¹ Ooreeriya phayaale meettelwaaya ahintthukeliya, aneetta nketteloni tjaApwiya! ² Ooreeriya phayaale anssunka tjoweettela tjowaataanawaya, ³ ahinvara yootakhala, massi aneetta n'mittalaniwaya. ⁴ N'honiirela wiira nissunke tjoorumatjinhu, wiira neettele niwaamini. ⁵ Kikhaleke kiiwelelaka ekettelotjinhu! ⁶ Vano, akin'hala woona ehaaya keettelaka tjoorumatjinhu. ⁷ Kinaahala owiipelani ninrima wokhweeli, kafuntta essariyatjinhu tjeephuki. ⁸ Kinaahala okhalela ekettelotjinhu; n'hikihiyetho! ⁹ Mwaavano n'hala okhaliha tjani ekumyaawe yooreera. Iissunkaka ninuulumoninhu. ¹⁰ Ninrimaaka wooteene kinawoorweelani; n'hikihiye kihuluwaka tjoorumatjinhu. ¹¹ Kihovitha moolumweenhu wanrimaniwaka wiira kihookossereni. ¹² Oottottopeliya phinhu, Apwiya! Nkifunttihe ekettelotjinhu! ¹³ Nimalakwaaka kin'nokhuwelaka moolumweenhu. ¹⁴ Munttalani tjokettelo tjowaataanawinhu, kinaatteeliya ventji woovirikana mihakhu tjooteene. ¹⁵ Kinaahala wuupuwela tjin'nifunttiheenhu ni kinaahala okhala n'mittalaniwinhu. ¹⁶ Kinawiivahenra nketteloniwinhu; akin'hala oliyala nuulumoninhu. ¹⁷ Munkhalele ninfento nantekweenhu, wowiira kikhale ni kissunke nuulumoninhu. ¹⁸ Nkikhavihere wowiira kitjuweleke miiriirya tjokettelotjinhu. ¹⁹ Kinawiitjeetta paassi vathiva; n'hikivithe tjoorumatjinhu. ²⁰ N'nepaaka onkhala nimalamulweenhu ooteene. ²¹ Nhu n'nawaatthukela owiittottopa, ootakhala nrima, ahineettela tjoorutjinhu. ²² Nkikumihe tjootakhala nootanhifwiya, kontha kin'nossunka ekettelo tjowaataanawinhu. ²³ Ahooleli hata wankuulumaaya, nantekweenhu naahoolela ekettelotjinhu. ²⁴ Ekettelo tjowaataanawinhu nroromelwaaka, ekanotjaka. ²⁵ N'nepaaka ohotakaneela nintthupi! N'kikhalihe wonayeeli nuulumoninhu! ²⁶ Mi kihoottonkelani makhalelwaaka, ni Nhu n'hokaakhula. N'kifunttihe ekettelotjinhu! ²⁷ Nkitjuwelihe tjoofunttihatjinhu, wowiira kikhalaneke tjoofunttihatjinhu tjomiiriirya. ²⁸ N'nepaaka onaatjukula. Nkimaalihe, wonayeeli ninuulumoninhu. ²⁹ Nkihulusse n'mittalani tjoohilika ni nkifunttihe womahala ekettelweenhu! ³⁰ Kihothanla nttala wokhweeli ni kiholakela otthara essariyatjinhu. ³¹ Kin'niivahenra nketteloni tjowaataanawinhu; kihoonihatjiye ehaaya, Apwiya. ³² Kinaahala otthara nttala watjoorumatjinhu, kontha mun'notthukula otjuwelatjawaka. ³³ Nkissomihe, Apwiya, nttala wokettelotjinhu, ni kinaahala ottharenla npakha woomaleloni. ³⁴ Nkivahe otjuwelatja wiira kitthare ekettelweenhu ni kinaahala ossunka ninrimaaka wooteene. ³⁵ Nkeettihere munttalani watjoorumatjinhu, kontha watjen'nho kihiivahenra. ³⁶ Nrukunussele nrimaaka oketteloni wowaataanawinhu, woohikhala waalupattha atthu akhwaawe. ³⁷ N'hulusse meethwaaka wowiira ahoone tjitthu tjoohikhala! N'kikhalihe munttalaniwinhu. ³⁸ Munkhuluvelihe nantekweenhu wayeele