Ekapiitulo 119
1
Ooreeriya phayaale meettelwaaya ahintthukeliya, aneetta nketteloni tjaApwiya!
2
Ooreeriya phayaale anssunka tjoweettela tjowaataanawaya,
3
ahinvara yootakhala, massi aneetta n'mittalaniwaya.
4
N'honiirela wiira nissunke tjoorumatjinhu, wiira neettele niwaamini.
5
Kikhaleke kiiwelelaka ekettelotjinhu!
6
Vano, akin'hala woona ehaaya keettelaka tjoorumatjinhu.
7
Kinaahala owiipelani ninrima wokhweeli, kafuntta essariyatjinhu tjeephuki.
8
Kinaahala okhalela ekettelotjinhu; n'hikihiyetho!
9
Mwaavano n'hala okhaliha tjani ekumyaawe yooreera. Iissunkaka ninuulumoninhu.
10
Ninrimaaka wooteene kinawoorweelani; n'hikihiye kihuluwaka tjoorumatjinhu.
11
Kihovitha moolumweenhu wanrimaniwaka wiira kihookossereni.
12
Oottottopeliya phinhu, Apwiya! Nkifunttihe ekettelotjinhu!
13
Nimalakwaaka kin'nokhuwelaka moolumweenhu.
14
Munttalani tjokettelo tjowaataanawinhu, kinaatteeliya ventji woovirikana mihakhu tjooteene.
15
Kinaahala wuupuwela tjin'nifunttiheenhu ni kinaahala okhala n'mittalaniwinhu.
16
Kinawiivahenra nketteloniwinhu; akin'hala oliyala nuulumoninhu.
17
Munkhalele ninfento nantekweenhu, wowiira kikhale ni kissunke nuulumoninhu.
18
Nkikhavihere wowiira kitjuweleke miiriirya tjokettelotjinhu.
19
Kinawiitjeetta paassi vathiva; n'hikivithe tjoorumatjinhu.
20
N'nepaaka onkhala nimalamulweenhu ooteene.
21
Nhu n'nawaatthukela owiittottopa, ootakhala nrima, ahineettela tjoorutjinhu.
22
Nkikumihe tjootakhala nootanhifwiya, kontha kin'nossunka ekettelo tjowaataanawinhu.
23
Ahooleli hata wankuulumaaya, nantekweenhu naahoolela ekettelotjinhu.
24
Ekettelo tjowaataanawinhu nroromelwaaka, ekanotjaka.
25
N'nepaaka ohotakaneela nintthupi! N'kikhalihe wonayeeli nuulumoninhu!
26
Mi kihoottonkelani makhalelwaaka, ni Nhu n'hokaakhula. N'kifunttihe ekettelotjinhu!
27
Nkitjuwelihe tjoofunttihatjinhu, wowiira kikhalaneke tjoofunttihatjinhu tjomiiriirya.
28
N'nepaaka onaatjukula. Nkimaalihe, wonayeeli ninuulumoninhu.
29
Nkihulusse n'mittalani tjoohilika ni nkifunttihe womahala ekettelweenhu!
30
Kihothanla nttala wokhweeli ni kiholakela otthara essariyatjinhu.
31
Kin'niivahenra nketteloni tjowaataanawinhu; kihoonihatjiye ehaaya, Apwiya.
32
Kinaahala otthara nttala watjoorumatjinhu, kontha mun'notthukula otjuwelatjawaka.
33
Nkissomihe, Apwiya, nttala wokettelotjinhu, ni kinaahala ottharenla npakha woomaleloni.
34
Nkivahe otjuwelatja wiira kitthare ekettelweenhu ni kinaahala ossunka ninrimaaka wooteene.
35
Nkeettihere munttalani watjoorumatjinhu, kontha watjen'nho kihiivahenra.
36
Nrukunussele nrimaaka oketteloni wowaataanawinhu, woohikhala waalupattha atthu akhwaawe.
37
N'hulusse meethwaaka wowiira ahoone tjitthu tjoohikhala! N'kikhalihe munttalaniwinhu.
