¹ N'na phin'hantissi non'loko naaArao ni Moises, owakathi Pwiya wuulualyaawe ni Moises omwaako Sinai. ² Matjina aasaana aArao yaari Ndabe, owantjeriya ni Abiu, Eleazar ni Itamar. ³ Ala phamatjina aasaana aArao, yaatthapeliye ni yiirelatjiye wiira yaavarele nteko anamukuttho. ⁴ Massi, Nadabe ni Abiu yaahokhwatja ohoolo wa Pwiya, owakathi ovahatjalyaaya mooro woohitjuwanyaa moothakoni wooSinai. Nadabe ni Abiu khayaarina asaana, phimaana, woohikhala Eleazar ni Itamar yaahovarela nteko toko anamukuttho ni Arao, an'nathumwanaya. ⁵ Apwiya yaahuuluma ni Moises ni yaahomwiirela: ⁶ Owaane nloko na Levi ni munthoonhere Arao, wiira ayenatja ankhaviheratje. ⁷ Ayenatja anaahala ovara tjookhanhenriya mwantjina na Abrao naatthu ooteene, ohoolo woheeme wonthukumano. ⁸ Ayenatja anaahala ovaratja nteko npaani. Ayenatja anaahala okhikitjera tjitthu tjooteene tjoheema tjonthukumano, ni anaahala okhavihatjera maloko owiisrael, n~mitekoni tjionpaani. ⁹ We onaahala waareeriha malevita Arao naassaanaawe. Ayenatja an´hala okhala ookawanyaatja wiira yaakhavihatjere atthu owiisrael. ¹⁰ Onaahala waathanla, Arao naassaanaawe toko anamukuttho, massi wakhula nan´mwa n´hala waattamenla naahala okhwaa. ¹¹ Pwiya aahuuluma ni Moises. Aahomwiirela: ¹² Kihaathanla malevita eriyari waatthu owiisrael. Kihopanka tjon´mo, ohiya waathanla wakhula owantjeriya oyariya nlopwana eriyari yommaisrael. Malevita awaka. ¹³ Owantjera oyariya ooteene awaka. Nihuku niwiivalyaaka owantjera oyariya ooteene elapo yowiigipitu, kihaakawaniha owantjeriya ooteene wiisrael wiira akhale nimi, atthu hata enama. Awaka ooteene. Mi kiPwiya. ¹⁴ Pwiya aahomwiirela Moises moothakoni wooSinai. ¹⁵ Waalikele amutji aLevi wakhula nloko, n´mawan´nhaya atthu okhalayi. Waalikele alopwana ooteene arina mweeri n´motja weeyareelo hata naatthu oolupale. ¹⁶ Moises aahowaalikela, attharenlaka moolumo yaavahiyaawe ni Pwiya, toko yena, Pwiya tjaahimyalyaawe. ¹⁷ Matjina aassaanaawe Levi phaala: Gerson, Coate ni Merari. ¹⁸ Mahimo yaawaale waassaanaawe Gerson, yaari Libni ni Simei. ¹⁹ Mahimo yaawaale waassaanaawe Coate, yaari Anrao, Isar, Hebrom ni Uziel. ²⁰ Mahimo yaawaale waassaana aMerari yaari Mali ni Musi. Ala yaari mahimo omalevita, yantikhiye nihimo ni nihimo. ²¹ Mahimo omalibna, nikhoto namasimeita, yaakhuma oGerson. Ala mahimo omaGersonita. ²² Alopwana ooteene omweeri n´motja weeyareelo hata atthu oolupale yaahaalikeliya, waatakaniha ekonto saapa niimiya thanu. ²³ Mahimo omaGersonita ahaana akhalaka, nphantte okela ntjuwa wonupa. ²⁴ Elisafe, mwaana Leal naahala ohoolela mahimo aamutji omaGersonita. ²⁵ Amutji aGerson anaahala okhikitjera heema onthukumano, wamotja niinupa. Ayenatja anaahala onkhikitjera heema, wankhora woheema wonthukumano. ²⁶ Ayenatja anaahala okhikitjera tjitthu tjowapuwani, woorureerya mapuro oolonpiya ni waaltaare. Ayenatja anaahala okhikitjera mikhoyi tjaaheema tjonthukumano ni nuulumonaya nooteene. ²⁷ Ala phimahimo awaale wa Coate: Nihimo nAnramita, ihimo nan´naIzarita, nihimo nan´naHebronita, nihimo nan´naUzielita. Yaala mahimwaala phan´naCoanita. ²⁸ Alopwana ekonto naaneniimiya