¹ Paulo ni Temoteo, ananteko a Yesu Kristu, attakattiifu ooteene a Kristu Yesu ari oFilipos naahooleli okeretja naanamakawa. ² Mahala wanhu, ninrettele wa Muluku, athumwanihu, naaPwiya Yesu Kristu. ³ Kinansukhuru Mulukwaaka, emaara tjooteene ⁴ tjin'wuupuwelaakani. Nimavekelwaaka ooteene wanhu, kinaavekela nuutteeliya. ⁵ Kinaavaha mahala mwaha wookhala nkhayi wuulalyaani, okhuma nihuku nowantja npaka n'navaa. ⁶ Kiri ookhuluvela niyeela: Yoole antjerale nteko wooreera wanhu naahala omalihera npaka nihuku nn Yesu Kristu. ⁷ Wahophwanela mi okhala tjo wohissimatjinhu ooteene, maana nrirji wanrimaniwaka. Oooteenetjinhu niri nkhayi n'mahalani ni n'makalapoosoniwaka mowaakihiyani ni okupaleeliya moolalyaani. ⁸ Maana Muluku nmoonaaka toko tjirinaaka nfento wanhu ooteene, ni ekiriri tjaYesu Kristu. ⁹ Niyeela kinaavekela: Wiira nfentweenhu wuunuwe ventji nootjuwelatja ventji niwiiweeha woomalela. ¹⁰ Wowiira nlawihe tjitthu tjiri tjooreera, weenn'na wiira nkhale oolipa ni oohitthukeliya nihuku na Kristu. ¹¹ Kinaavekela tootho wiira nkhale ootjala n'hokorokho wossariya, onwa eriyari ya Yesu Kristu, otthapela niwaarya wa Muluku. ¹² Vano, kinpheela ntjuwele, assun'na, wiira tjitthu tjikiirneelale tjihokikhavihera wowiira olalyaa orwee ohoolo. ¹³ Ekalapoosotjaka mwaKristu tjaahokhala tjootjuweliya ni mayokhalenla onupeele ooteene, mwaha waatthu ooteene naakhwaawe. ¹⁴ Ni asun'na entji, yaahokhala, waaPwiya, nuukhuluvela ventji mwaha wootthukeliyawaka, wiira yiiwe nuulumo na Muluku woohoova. ¹⁵ Akhwaawe, anakhuwela Kristu ninttima nunwanihan'na, ni akhwaawe, anpanka nuutthuna wooreera. ¹⁶ Yaale anonkhuwela Kistu ninfento, anaatjuwela wiira keesiye vaa mwaha wowaakihera tjoolalya. ¹⁷ Akhwaawe anonkhuwela Kristu nimolumo oohiloka, ni oohikhweeli, yuupuwelaka toko anaakittarussa kinatthukiye. ¹⁸ Massi efayitani? Wakhula enan'na, okhale wothiya wala, Kristu holaleiya ni woyeeyo kinaahala otteeliya. ¹⁹ Maana kinaatuwela wiira yeeyo enaakikhavihatjera woopwaawaka, mwaha womavekelweenhu ni mwaha wonlipihero won'nepa waYesu Kristu. ²⁰ Toko ekhalelwaakani wanriihawaka akin'halatho woonihatjiya ehaaya niwiiwa wooteene, too onankhuma, Kristu naahala ovuwihiya mwa erutthwaaka, okhale muukun'mini wala muukhwani. ²¹ Kontha wami okumi Kristu ni okhwa etjaaira. ²² Massi, wakhalaka wiira erutthu n'hokorokho wontekwaaka, kithanleni? Mi akintjuwela. ²³ Maana kinaattharenliya miphantte tjooteene. Otthunawaka okhuma orwaa okhala ni Kristu, etepessale oreera. ²⁴ Phimaana, okhala mwiirutthuni ohophwanela ventji, mwaha wanhu. ²⁵ Kikhalaka ookhuluvela yeela, kinaatjuwela wiira kin'hala okhala wamotja ninhu, wiira orweeke ohoolo otteeliyawinhu ni waamini. ²⁶ Mwaha wawaka, yuunuwe makhalelweenhu ni waaryawinhu mwa Kristu, kaakulelatho wariinhu. ²⁷ Watjooteene, nkhale weenen'na yoophwanela ya Kristu, wowiira, kirwee koowehakani wala n'nari ottayi, kiiwe wohissimatjinhu wiira n'holipatja, wan'nepa n'motja paasi, niirooho emotja, niwanaka nkhayi mwaha wowaamini watjoolaleiya. ²⁸ Ni ahikalle yoossankihatjakani awananiinhu. Eyo ethoonhero emotja wookwanhuwatjawaya, massi wanhu, ethoonhero yowoopwaa, en'wa waMuluku. ²⁹ Kontha wanhu n'hovahiya mahala oohintthuna Kristu paasi, massi tootho ohuva mwaha wayena. ³⁰ Nkhalanaka ekuru tjimotja tjikoonanaleenhu ni phiyaaru tjiniiweenhu wiira eri nimi.