38
Munkhuluvelihe nantekweenhu wayeele yaakhuluvelihaleenhu an'woovani.
39
N'kihulusse tjoottehattehiya tjinkihiya koovaka, kontha kinaatjuwela wiira tjoophukatjinhu tjooreera.
40
Kin'neettela tjinkifunttiheenhu; n'kikhalihe niissariyeenhu!
41
Apwiya, phanka tjikhuluvelihaleenhu, okiweele nfetweenhu ni woopolawinhu;
42
tjitjon'mo kinaahala otjuwela tjowaatjipwa ankoomolaniha, kontha kinkhuluvela nuulumoninhu.
43
N'hikumihetho nuulumo nokhweeli mwaanomwaka, kontha kinanriiha tjoophukatjinhu.
44
Ttjitjon'mo, kinaahala woona ekettelweenhu, woohhiyenra, mahuku ooteene;
45
kinaahala weetta ninkhuluvelo, kontha kinrweela tjoossomihatjinhu;
46
ni kinaahala ottonka ekettelotjinhu tjoowaataana ohoolo womamwene, ni akin'hala woonihatjiya ehaaya.
47
Kin'nofenta tjoorumatjinhu.
48
Kinaahala ovussera matata tjoorumatjinhu, tjinfentaaka, ni kinaahala okhala niikettelotjinhu.
49
Muupuwele nuulumo noolumale nantekweenhu, nen'no n'hokivaha wanriiha!
50
Phinkimaaliha moohuvanimwaka: Nuuluoninhu nikivahe ekumi!
51
Yaale aniikukhuliha anakitarawa, ni akin'hiya Ekettelo tjinyu.
52
Pwiya, kinawupuwela Makhuluveliho en'nyu okhalayi, ni kin'nomaalihiya.
53
Otikinihiya ohokiphuanya, nlatto waamalaponi, kontha anaakhotta Ekettelo tjinyu.
54
Ekettelo tjinyu tjinkhala etjipo tjaka wa nupani moweettelawaka.
55
ohiyu wooteene, kinawuupuwela ntjina ninyu, Pwiya, ni kinasunka ekettelotjinyu;
56
n'wo phuri othunawaka, kontha kinasunka Ettelo tjinyu.
57
Pwiya, Nyu nri ohiyeriya waka! Kihokhuluveliha osunka Molumo en'nyu.
58
Ni nrima wooteene, kinasonttelela Mahala en'nyu; nkoonele ekiriri, wo nayeeli Nulumo ninyu.
59
Kihowehaweha mittalatjaka ni kiheettihera ekettelo tjowaataanawinhu.
60
Kinawaakuvatja ni kinaapitjapitja nooviriha tjoorumatjinhu.
61
Awanani anaakipheelatja, wanookhalaru tjon'mo akinliyala ekettelweenhu.
62
Ohiyu eriyari kin'novuwa woovahani mahala mwaha wossariyatjinhu.
63
Kinpatthani aatthu ooteene an'woovani ni ankhalela tjoossomihatjinhu.
64
Elapo enootjara nfentweenhu, Apwiya. Nkifunttihe ekettelotjinhu!
65
N'haana n'nema ninantekweenhu, wonayeeli nuulumoninhu, Apwiya.
66
Nkifunttihe wuupuwela nootjuwela, kontha kihotthuna ekettelotjinhu.
67
Waaryaaka kihinahuva, keetta mootakhala, massi, n'navaa, kin'niiwelela nuulumoninhu.
68
Nhu n'haana n'nema ni n'naapanka yooreera. Nkifunttihe tjoorumatjinhu.
69
Atthu oovavaryaa an'nokootheryatja, massi, ninrimaaka wooteene, kin'niiwelela ekettelotjinhu.
70
Mirimatjaya tjiri tjoolipa; phimaana mi kin'neettela ekettelweenhu.
71
Waari etthu yooreera opatjalyaaka ohuva wiira kifuntte ekettelotjinhu.
72
Nootepessa okitjivela nuulumoninhu woovirikana ekonto ekontotjene tjoparatha niiwooru.
73
Matateenhu ahokunpa ni ahokuunuwiha; nkivahe otjuwela wiira kifuntte tjoorumatjinhu.