yaakhuluvelihaleenhu an'woovani. ³⁹ N'kihulusse tjoottehattehiya tjinkihiya koovaka, kontha kinaatjuwela wiira tjoophukatjinhu tjooreera. ⁴⁰ Kin'neettela tjinkifunttiheenhu; n'kikhalihe niissariyeenhu! ⁴¹ Apwiya, phanka tjikhuluvelihaleenhu, okiweele nfetweenhu ni woopolawinhu; ⁴² tjitjon'mo kinaahala otjuwela tjowaatjipwa ankoomolaniha, kontha kinkhuluvela nuulumoninhu. ⁴³ N'hikumihetho nuulumo nokhweeli mwaanomwaka, kontha kinanriiha tjoophukatjinhu. ⁴⁴ Ttjitjon'mo, kinaahala woona ekettelweenhu, woohhiyenra, mahuku ooteene; ⁴⁵ kinaahala weetta ninkhuluvelo, kontha kinrweela tjoossomihatjinhu; ⁴⁶ ni kinaahala ottonka ekettelotjinhu tjoowaataana ohoolo womamwene, ni akin'hala woonihatjiya ehaaya. ⁴⁷ Kin'nofenta tjoorumatjinhu. ⁴⁸ Kinaahala ovussera matata tjoorumatjinhu, tjinfentaaka, ni kinaahala okhala niikettelotjinhu. ⁴⁹ Muupuwele nuulumo noolumale nantekweenhu, nen'no n'hokivaha wanriiha! ⁵⁰ Phinkimaaliha moohuvanimwaka: Nuuluoninhu nikivahe ekumi! ⁵¹ Yaale aniikukhuliha anakitarawa, ni akin'hiya Ekettelo tjinyu. ⁵² Pwiya, kinawupuwela Makhuluveliho en'nyu okhalayi, ni kin'nomaalihiya. ⁵³ Otikinihiya ohokiphuanya, nlatto waamalaponi, kontha anaakhotta Ekettelo tjinyu. ⁵⁴ Ekettelo tjinyu tjinkhala etjipo tjaka wa nupani moweettelawaka. ⁵⁵ ohiyu wooteene, kinawuupuwela ntjina ninyu, Pwiya, ni kinasunka ekettelotjinyu; ⁵⁶ n'wo phuri othunawaka, kontha kinasunka Ettelo tjinyu. ⁵⁷ Pwiya, Nyu nri ohiyeriya waka! Kihokhuluveliha osunka Molumo en'nyu. ⁵⁸ Ni nrima wooteene, kinasonttelela Mahala en'nyu; nkoonele ekiriri, wo nayeeli Nulumo ninyu. ⁵⁹ Kihowehaweha mittalatjaka ni kiheettihera ekettelo tjowaataanawinhu. ⁶⁰ Kinawaakuvatja ni kinaapitjapitja nooviriha tjoorumatjinhu. ⁶¹ Awanani anaakipheelatja, wanookhalaru tjon'mo akinliyala ekettelweenhu. ⁶² Ohiyu eriyari kin'novuwa woovahani mahala mwaha wossariyatjinhu. ⁶³ Kinpatthani aatthu ooteene an'woovani ni ankhalela tjoossomihatjinhu. ⁶⁴ Elapo enootjara nfentweenhu, Apwiya. Nkifunttihe ekettelotjinhu! ⁶⁵ N'haana n'nema ninantekweenhu, wonayeeli nuulumoninhu, Apwiya. ⁶⁶ Nkifunttihe wuupuwela nootjuwela, kontha kihotthuna ekettelotjinhu. ⁶⁷ Waaryaaka kihinahuva, keetta mootakhala, massi, n'navaa, kin'niiwelela nuulumoninhu. ⁶⁸ Nhu n'haana n'nema ni n'naapanka yooreera. Nkifunttihe tjoorumatjinhu. ⁶⁹ Atthu oovavaryaa an'nokootheryatja, massi, ninrimaaka wooteene, kin'niiwelela ekettelotjinhu. ⁷⁰ Mirimatjaya tjiri tjoolipa; phimaana mi kin'neettela ekettelweenhu. ⁷¹ Waari etthu yooreera opatjalyaaka ohuva wiira kifuntte ekettelotjinhu. ⁷² Nootepessa okitjivela nuulumoninhu woovirikana ekonto ekontotjene tjoparatha niiwooru. ⁷³ Matateenhu ahokunpa ni ahokuunuwiha; nkivahe otjuwela wiira kifuntte tjoorumatjinhu. ⁷⁴ An'woovani