapwiyamwene ni mimweetti ahomoona, ahonthamala. Mapwiyamwene ni mimweetti yaahimyaleni: ¹⁰ Tipani yoola olikana toko onaasa, oreera toko mweeri, owaarya toko ntjuwa, otjiviha toko anakhotto nipantera tjaya! Wan'nyawe nthiyana ole amuulumelaka yena: ¹¹ Kihikhuruwela etakhua yo miri tjoreera wiira koone ophuwa wo thutu, wiira koone tjakhala wiira miri tjahantjera win'ma, ni miri n'yo tjahantjera okhuma ethutu. ¹² Kaari otteeliya koonaka wiira toko kineetta akaroageni ya mwene. Wan'nyawe nthiyanoole amuulumanaka yena: ¹³ Nkahokolya, ohokolye, nthiyana oreera. Nkahokolya vo wiira kuuwehe. nthiyana ole amuulumelaka wan'nyawe: Onkiwehani, nthiyana oreera, wookhalaka toko kinin'na wa riyaria wa namarattaratta!