sita yaahaalikeliya omweeri n´motja eeyareelo npaka atthu oolupale, wiira akhalenle tjitthu tjaPwiya. ²⁹ Nloko naamutji aCoate ahaana akhalaka nphantte woohitto wonupa. ³⁰ Elisafa, mwaana Uziel naahala ohoolela mahimo an´naCoatita. ³¹ Ayenatja anaahala okhikitjera nivuku, meetja, essamininnha, altaare, tjitthu tjooreerihiya mooswalini, ni tjitthu tjooteene tjomuntekoni. ³² Eleazar, mwaana aArao, namukuttho, phin´hala waahoolela malevita. Yena naahala on´wehaweha nlopwana oophwanela wonipuro ttakattiifu. ³³ Mahimo meeli yaahowa wa Merari: Nihimo nan´namalita ni nihimo nan´namusita. Yaala malokwaala yaawaale wa Merari. ³⁴ Alopwana ekonto sita niimiya piili yaahaalikeliya omweeri n´motja weeyareelo npaka atthu oolupale. ³⁵ Zuriel, mwaana Abiail, naahaala ohoolela mahimo aMerari. Ayenatja ahaana akhalaka nphantte wootjulu wonupa. ³⁶ Nikhoto na Merari ninaahala okhikitjera wamotja naatthu onupa yamuluku, womapuro oohiviriya, ni tjitthu tjooteene. ³⁷ Mapotto ooteene ari woorureerya enupa yamuluku, niiphatta nimikhoyi. ³⁸ Moises, Arao naassaanaawe ahaana akhalaka nphantte wonkurukuru onkhuma ntjuwa wonupa yamuluku, ohoolo woheema wonthukumano onkhuma ntjuwa. Ayenatja phin´hala okhalenla mapuro ttakattiifu, waatthu owiisrael. Khula nan´mwa n´hala waattamenla nipuro ttakattiifu naahala okhwaa. ³⁹ Moises ni Arao yaahowaalikela atthu ooteene wonihimo na Levi yaari omweeri n´motja weeyareelo hata atthu oolupale, toko Pwiya tjaahimeeryatjalyaawe. Ayenatja yaahowaalikelatja alopwana ekonto siriini napiili. ⁴⁰ Pwiya aahomwiirela Moises: Owaalikele owantjera oyariya ooteene owiisrael arina mweeri n´motja weeyareelo hata atthu oolupale. Wantikhatje matjinaaya. ⁴¹ Onaahala okireerihela malevita, waahiya owantjera oyariya ooteene naatthu owiisrael. Mi kipwiya. Ni onaahala oreeriha enama tjomalevita, ohiya enama tjowantjera oyariya wanikhoto nowiisrael. ⁴² Moises howaalikela assaana opatjeriya oteene apoovo ooIsrael, ntoko Pwiya tjahimalyaawe. ⁴³ Yena howaalikela assaana alopwana opatjeriya ni matjina, omweeri m'motja mpaka omuulupale, yahophiya ekonto piili, eminya piili ni miliko saapa na thaaru alopwaneene. ⁴⁴ Apwiya ahuulumatho ni Moises. Yena hiira: ⁴⁵ ''Waakawanihe maleviita, waahiya assaana opatjeriya wariyari wa apoovo oo Israel ni okawanihe enama tjo maleviita, ohiya enama tja poovo. Maleviita aawakaa Mii. Mii kaa Pwiya. ⁴⁶ We onaahala ophuanya esiculo thanu wavaheraka wa kuta mwaana opatjera wa yaale oo minya piili na miliko saapa na thaaru oo Israel, ⁴⁷ esiculo tjo omapuro ettakattiifu ntoko ethu yoolemela. esiculo enaaphiya econtto siriini. ⁴⁸ Onaahala ovaha eperesso enlivenliaa Arao nassaanaa''. ⁴⁹ Vano, Moises hotakaniha oliviya wo woopoliya waapoovo, yaavikana numeru athu owoopoliya ni malevita. ⁵⁰ Moises hotakaniha nsurukhu wa assaana opatjeriya oo Israel. Yena hotakaniha ekonto emotja wo minya thaaru ni miliko sita ni siculu thanu, wonayeeli esiculo oo mapuro eettakattifu. ⁵¹ Moises honvaha Arao naasaanaawe nsurukhu waakhenliye. Moises ahopanka yootene yiireliyaawe wiira apanke, ni nuulumo naa Pwiya, ntoko Yena Tjahimaliaawe.