anaahala ohakalala yakoonavale, kontha kinanriiha nuulumoninhu. ⁷⁶ Kin'nuupuwela, Apwiya, wiira ephukitjinhu tjossariya, mwaahokihuviha mwaha wonfentweenhu. ⁷⁵ Kinaavekela wiira kikhale oolipa ninfentweenhu, wonayeeli nuuluninhu nin'vahaleenhu nantekweenhu. ⁷⁷ Okikhuruwele nfentweenhu ni kinaahala okhala, kontha kinaakupaleela ekettelweenhu. ⁷⁸ Owoonihatjiya ehaaya akhale atthu oovavaryaa, ankuuluma onhala. ⁷⁹ Akihokoleele, an'woovani; yaale antjuwela ekettelo tjowaataana. ⁸⁰ Nrimaaka okhale woohitthukiya wohissima wokettelotjinhu, wiira kihoonihatjiye ehaaya. ⁸¹ N'nepaaka onpheela otaphuwatjawinhu; kinanriiha nuulumoninhu. ⁸² Meethwaaka ananriiha tjookhuluvelihatjinhu: n'nohala okimaaliha eyaakhani. ⁸³ Kinookhalaru phanka ntiita wonipha vamwiissini, nanlelo akinliyala ekettelotjinhu. ⁸⁴ Mahuku anantekweenhu ankookhala makavi. N'nohala waalamula eyaakhani yaale ankoomolaniha. ⁸⁵ Atthu oovavarya ahineetta wonayeeli ekettelweenhu, ahokithipelatja nlikitti. ⁸⁶ Tjoorumatjinhu tjooteene tjokhweeli. Nkikhavihere wayaale ankoomolaniha woohissariya. ⁸⁷ Ayena yaahala vakaani okikumiha elapweela; mi phimaana, akin'hiya tjinssomiheenhu. ⁸⁸ Mwaha wonfentweenhu, nkikhalihe, wowiira kissunke ekettelotjinhu. ⁸⁹ Apwiya, womahuku ooteene nuulumoninhu phinowiirimu. ⁹⁰ Ekhweeliinhu enkhala nikhoto ni nikhoto. Nhu n'hunpa etthaya, ni yeeyo ehaavo; ⁹¹ ni malamulweenhu, ehaayo npaka nihuku nolelo, kontha tjitthu tjooteene tjiri muntekoniwinhu. ⁹² Kihikupaleelale ekettelweenhu, kinarimeelale moohuvanimwaka. ⁹³ Akinliyalatho ekettelotjinhu, kontha watjen'nho Nhu n'naakivaha okumi. ⁹⁴ Mi kaawinhu; nkoopole kontha kinrweela ekettelotjinhu. ⁹⁵ Amalapo anpheela okikwanhula, massi kiri oweheeha ekettelo tjowaataanawinhu. ⁹⁶ Kin'nowehaka omalela womiteko; massi, tjoorumatjinhu khatjin'malela. ⁹⁷ Tjinfentaaka ekettelweenhu! Nkhaviherwaaka nihuku nooteene. ⁹⁸ Tjoorumatjinhu, tjinkhala mahuku ooteene nimiivano, tjinaakivaha otjuwelatja tjinene ovirikana naawananyaaka. ⁹⁹ Kihaana otjuwelatja tjinene ovirikana nimafuntyaaka, kontha kinkhala niikettelo tjowaataanawinhu. ¹⁰⁰ Kinawiiwa tjinene ovirikana nimahumu, kontha kin'nossunka tjinkissomiheenhu. ¹⁰¹ Kinaahuluwa mittala tjootakhala wiira kiiwelele nuulumoninhu. ¹⁰² Akin'hiyatho essariyatjinhu, kontha mun'nokifunttiha. ¹⁰³ Moolumweenhu phooreera! Khweeli, ootjiva mwaanomwaka ovikana oravo. ¹⁰⁴ Eriyari watjoossomihatjinhu, kin'nophwanha otjuwelatja, phimaana kin'nohiya nttala woohiloka. ¹⁰⁵ Nuulumoninhu nthuko wonhaatjaka ni nthuko wonttalaaka. ¹⁰⁶ Kihokhuluveliha ni kinaahala oviriha: kinaahala wiiwelela essariyatjinhu. ¹⁰⁷ Kihohuva tjinene! Apwiya, nkikhalihe wonayeeli nuulumoninhu. ¹⁰⁸ Mwaakhenle, Apwiya, tjoovaha tjiivahenralyaaka