¹ Phiyooreera waavaha maha Apwiya ni wiipa mwantjinanaya, ooh owiirimu! ² Ni okhuwela owitjissu nfentwaaya wokhweeli ni, ohiyu wooteene, ekhweelyaaya, ³ niikoma yomikhoyi khuumi nintjuu nooreera. ⁴ Kontha Nhu, Apwiya n'hokitjiveliha nimitekotjinhu. Kinaahala ottottopela miteko tjon'matataniwinhu. ⁵ Mitekotjinhu tjuulupale, Apwiya! Muupuwelelotjinhu tjowinssa. ⁶ Ntthu oohiloka khanrimeela, wala ntirkhi ninaatjuwela: ⁷ Nlolo nuunuwa phanka ethutu, ni hata atakhali ooteene, ari oolamuliya mookwanhuwatja woohimala. ⁸ Massi Nhu, Apwiya, n'naahala oholela woohimala. ⁹ Weekhweeli, mwaawehe awananiinhu, Apwiya! Weekhweeli, mwaawehe awananiinhu. Anvara tjootakhala ooteene anaahala otthawanatja. ¹⁰ N'nawintjenraka ekurwaaka, phanka ekuru yomope yontakhwani; kitthapeliye nimakhura makithi. ¹¹ Maarwaaka an'niiwaka nimeethwaaka an'noonaka okwanhuwatja waawananiaaka. ¹² Nassariya n'hala opipilela phanka n'nika ni naahala wuunuwa phanka ecedro. ¹³ Tjaaliye npaani mwaaPwiya ni tjin'hala opipilela nluwani mwaNlukweehu. ¹⁴ Tjinaahala wiima mihokorokho hata tjuuluvale; an'hala okhala oolipa tjinene ¹⁵ wowiira alalyee wiira Apwiya phossariya. Ayena mwalaaka ni khiivo ehinpankaaya.