¹ Pwiya aahuuluma ni Moises. ² Waahimeerye atthu owiisrael wiira yaakumiheratje vate anamakuttula, yoole rina nikhwatta nookhuma oru ni ooteene yaale an´hala okhala oohilokaloka mwaha wookwanha nrutthu. ³ Alopwana naathiyana anaahala okumihiya npaani mwamuluku. Ahipiihatje erettayeeyo npaani mwamuluku, weelamalelo. ⁴ Tjitjon´mo atthu owiisrael tjipankalyaaya. Ayenatja yaahaakumihatja npaani mwamuluku, toko Pwiya tjaamwiirelalyaawe Moises. Atthu owiisrael yaahomwiiwelela Pwiya. ⁵ Pwiya, aahuulumatho ni Moises. ⁶ Wiirele atthu owiisrael. Nlopwana wala nthiyana n´hala onkossera ntthu nkhwaawe, ni n´hala ohikaamini, oyo ntthuuyo hokikossera. ⁷ Yena naahala olaphulula tjootthekatjawe tjipankalyaawe ni naahala oliva wohissapu mwaha wookossawawe, wintjenraka yoneethanu. Yena naahala onliva ntthu n´halaawe onkossera. ⁸ Massi, wakhala wiira ntthu kossalyooyo kharina ntjuweli oopheela waakhenla tjooliviya, yena naahala oliva ehissapu yokoossyaawe wamiivano eriyari wanankuttho, woohikhala enama yookuttho. ⁹ Essoholo tjooteene tjinrweehiya wanamukuttho, wotjitthu tjooteene ttakattiifu ni tjitthu tjooteene tjikawanihiye wami waatthu owiisrael, tjinçhala okhala ninamukuttho. ¹⁰ Tjoovahiya tjaatthu ooteene tjin´hala okhala tjanamukuttho. Yooteene en´halaawe okumiha wakhula ntthu anvahaka namukuttho tjin´hala okhala tjanamukuttho. ¹¹ Pwiya, aahuulumatho ni Moises. ¹² Waahimeerye atthu owiisrael. Akhala mwaara amwaneene iihapussaka, ankosseraka wan´nhawe, ni ¹³ Nlopwana nkhwaawe arupaka naayena, nthiyanooyo hokossa. Hata ahitjuwele awan´nha epankalyeeyo ekhalaka yowinpithyaa ni hirina ntthu oopheela onkhalela namoona, ¹⁴ watjooteene, wan´nhawooyo akhalaka niihatje ni akhala aanhiheraka wiira amwaarawe ahokossa. Phimaana, ehatje tjinanweela nlopwana amwaarawe ahikossale. ¹⁵ Tjitthu tjowiira tjo, nlopwanooyo aawaaneke amwaaraawyaayo wanamukuttho. Awan´nhawyaayo anaahala ovaha nphantte wonakhuumi wotiricu. Yena khan´hala omwaressa makhura wala elunpani mwaha woyeeyo kntha yoovahiya tjohatje, yoovahiya yowaanhiheriya yotampi. ¹⁶ Namukuttho haana aattamenlaka ni eessaka ohoolo wa Pwiya. ¹⁷ Namukuttho naahala owiiha ntiita womaatji ooreerihiya nookumiha ntthupi vathi wonupa yamuluku ni naahala ohela ntthupin´no n´maatjini. ¹⁸ Namukuttho naahala waarweeha athiyanaayo ohoolo waPwiya. Athiyanaayo anaahala otaphula murwaaya ni anaahala otaphula ekhararitjaya. Namukuttho naahala ohela etthaka n´matataniwaya toko yoovahiya yomuupuwelelo. Elaa phiitthaka yohatje. Namukuttho naahala ovarenla, n´matataniwawe, maatji oowaawa, an´hala on´waanela otakhalihiya. ¹⁹ Namukuttho nahala owiirela athiyanaayo wiira apanke yoothanliya: Wakhalawiira khamunrupan´ne nlopwana ni ohirimeelaka woopanka yoohikhala, vano, onaahala okhala ootaphuwa womaatji oowaawa an´hala wootakhaliha. ²⁰ Massi, we, nthiyana wakhalaka owaahoolela awan´nhaa, ohiihapussa, wakhala ookossa ni, nlopwana nkhwaawe oorupanani, ²¹ vano Pwiya naahala woovahani otakhalihiya on´hala othoonheriya atthu ooteene. Ni Pwiya naahala ovirikanihatja n´mirimaniwinhu. ²² Maatji an´waana otakhalihiya anaahala okela n´napwiipwiniwinhu, ni khamun´hala okhalatho ninteko. Nthiyanooyo naahala waakhula: Khweeli, wiiranyee kakhala ookossa. ²³ Namukuttho naahala wantikhatja tjootakhalihiyan´nho n´nikhantani ni, vano, haana arapihaka moolumo ootakhalihiya n´maatjini oowaawa. ²⁴ Namukuttho n´hala owiirela athiyanaayo wiira avurye maatji owaawa an´waana otakhalihiya. Yavuryaka maatji oowaawaayo naayena an´hala okhala oowaawa. ²⁵ Namukuttho naahala okussa etthaka tjohatje n´matataniwaya. Yena naahala ovarenla etthaka npaka ohoolo wa Pwiya ni waawaana waaltaare. ²⁶ Namukuttho naahala okussa etthaka tjoovahiya, yoovahiya yoopwanela, ni n´hala opaha waaltaare. Vano, yena n´hala waavaha athiyana maatji oowaawa wiira avurye. ²⁷ Anvahavale maatji wiira avurye, yakhala ookossa kontha anowaaphwanhera etanpi awan´nhaya, vano, maatji an´waana otakhalihiya anaahala onkela ni an´hala okhala owaawa. Ni n´mirimaniwaya khan´hala olokaloka. Nthiyanooyo naahala otakhalihiya ohoolo waatthu. ²⁸ Massi, athiyanaayo yakhala oohikossa ni akhalaka ooreeratja, vano, naahala otaphulatjiya ni naahala waayara assaana. ²⁹ N´na nlamulo nohatje. N´na nlamulo naathiyana owaararuwela awan´nhaya. ³⁰ N´na nlamulo nanlopwana nuupuwela ehatje naamwaarawe. Yena naahala waawaana athiyana ohoolo waPwiya ni namukuttho naahala opanka tjooteene tjantikhiye munlamuloni tjohatje. ³¹ Nlopwanooyo naahala okhala ookossa mwaha wowaawaana amwaarawe wanamukuttho. Ni athiyanaayo anaahala okhalana wakhula yookossa.