tjon'mwaanomwaka, ni nkissomihe essariyatjinhu. ¹⁰⁹ Ekumyaaka enkhala yookutakuthyaa; wanookhalaru tjon'mo, akinliyala ekettelweenhu. ¹¹⁰ Ntakhali hokiryeela nryankho, massi, akin'hiya tjoossomihatjinhu. ¹¹¹ Kihokussa phanka etthuvwaaka ekettelo tjowaataanawinhu, kontha phinkitteeliha wanrimaniwaka. ¹¹² Nrimaaka ohokupaleela wiiwelela tjoorumatjinhu womahuku ooteene. ¹¹³ Kin'noona yaale anpanka tjitthu tjoohikhala, massi kin'nofenta ekettelweenhu. ¹¹⁴ Nhu mwanikhukunaka ni mwankhaviherwaaka; kinanriiha nuulumoninhu. ¹¹⁵ Nkihuluwatje, atakhali! Kinpheela otthara tjooruma tjaNlukwaaka. ¹¹⁶ Nkikhavihere phanka tjookhuluvelihatjinhu wiira kikhale; n'hitthunihe wiira koonihatjiye ehaaya mowanriihaniwaka. ¹¹⁷ Nkikhavihere ni kinaahala woopwaa; kinaahala ovarela nteko tjoorumatjinhu. ¹¹⁸ N'nawaakhotta atthu ooteene an'huluwa ekettelotjinhu, kontha atthu alolo ni oohiloka. ¹¹⁹ N'nawaakhotta, phanka ehalahala, atakhali ooteene ovathi; phimaana, kinaafenta ekettelotjinhu tjowaataana. ¹²⁰ Erutthwaaka enaathukumela wowoova ohoolowinhu, ni kinawoova essariyatjinhu. ¹²¹ Kin'vara yossariya ni yooreera; n'hikivahenre mwaatakhali. ¹²² Nkhuluvelihe okhala ratta wanantekweenhu; n'hitthunihe ntakhali wiira akihuvihe. ¹²³ Meethwaaka ankhala owootjyaatja yanriihaka nuulumoninhu ni yookhuluveliheenhu. ¹²⁴ Nantekweenhu munkhalihe phanka waataanawinhu, ni nkifunttihe ekettelotjinhu. ¹²⁵ Kinantekweenhu; nkivahe otjuwelatja wiira kitjuwele ekettelo tjowaataanawinhu. ¹²⁶ Owakathi woopheela otthunela, Apwiya, kontha ayenatja ahohiya ekettelweenhu. ¹²⁷ Kinaafenta tjoorumatjinhu tjinene ovikana ewooru. ¹²⁸ Phimaana, mwatjooteene kintthara tjoossomihatjinhu, ni tjinaakikassiri tjitthu tjootakhala. ¹²⁹ Ekettelo tjowaataanawinhu phitjooreera, phimaana mikinaaweha. ¹³⁰ Otaphuleliya womoolumweenhu onaamwaleela ni onawaavaha otjuwelatja atthu. ¹³¹ Kinawaathama ni kinawiittha ephumu, kontha kinpheela tjoorumatjinhu. ¹³² Nkihokoleele ni nkoonele ekiriri, phanka tjinaapankakeenhu anfenta ntjinaninhu! ¹³³ Nkeettihere n'nuulumonimwinhu; n'hihiye wala etampi emotja ekihoolelaka. ¹³⁴ N'kihulusse n'mahuvihoni mwaatthu; tjitjon'mo, kinaahala wiiwelela tjoossomihatjinhu. ¹³⁵ Nkoonele ekiriri ni nkifunttihe ekettelotjinhu. ¹³⁶ Emuro tjomeethori tjineetta n'meethoniwaka, kontha atthu khanvarela nteko ekettelweenhu. ¹³⁷ Nhu mwanassariya, Apwiya, ni essariyatjinhu tjokhweeli. ¹³⁸ N'hopanka ekettelotjinhu tjowaataana niissariya ninfento muulupale. ¹³⁹ Opheelawaka onaakikhuura kontha awananyaaka aholiyala moolumweenhu. ¹⁴⁰ Nuulumoninhu phinanantekweenhu naafenta. ¹⁴¹ Kinookhalaru mwankaani ni ootanhifwiya, akinliyala tjoossomihatjinhu. ¹⁴² Essariyeenhu essariya yoohimala, ni ekettelweenhu ekhweeli. ¹⁴³ Mahuviho ni mikatjamiho