¹ Mwaavahe mahala Apwiya, kontha Ayena phooreera, kontha n'nemanaya khanin'malatho. ² Israel iireke: N'nemanaya khanin'malatho. ³ Etthoko ya Arao yiireke: N'nemanaya khanin'malatho. ⁴ Owaamini aApwiya yiireke: N'nemanaya khanin'malatho ⁵ Moouvanimwaa, kaahaakhuwela Apwiya, Ayena yaahokaakhula ni yaahokitaphulatja. ⁶ Apwiya arinimi, akin'hala woova; ntthu n'hala okiirihani. ⁷ Apwiya arinimi, nkhaviherwaaka; kinaahala waatthema ankoomolaniha. ⁸ Yooreera orweela ntthawenlo waApwiya ohiya onkhuluvela ntthu. ⁹ Yooreera otthawenla waApwiya ohiya waamini akhulupale. ¹⁰ Elapo tjooteene tjinaakirukureerya, massi, mwantjina naApwiya, kihaatthema. ¹¹ Weekhweeli, tjaahokirukureerya; mwantjina naApwiya, kihaatthema. ¹² Tjaahokirukureerya phanka etjwii, ni tjaahorimeelatja wowaakuvyaatja phanka ekokhola wamooroni; mwantjina naApwiya, kihaatthema. ¹³ Yaakikhumenlale wiira akimorihe, massi Apwiya yaahokikhavihera. ¹⁴ Apwiya ekurwaaka nootthapaawaka; Ayena phankoopola. ¹⁵ Okhuwela wootteeliya wootthema onawiiwanyaa n'heemani mwaanassariya; ntata noolopwana naApwiya ninaakhwitiri. ¹⁶ Ntata naApwiya noolopwana ninaavuwihiya; ntata naApwiya noolopwana ninaathola. ¹⁷ Akin'hala okhwa, massi kinaahala okhala, ni kinaahala okhuwela miteko tjaApwiya. ¹⁸ Apwiya ahokittarussa ventji, massi khaakivahenrale mookhwani. ¹⁹ Anaakitthukulela mikhora tjossariya, kin'hala ovira mon'mo ni kinaahala waavaha mahala Apwiya. ²⁰ Ola nkhora waApwiya; nassariya phunviraawe. ²¹ Kinaahala woovani mahala, kontha Nhu n'kaakhulela ni n'hokhala woopwaawaka. ²² Mluku anamateka naakhottaaya naahokhala noophwanelessa. ²³ Ola nteko waApwiya, ni phoophwanela n'meethoniwihu. ²⁴ N'na phinihuku Apwiya naalakelalyaaya; ninaahala otthapa noohakalala. ²⁵ Apwiya, n'nikhalihe ootthema! N'nikhalihe owanriiha! ²⁶ Yoottottopeliya phiile en'mwa mwantjina naApwiya; enupa yaApwiya ninawooreerihani. ²⁷ Apwiya phiNluku. Ayena phan'nimwaleela; ntthuke ninkhoyi tjoovaha waaltaare. Nhu mwaNlukwaaka, nimi kinaahala woovahani mahala; ²⁸ Nhu mwaNlukwaaka; kinaahala woottottopelani. ²⁹ Ooh, mwaavahe mahala Apwiya, kontha Ayena phooreera. Nfentwaaya khun'malatho.