¹ Apwiya, Nluku oovara tjintthuneenhu, n'noonihere, Nluku oovara tjintthuneenhu. ² Nlamule elapo! Mwaavahe atthu owiittottopa etthu yowaapwanela. ³ Apwiya atthu omwiipiphini an'hala otthapa npaka eyaakani. ⁴ Ayenatja anuuluma moolumo oohikhala; Ooteene yaale amvara tjootakhala anawiittottopa. ⁵ Ayenatja anawiivakatja atthweenhu, Apwiya; ayena anaakuthakutheehatja elapotjinhu. ⁶ Ayena anamwiiva nankhweli nintthu ookhuma ottayi, ni anawiivatja ekhwaatjuni. ⁷ Ayena aniira: Apwiya khan'hala woona, Nluku owaJaco khivo en'halaawe otjuwela. ⁸ Mwiiweehe, nhu alolo! Ni nhu atirikhi, n'nohala otjuwelatjatho eyaakhani. ⁹ Yoole unpale maaru khan'hala wiiwa. Yoole unpale meetho khan'hala woona. ¹⁰ Yoole nvaha otjuwelatja elapo tjooteene khanvaanhiha. Yooyo phinonvaha ntthu otjuwelatja. ¹¹ Apwiya anaatjuwela muupuwelo tjantthu, tjiri erutthu emotja. ¹² Ooreerihiya phuule nontthukeleenhu, Apwiya, yoole nonfunttiheenhu ekettelweenhu. ¹³ Mun'nonmumuliha mahuku oorikarika, npaka wantthukuwaaya nlikitti nan'malapo. ¹⁴ Kontha Apwiya khan'hala waahiya atthwaaya. ¹⁵ Kontha olamuliya on'hala okhala wossariya; ni ooreera mirima ooteene anaahala ontthara. ¹⁶ Tupani n'hala okaakihera atakhali. Tupani n'hala okaakihera oohiloka. ¹⁷ Apwiya yahaari nhaviherwaaka, kaakookhala nipuro noomaalelyaa. ¹⁸ Owakathi wiiralyaaka, n'nhaanaka ninaavulukutha, nfentweenhu wokhweeli, Apwiya, waahokikhavihera. ¹⁹ Tjakintjiva mikutakutho, nlipiherweenhu onaakimaaliha. ²⁰ Mapuro oohiphwanela, yaayo ankhala mwantjina nokettelo, anaatakaneela ninhu. ²¹ Ayena ankhala nkhayi wiira akumihe ekumi yanassariya, ni apheelaka omwiiva. ²² Massi Apwiya ankhalaka nlipiherwaaka; Nlukwaaka mwala ontthawenlwaaka. ²³ Yena naahala waawaanela tjoovaratjaya ni naahala waakwanhula mwatjoovaratjaya. Apwiya, Nlukweehu, naahala weemessera.