¹ Yakhalaka yoolipiheriya mwaKristu, omaalihiya munfentoniwawe, waataana mun'nepani, ekiriri yoohimala nuuthunku. ² Nkhaleke otteeliyawaka woomalela womuupuwelo n'motja, nkhalanaka nfento n'motja, nkhalaka owaataana mun'nepani ni nkhalanaka yootthuna emotja. ³ N'hipanke yowiithepya wala niwiikukhuliha, massi mwiiyeviheke mwaapankaka akhwiinhu okhala ettiitthu mwiivirikanihaka ninhu. ⁴ N'hipheeleke paasi yawinhu, massi tjitjon'mo npheeleke makhalelo aakhwiinhu. ⁵ Nkhalaneke muupuwelo n'motja, waari mwaKristu Yesu. ⁶ Yooyo nari toko Muluku, khankhalihale olikana ni Muluku toko etthu yaapheelaawe wiikhalihera. ⁷ Ohiya eyoo, yena mwaneenyaawe hiiyeviha, aahokhala toko nanteko, akhalaka toko nlopwana, aawehiye niikhove yantthu. ⁸ Yena aahiiyeviha, akhalaka owiiwelela npaka okhwa ni okhwa wonssalapa. ⁹ Phimaana tootho Muluku homuunuwiha an'vahaka ntjina niri watjulu omatjina ooteene. ¹⁰ Wowiira ntjina naYesu makutha ooteene akhuniye, wiirimu, vathi ni vathi wotthaya. ¹¹ Ni wowiira eluuka tjooteene tjilaphulule wiira Yesu Kristu Pwiya, waarya waMuluku thumwaane. ¹² Vano assun'naka oofentiya, toko tjinwenlaleenhu kahi paasi varyaaka ninhu, vano wootepessa tjinene vahikhanlyaaka ninhu muunuwiheke woopwaawinhu niwoova nuuttettemela. ¹³ Kontha Muluku phinkhala ninhu toko tjinpheelaawe npankeke, wonayeeli tjinontjivelaaya. ¹⁴ Nvareke tjitthu tjooteene woohittokutta wala woohinhkulihana. ¹⁵ Nvareke tjitjon'mo wiira nkhaleke oohitthukeliya ni eekhweeli asaana aMuluku ohootheriya. Ni tootho wiira mwaaryeke toko nthuko wontuniyani, eriyari wonikhoto noohikhala ni nootakhala. ¹⁶ Nssunkaka voolipessa nuulumo neekumi wowiira kikhalane essariya yowiitthapela nihuku naKristu, maana mi kinaahala otjuwela wiira akitthawale wala akivarale nteko mahala. ¹⁷ Massi hata wanvahiyaaka wala wan'mwaresseliyaaka tjoovahiya tjookuttho ninyeko wowaaminiwinhu, mi kinaatteeliya ni ooteenewinhu. ¹⁸ Weenan'na yeeyo tootho n'tthapeke ni nttikuweke nimi. ¹⁹ Kinawanriiha mwaPwiya Yesu, wooveleelihani Temoteo wowaakuvyaatja wowiira nii kikhale oolipa nrima kaakhelaka makhalelweenhu. ²⁰ Maana akirina ntthu omuupuwelelo n'motja, toko yena, wooreerela nrattavenle makhalelweenhu. ²¹ Kontha ayenatja ooteene anpheela makhalelwaaya, woohikhala tjitthu tjaYesu Kristu. ²² Vano nhu n'nawaathuwela makhalelwaaya, toko mwaana tjinaarumeelaawe athumwaane, tjitjon'mo yenani aahokhala nimi wuulalyaani. ²³ Phimaana onruma katjuwela en'hala okiiraneela. ²⁴ Massi kihaana okhuluvela waaPwiya wowiira nimiivano kinaahala orwaa phiyaaru. ²⁵ Tjitjon'mo kinuupuwela woohokolosserani Epafrodito. Yena mwaamun'naka, mwiiwananyaaka ni phin'mweettanaaka okhottoni, nrumeyiinhu ni namakhalihera tjootthunatjaka. ²⁶ Maana yena aari ootjukulatja ventji wiira akhale ninhu, kontha mwaahiiwa wiira yena aanaawereiya. ²⁷ Weekhweeli yena aahowereiya tjinene nuussu okhwa. Phimaana Muluku aahomoonela ekiriri, woohikhala yena paasi, massi nimi, wowiira mi kihikhalane otjukulatja mwaha wootjukula. ²⁸ Phimaana kinaahala on'veleeliha wowaakuvyaatja, wowiira mwahokolyaaka weekhweeli n'naahala ohakalala nimi kinaahala okhala oohimassukhuli. ²⁹ Mwaakhenle aPwiya oPafrodito nuutteeliya wooteene ni mwaattittimihe atthu toko yena. ³⁰ Maana waari mwaha wonteko wa Kristu yooyo khwale, avahaka ekumyaawe wiira akivarele nteko ni akiwatjawatje wayeele yahaaleenhu okivarela.