tjinookiphwanharu, tjoorumatjinhu okhalawaka. ¹⁴⁴ Ekettelo tjowaataanawinhu phitjossariya tjoohimala; nkivahe otjuwelatja wiira kikhale. ¹⁴⁵ Ninrimaaka wooteene, kinawookhuwelani. Nkiiwe, Apwiya, ni kinaahala ossunka ekettelotjinhu! ¹⁴⁶ Kinaakhuwela: nkoopole, ni kinaahala wiiwelela ekettelo tjowaataanawinhu. ¹⁴⁷ Kinaavuwa ohinassa ni kinaakhuwela wonkhavihero. Ninuulumoninhu phiwanriihawaka. ¹⁴⁸ Meethwaaka ankhala yoonaka kiwehawehaka ohiyu, wiira kiiwe nuulumoninhu. ¹⁴⁹ Mwiiwe nuulumonaka wonayeeli nfentweenhu wokhweeli, Apwiya; nkikhalihe phanka essariyatjinhu! ¹⁵⁰ Ankoomolaniha ahokaattamenla; ayena ahohuluwa ekettelweenhu. ¹⁵¹ Nriwakhiviru, Apwiya, ni tjoorumatjinhu tjooteene ekhweeli. ¹⁵² Khalayi, kihofuntta ekettelo tjowaataanawinhu, tjen'nho tjikhalihaleenhu woohimala. ¹⁵³ Moone ohuvawaka ni nkoopole, kontha akinliyala ekettelweenhu! ¹⁵⁴ Nkaakihere ankiwanana; nkikhalihe wonayeeli tjikhuluvelihaleenhu. ¹⁵⁵ Woopwaa waatakhali ori oottayi kontha khantholathola ekettelotjinhu. ¹⁵⁶ Tjuulupale mitekotjinhu tjokiriri Apwiya! Nkikhalihe wonayeeli tjoorumatjinhu. ¹⁵⁷ Entji awananyaaka naale ankoomolaniha; wanookhalaru tjon'mo, akin'hiyaekettelo tjowaataanawinhu. ¹⁵⁸ Kin'noona atakhali ni kin'noona ohitjiveliya kontha khanssunka nuulumoninhu. ¹⁵⁹ Nkawehani tjinfentaaka tjoossomihatjinhu, Apwiya! Nkikhalihe wonayeeli nfentweenhu wokhweeli! ¹⁶⁰ Nuulumoninhu nokhweeli; ni essariyatjinhu tjooteene tjinkhala tjoohimala. ¹⁶¹ Akhulupale ankoomolaniha woohaakossera; phimaana, nrimaaka onuupuwela nuulumoninhu. ¹⁶² Kinawiittottopa mwatjookhuluvelihatjinhu, phanka ntthu nphwanha n'hakhu muulupale. ¹⁶³ Akinpheela tjitthu tjoohikhala, massi kinaafenta ekettelweenhu. ¹⁶⁴ Emaara saapa nihuku nimotja, kinaawiipelani kontha essariyatjinhu tjophwanela. ¹⁶⁵ Nrettele muulupale arina phaale anfenta ekettelweenhu: aniitjoona ohikossa. ¹⁶⁶ Kinanriiha woopolawinhu, Apwiya, ni kinaaviriha tjoorumatjinhu. ¹⁶⁷ Kinawiiwelela ekettelo tjowaataanawinhu ni kinaafenta tjinene. ¹⁶⁸ Kinaassunka tjoossomihiya tjowaataanawinhu, kontha mittalatjaka tjooteenen tjiri ohoolowinhu. ¹⁶⁹ Okhuwelawaka woophwanheni, Apwiya. Nkivahe otjuwelatja mwaha wonuulumoninhu. ¹⁷⁰ Mavekelwaaka aphiye wariinhu. Nkikhavihere, mwaha wonuulumoninhu. ¹⁷¹ Kinaapheela owiipelani tjinene, kontha mun'nokifunttiha ekettelotjinhu! ¹⁷² Nliminaka niipele nuulumoninhu, kontha tjoorumatjinhu tjooteene phitjossariya. ¹⁷³ Ntataninhu nikikhavihere, kontha kihothanla tjoossomihatjinhu. ¹⁷⁴ Kinpheela otaphulatjawinhu, Apwiya; Ekettelweenhu phuukhalawaka. ¹⁷⁵ Kikhale woopheela owiipelani, ni essariyatjinhu tjikikhavihere. ¹⁷⁶ Kineetta woohitjuwela onrwaaka, phanka enama yorimeela; mun'wehawehe nantekweenhu, kontha akinliyala tjoorumatjinhu.