74
An'woovani anaahala ohakalala yakoonavale, kontha kinanriiha nuulumoninhu.
76
Kin'nuupuwela, Apwiya, wiira ephukitjinhu tjossariya, mwaahokihuviha mwaha wonfentweenhu.
75
Kinaavekela wiira kikhale oolipa ninfentweenhu, wonayeeli nuuluninhu nin'vahaleenhu nantekweenhu.
77
Okikhuruwele nfentweenhu ni kinaahala okhala, kontha kinaakupaleela ekettelweenhu.
78
Owoonihatjiya ehaaya akhale atthu oovavaryaa, ankuuluma onhala.
79
Akihokoleele, an'woovani; yaale antjuwela ekettelo tjowaataana.
80
Nrimaaka okhale woohitthukiya wohissima wokettelotjinhu, wiira kihoonihatjiye ehaaya.
81
N'nepaaka onpheela otaphuwatjawinhu; kinanriiha nuulumoninhu.
82
Meethwaaka ananriiha tjookhuluvelihatjinhu: n'nohala okimaaliha eyaakhani.
83
Kinookhalaru phanka ntiita wonipha vamwiissini, nanlelo akinliyala ekettelotjinhu.
84
Mahuku anantekweenhu ankookhala makavi. N'nohala waalamula eyaakhani yaale ankoomolaniha.
85
Atthu oovavarya ahineetta wonayeeli ekettelweenhu, ahokithipelatja nlikitti.
86
Tjoorumatjinhu tjooteene tjokhweeli. Nkikhavihere wayaale ankoomolaniha woohissariya.
87
Ayena yaahala vakaani okikumiha elapweela; mi phimaana, akin'hiya tjinssomiheenhu.
88
Mwaha wonfentweenhu, nkikhalihe, wowiira kissunke ekettelotjinhu.
89
Apwiya, womahuku ooteene nuulumoninhu phinowiirimu.
90
Ekhweeliinhu enkhala nikhoto ni nikhoto. Nhu n'hunpa etthaya, ni yeeyo ehaavo;
91
ni malamulweenhu, ehaayo npaka nihuku nolelo, kontha tjitthu tjooteene tjiri muntekoniwinhu.
92
Kihikupaleelale ekettelweenhu, kinarimeelale moohuvanimwaka.
93
Akinliyalatho ekettelotjinhu, kontha watjen'nho Nhu n'naakivaha okumi.
94
Mi kaawinhu; nkoopole kontha kinrweela ekettelotjinhu.
95
Amalapo anpheela okikwanhula, massi kiri oweheeha ekettelo tjowaataanawinhu.
96
Kin'nowehaka omalela womiteko; massi, tjoorumatjinhu khatjin'malela.
97
Tjinfentaaka ekettelweenhu! Nkhaviherwaaka nihuku nooteene.
98
Tjoorumatjinhu, tjinkhala mahuku ooteene nimiivano, tjinaakivaha otjuwelatja tjinene ovirikana naawananyaaka.
99
Kihaana otjuwelatja tjinene ovirikana nimafuntyaaka, kontha kinkhala niikettelo tjowaataanawinhu.
100
Kinawiiwa tjinene ovirikana nimahumu, kontha kin'nossunka tjinkissomiheenhu.
101
Kinaahuluwa mittala tjootakhala wiira kiiwelele nuulumoninhu.
102
Akin'hiyatho essariyatjinhu, kontha mun'nokifunttiha.
103
Moolumweenhu phooreera! Khweeli, ootjiva mwaanomwaka ovikana oravo.
104
Eriyari watjoossomihatjinhu, kin'nophwanha otjuwelatja, phimaana kin'nohiya nttala woohiloka.
105
Nuulumoninhu nthuko wonhaatjaka ni nthuko wonttalaaka.
106
Kihokhuluveliha ni kinaahala oviriha: kinaahala wiiwelela essariyatjinhu.
107
Kihohuva tjinene! Apwiya, nkikhalihe wonayeeli nuulumoninhu.
