Ekapiitulo 111
1
Mwiipele Apwiya. Kinaaha waavaha mahala Apwiya, ninrimaaka wooteene, nipuro noothukumana anassariya.
2
Miteko tjaApwiya tjuulupale, tjinssunkiya ni yaale ooteene anpheela.
3
Ntekwaawe phiwoophwanela ni wowaarya, ni essariyaaya khin'malatho.
4
Ayena anpanka tjitthu tjomiiriirya tjin'hala wuupuweliya; Apwiya phomahala ni okiriri.
5
Anawaavaha eyoolya arumeyaaya owaamini. Ayena khanliyala waataanawaya.
6
Ahaathoonhera atthu mitekotjaya tjokuru, yaavahaka yoohalana nlaponi.
7
Miteko tjon'matataniwaya tjokhweeli ni tjossariya; ekanotjaya tjooteene tjookhuluvelyaa.
8
Katjin'malatho, wowiira tjooniyeke mahuku ooteene.
9
Atthwaawe haahiya atthemaka; haavaha waataana woohimala; ttakattiifu ni nomiiriirya ntjinanawe!
10
Wooviya waApwiya epatjero yootjuwelatja; yaale antthara ekanotjaya ahaana wiiweeha. Wiipeliyawaya khun'malatho.