¹ Kookela njardini waka, nrokoraka, mwaraka, koothukumaniha makhura aka onukhela ni ekarumatjaka tjoonukhela. koolya oravo; koovurya eviinyu aka ni eleeti aka. Asipathani yuulumanaka asettyaaya: ''Nkalyani, asipathaniaaka! Nkavuryani ni mwiihapalihe nifento!'' Mwaavano uulumaka veekha: ² Kaahorupa, masi nrimaka waari woovuwa muunttorani. Wiihana wa wan'nyaka, yiiraka nkahula nkhora, nrokoraka, mwaaraka, ekhuntta aka, harusi aka, kontha muru aka ori woonana ni okame; ekharari tjaka, ni okame wo hiyu'. ³ Kihorula ekuwo tjaka; kiware tho; Kihorapiha enyaa tjaka; kihiirihetho;''. ⁴ Wan'nyaka weese ntata naa wa n'hula wa yeele enthuka wankhora, nrimaaka waahokhala onthapelaka yena. ⁵ Kahokala ovuwa wo wiira kaahulele nkhora awan'nyaka; matata aka yaari attonyaka makhura, ekokhotja ni makhura onukhela, wa trankani yo wankhora. ⁶ Kihaahulela nkhora awan'nyaka, masi awan'nyaka yaahohokolya phurwaaka. Nrimaaka wahokhala wootjukula; kahokhala wohitjiva tjiviya. Kahovira kimphelatjaka yena, masi akimphuanyale; kahomuihana yena, yena khakaakhulale. ⁷ Masentineela yaari wakhiviru ni wa citati ale ahokiphuanya; ahokitupela ni ahokirakaliha. Maguaarda yahokumiha ekuwo tjaka''. Ntjiyana ole uulumanaka athiyana oncitati m'mwe: ⁸ Kimpheela wiira nkikhuluvelihe, asaana oJerusalem, wiira, mwaaphuanya awan'nyaka, n'wiirele wiira kinaaweren'ya nlatto wo nifento naka ni yena'''. Athiyana oJerusalem an'himeeryaka mwanthiyana ole: ⁹ ''Okhala wiira wan'nya oyo oreera owaavikana alopwana oteene, we tuwe oreerale owaavikana athiyana: Kontha wan'nya oyo phooreera owaavikana alopwana oteene, vano onilepelaka wiira niluphele toko tjo; Nthiyana yoole ulumaka eriyari wa athiyana ocitati: ¹⁰ Wan'nyaka oyo ophareela ni ni oweela, oreera wo waavikana ekonto khuumi. ¹¹ Muru awe ori toko ewooru yoreera: ekharari tjawe tjoovatjiya ni tjooripa tjonlikan'nana nakhuku. ¹² Mentho awe ari toko ekhuntta tjookhala wakhiviru wankhuma aya maatji, tjoorapihiya ni eleeti, tjoweesiya toko ejooia. ¹³ Marama awe ari toko ekori tjokaruma tjoonukhela, enukhelihakha tjithu tjoonukhela. Mattere awe ethutu, tjoomwariseliya makhura. ¹⁴ Moono tjawe ewooru yoopharela yooreeriheliya ejooia; nthukwa nawe men'no ottiyenliya ni esafira. ¹⁵ Metto tja tjinkhala mapotto omarmore, oowesenriya mithitteryo tjo wooru; makhalelo aya ari toko eLibano, tjothanliya toko ecedro. ¹⁶ Malaku aa ootjiva tjinene; yaayo khueeli oreeresa. Ola phiwan'nyaka, yoola phimpathani aka, asaana oJerusalem''.