¹ Mwiipe, nintju nuulupale, waNluku, nkhuweleke nootteeliya waNluku aJaco. ² Mwiipeke ntjipo no moopeke yooruma, yooruma yooreerela. ³ Moopeke nipenka nihuku nophiyaaru ni nihuku nomweeri wophiyaaru, mahukweehu ossukuhuulu yantjeravale. ⁴ Kontha nlamulo nowiisrael, ekettelo evahiye niNluku aJaco. ⁵ Yaahohimyatja phanka ekettelo wa Jose, waaryaawe niilapo yowiigiipitu, wiiwalyaaka eluuka yahaatjuwelaaka. ⁶ Kaahaakumihatja nmitekoni tjoolipa tjaarinaaya; yaahotaphuwatja. ⁷ Moohuvanimwaa, ohokhuwela nimi kihookhavihera; Kihowaakhula n'nihutteni nooripela notari. Kihoottehatteha naatjini ooMeriba. ⁸ Mwiiwe, atthwaaka, ontha kinaahala wookhaviherani, ooh Israel. Mwakiiwaru! ⁹ Eriyariinhu n'hikhalane anluku oohikhala; n'hinkokhorele nluku nkhwaawe. ¹⁰ Pwiya timi, Nlukweenhu, ookumihaleni elapo yowiigiipitu. Nlepele enpheelenhu kinawoovani. ¹¹ Massi atthwaaka khayiiwale moolumwaaka; Israel khakiiwenlale. ¹² Vano, kihaavaha ohitthunawaya etthu, wiira apanke enpheelaaya. ¹³ Ooh, atthwaaka anakiwenlale! Ooh, atthwaaka aneettale n'mittalaniwaka! ¹⁴ Wowaakuvyaatja kanawaariha awananiaaya ni kaanaarukunussa ntatanaka wayaale anaahuviha. ¹⁵ Wayaale anaathanha Apwiya an'nowoova! Aliyaliye woomalela. ¹⁶ Kinaahala onliha Israel niitiriku yomaana; kaanaahala wootjivelihani nooravo woomwala".