¹ Kinawaafenta Apwiya; Ayena anawiiwa ntjuunaka nimavekelwaaka niikiriri. ² Akiiwelelaka tjitjon'mo, kinaahala waavuwiha kiira kinari nkumi. ³ Mittala tjowuukhwani tjihokirukureerya, ni miryankho tjowuukhwanai tjinaakoomolaniha; kihiitjoona okhala ookutakuthyaa nooripiya nrima. ⁴ Vano, kihokhuwela ntjina naApwiya: Apwiya, moopole ekumyaaka! ⁵ Apwiya phokiriri ni ossariya; Nlukweehu phon'nema. ⁶ Apwiya anawaakhavihera oohuva; kaahomora, Ayena ahokoopola. ⁷ Nrimaaka ohokoleele nipuronaya noopheela omumula, kontha Apwiya ankhala nimiivano. ⁸ N'hoopola ekumiyaaka mookhwani, meetthwaaka n'meethorini ni enhaatjaka moohuvani. ⁹ Kinaahala waavarela nteko Apwiya vathi waatthu. ¹⁰ Kihowaamini, hata wiiralyaaka: Kiri n'mikatjamihoni. ¹¹ Moohuvanimwaka kaahiira: Atthu ooteene phowootha. ¹² Kin'hala waavahani Apwiya watjooteene tjikivarenlyaaya. ¹³ Kinaahala ovussa woopwaa ni kinaahala ovuwiha ntjinanaya. ¹⁴ Kinaahala oviriha tjoothanlatjaka waApwiya ohoolo waatthu ooteene. ¹⁵ Yoophwanela, vameethoni waApwiya, okhwaa waattakattiifwaaya, ¹⁶ Weekhweeli, Apwiya, kinantekweenhu, mwaana anantekweenhu; mun'nokoopola mootthukiyanimwaka. ¹⁷ Kinaahala woovahani okuttho womahala, ni kinaahala ovuwiha ntjinaninhu. ¹⁸ Kinaahala oviriha tjoothanlatjaka waApwiya ohoolo waatthwaaya ooteene, ¹⁹ npaani mwaApwiya, eriyari waJerusalem. Mwiipele Apwiya.