¹ Munkhuwele Nluku nootteeliya, elapo yooteene; ² Mwiipie ni waarya mwantjinanawe; mwiipe nohakalala. ³ N'mwiireleke Nluku: Tjowoopiha mitekotjinhu! Wuunuwa wokurutjinhu, awananiinhu anaahala wootakaneelani. ⁴ Elapo yooteene enaahala wootthapelani ni enaahala owiipelani; ayenatja anaahala owiipelani etjipo mwantjinaninhu. ⁵ N'mwe ni n'wehe miteko tjaNluku; tjowoopiha naassaana aatthu. ⁶ Ayena epahari ahokhaliha yowuuma; atthwaaya ahovira yeettaka; vaavale naahaatthapela. ⁷ Ayena anaahoolela woohimala nooweryawaya; meethwaaya an'noweha elapo; atakhali ahiittottopeke yaayoru. ⁸ Munttottopele Nluku, nkhaliheke etjipwaawe yowiiwaniaa. ⁹ Ayena an'nikhaliha akumiru, ni khantthuniha wiira enhaatjihu tjirimeele. ¹⁰ Kontha Nhu, ooh Nluku, n'honilawihatja; n'honilawihatja phanka eparatha tjinlawihiyaaya. ¹¹ Nhu n'honiwiiha wanryankhoni; Nhu n'honirerya ettuli. ¹² Nhu n'haahiya atthu aninhakelatjaka; nihovira wamooroni ni n'maatjini, massi Nhu n'honiwiiha nipuro nonkhuluvelo. ¹³ Kinaahala owa owanuwinhu nookuttho; kinaahala oliva tjookhuluvelihatjaka, ¹⁴ tjen'nho matteryaaka tjaakhuluvelihalyaaya nimalakwaaka tjuulumalyaaya kinahuvale. ¹⁵ Kinaahala woovahani okuttho tjonama tjowiittivala, ni tjootjiva tjoonukhela tjonama; kinaahala ovaha enama tjintjiru. ¹⁶ N'mwe ni nviriyane, ooteene nhu n'nomoova Nluku, ni kinaahala ohimyatja envarakaaya wanrimaniwaka. ¹⁷ Kinaahala waakhuwela nimalakwaaka ni ayena yaattottopeliye ninliminaka. ¹⁸ Etanpyaaka onari wiira yaari wanrimaniwaka, Apwiya khayaahala okiiwa. ¹⁹ Massi Nluku weekhweeli aahiiwa; Ayena yaahoviriyana mavekelwaaka. ²⁰ Oottottopeliya akhale Nluku, hikhottale mavekelwaaka, wala ninfentwaaya wokhweeli.