108
Mwaakhenle, Apwiya, tjoovaha tjiivahenralyaaka tjon'mwaanomwaka, ni nkissomihe essariyatjinhu.
109
Ekumyaaka enkhala yookutakuthyaa; wanookhalaru tjon'mo, akinliyala ekettelweenhu.
110
Ntakhali hokiryeela nryankho, massi, akin'hiya tjoossomihatjinhu.
111
Kihokussa phanka etthuvwaaka ekettelo tjowaataanawinhu, kontha phinkitteeliha wanrimaniwaka.
112
Nrimaaka ohokupaleela wiiwelela tjoorumatjinhu womahuku ooteene.
113
Kin'noona yaale anpanka tjitthu tjoohikhala, massi kin'nofenta ekettelweenhu.
114
Nhu mwanikhukunaka ni mwankhaviherwaaka; kinanriiha nuulumoninhu.
115
Nkihuluwatje, atakhali! Kinpheela otthara tjooruma tjaNlukwaaka.
116
Nkikhavihere phanka tjookhuluvelihatjinhu wiira kikhale; n'hitthunihe wiira koonihatjiye ehaaya mowanriihaniwaka.
117
Nkikhavihere ni kinaahala woopwaa; kinaahala ovarela nteko tjoorumatjinhu.
118
N'nawaakhotta atthu ooteene an'huluwa ekettelotjinhu, kontha atthu alolo ni oohiloka.
119
N'nawaakhotta, phanka ehalahala, atakhali ooteene ovathi; phimaana, kinaafenta ekettelotjinhu tjowaataana.
120
Erutthwaaka enaathukumela wowoova ohoolowinhu, ni kinawoova essariyatjinhu.
121
Kin'vara yossariya ni yooreera; n'hikivahenre mwaatakhali.
122
Nkhuluvelihe okhala ratta wanantekweenhu; n'hitthunihe ntakhali wiira akihuvihe.
123
Meethwaaka ankhala owootjyaatja yanriihaka nuulumoninhu ni yookhuluveliheenhu.
124
Nantekweenhu munkhalihe phanka waataanawinhu, ni nkifunttihe ekettelotjinhu.
125
Kinantekweenhu; nkivahe otjuwelatja wiira kitjuwele ekettelo tjowaataanawinhu.
126
Owakathi woopheela otthunela, Apwiya, kontha ayenatja ahohiya ekettelweenhu.
127
Kinaafenta tjoorumatjinhu tjinene ovikana ewooru.
128
Phimaana, mwatjooteene kintthara tjoossomihatjinhu, ni tjinaakikassiri tjitthu tjootakhala.
129
Ekettelo tjowaataanawinhu phitjooreera, phimaana mikinaaweha.
130
Otaphuleliya womoolumweenhu onaamwaleela ni onawaavaha otjuwelatja atthu.
131
Kinawaathama ni kinawiittha ephumu, kontha kinpheela tjoorumatjinhu.
132
Nkihokoleele ni nkoonele ekiriri, phanka tjinaapankakeenhu anfenta ntjinaninhu!
133
Nkeettihere n'nuulumonimwinhu; n'hihiye wala etampi emotja ekihoolelaka.
134
N'kihulusse n'mahuvihoni mwaatthu; tjitjon'mo, kinaahala wiiwelela tjoossomihatjinhu.
135
Nkoonele ekiriri ni nkifunttihe ekettelotjinhu.
136
Emuro tjomeethori tjineetta n'meethoniwaka, kontha atthu khanvarela nteko ekettelweenhu.
137
Nhu mwanassariya, Apwiya, ni essariyatjinhu tjokhweeli.
138
N'hopanka ekettelotjinhu tjowaataana niissariya ninfento muulupale.
139
Opheelawaka onaakikhuura kontha awananyaaka aholiyala moolumweenhu.
140
Nuulumoninhu phinanantekweenhu naafenta.
141
Kinookhalaru mwankaani ni ootanhifwiya, akinliyala tjoossomihatjinhu.
142
Essariyeenhu essariya yoohimala, ni ekettelweenhu ekhweeli.
143
Mahuviho ni mikatjamiho tjinookiphwanharu, tjoorumatjinhu okhalawaka.
144
Ekettelo tjowaataanawinhu phitjossariya tjoohimala; nkivahe otjuwelatja wiira kikhale.
145
Ninrimaaka wooteene, kinawookhuwelani. Nkiiwe, Apwiya, ni kinaahala ossunka ekettelotjinhu!
146
Kinaakhuwela: nkoopole, ni kinaahala wiiwelela ekettelo tjowaataanawinhu.
147
Kinaavuwa ohinassa ni kinaakhuwela wonkhavihero. Ninuulumoninhu phiwanriihawaka.
148
Meethwaaka ankhala yoonaka kiwehawehaka ohiyu, wiira kiiwe nuulumoninhu.
149
Mwiiwe nuulumonaka wonayeeli nfentweenhu wokhweeli, Apwiya; nkikhalihe phanka essariyatjinhu!
150
Ankoomolaniha ahokaattamenla; ayena ahohuluwa ekettelweenhu.
151
Nriwakhiviru, Apwiya, ni tjoorumatjinhu tjooteene ekhweeli.
152
Khalayi, kihofuntta ekettelo tjowaataanawinhu, tjen'nho tjikhalihaleenhu woohimala.
153
Moone ohuvawaka ni nkoopole, kontha akinliyala ekettelweenhu!
154
Nkaakihere ankiwanana; nkikhalihe wonayeeli tjikhuluvelihaleenhu.
155
Woopwaa waatakhali ori oottayi kontha khantholathola ekettelotjinhu.
156
Tjuulupale mitekotjinhu tjokiriri Apwiya! Nkikhalihe wonayeeli tjoorumatjinhu.
157
Entji awananyaaka naale ankoomolaniha; wanookhalaru tjon'mo, akin'hiyaekettelo tjowaataanawinhu.
158
Kin'noona atakhali ni kin'noona ohitjiveliya kontha khanssunka nuulumoninhu.
159
Nkawehani tjinfentaaka tjoossomihatjinhu, Apwiya! Nkikhalihe wonayeeli nfentweenhu wokhweeli!
160
Nuulumoninhu nokhweeli; ni essariyatjinhu tjooteene tjinkhala tjoohimala.
161
Akhulupale ankoomolaniha woohaakossera; phimaana, nrimaaka onuupuwela nuulumoninhu.
162
Kinawiittottopa mwatjookhuluvelihatjinhu, phanka ntthu nphwanha n'hakhu muulupale.
163
Akinpheela tjitthu tjoohikhala, massi kinaafenta ekettelweenhu.
164
Emaara saapa nihuku nimotja, kinaawiipelani kontha essariyatjinhu tjophwanela.
165
Nrettele muulupale arina phaale anfenta ekettelweenhu: aniitjoona ohikossa.
166
Kinanriiha woopolawinhu, Apwiya, ni kinaaviriha tjoorumatjinhu.
167
Kinawiiwelela ekettelo tjowaataanawinhu ni kinaafenta tjinene.
168
Kinaassunka tjoossomihiya tjowaataanawinhu, kontha mittalatjaka tjooteenen tjiri ohoolowinhu.
169
Okhuwelawaka woophwanheni, Apwiya. Nkivahe otjuwelatja mwaha wonuulumoninhu.
170
Mavekelwaaka aphiye wariinhu. Nkikhavihere, mwaha wonuulumoninhu.
171
Kinaapheela owiipelani tjinene, kontha mun'nokifunttiha ekettelotjinhu!
172
Nliminaka niipele nuulumoninhu, kontha tjoorumatjinhu tjooteene phitjossariya.
173
Ntataninhu nikikhavihere, kontha kihothanla tjoossomihatjinhu.
174
Kinpheela otaphulatjawinhu, Apwiya; Ekettelweenhu phuukhalawaka.
175
Kikhale woopheela owiipelani, ni essariyatjinhu tjikikhavihere.
176
Kineetta woohitjuwela onrwaaka, phanka enama yorimeela; mun'wehawehe nantekweenhu, kontha akinliyala tjoorumatjinhu.