¹ Pwiya aahomuulumanatho Moises ni Arao, iiraka: ² Atthu ooteene owiisrael ahaana akhalatjaka woorukureerya epanteraaya niithoonhero nonlokonaya. Aheemaaya an'hala okhala woorukureerya heema onthukumano. ³ Yaale ari nloko naJuda ahaana akhalaka woorukureerya epantera yaJuda, moono weelopwana waheema wonthukumano, nphantte obkhuma ntjuwa. Nason, mwaana Aminadabe n'hala okhala n'hooleli aanakhotto ooJuda. ⁴ Anakhotto ooJuda yaahaana alopwana ekonto sapiini natjesse niimiya sita. ⁵ Nloko naIssacar nihaana nikhalaka nphantte waJuda. Ntanel, mwaana Zuar n'hooleli aanakhotto aIssacar. ⁶ Nphwinkwaawe wokhotto waahaana alopwana ekonto hanssiini natjesse niimiya tjesse. ⁷ Nloko na Zebulom nihaana nikhalaka nphantte wa Issacar. Eliabe, mwaana Helom n'hala okhala n'hooleli onphwinko wa Zebulom. ⁸ Nphwinkwaawe waahaana alopwana ekonto hanssiini nasaapa niimiya tjesse. ⁹ Nphwinko woothukumana wamotja naaheema ooJuda, ooteene yaaritji alopwana ekonto emiya emotja wotuswiini nasaapa iimiya tjesse. Ayenatja phan'hala okhala oopatjera ovussa nthukumano. ¹⁰ Nloko na Ruben, nin'hala okhala nphantte wootjulu, woorukureerya epanteraaya. Elizur, mwaana Sedeur n'hala okhala n'hooleli wonphwinko wa Ruben. ¹¹ Nphwinkwaawe waarina alopwana ekonto arupaini wosita niimiya thanu. ¹² Nloko na Simeao nin'hala okhala nphantte wonloko na Ruben. Selumiel, mwaana Zurisadai n'hala okhala n'hooleli wonphwinko wa Simeao. ¹³ Nphwinkwaawe waahaana alopwana ekonto hanssiini nakhentta niimiya tthaaru. ¹⁴ Nloko naGade nin'hala okhala nphanttiru. Eliasafe, mwaana Deuel n'hala okhala n'hooleli wonphwinko wa Gade. ¹⁵ Nphwinkwaawe waahaana alopwana ekonto arupayini nathanu niimiya sita wohanssiini. ¹⁶ Miphwinko tjoothukumana wamotja naaheema aRuben, yaari nphantte waalopwana ekonto emiya emotja wohanssiini namotja niimiya tjesse wohanssiini. Yaayo phan'hala okhala onayeeli waateka aheema. ¹⁷ Woottharenlana, heema onthukumano naahala ovussa enupa wamotja nimalevita, eriyari womithukumano tjooteene. Ayenatja ahaana atekatjaka enupa weenan'a yeeyo enkhalatjaaya. Khula nlopwana haana okhala nipuronawe, wamotja niipanteraawe. ¹⁸ Nloko na Efraim nin.hala okhala nphantte onkela ntjuwa waheema onthukumano. Elisama, mwaana Amiude n'hala okhala n'hooleli onphwinko wa Efraim. ¹⁹ Nphinkwaawe waahaana alopwana ekonto arupayini niimiya thanu. ²⁰ Nloko na Manasses nin'hala okhala nphantte wa Efraim. Gamaliel, mwaana Pedazur naahala okhala n'hooleli wonphwinko wa Manasses. ²¹ Nphwinkwaawe waahaana alopwana ekonto talaathiini neeli niimiya piili. ²² Nloko na Benjamim nin'hala okhala nphanttiru. Abida mwaana Gideoni n'hala okhala n'hooleli wonphwinko wa Benjamim. ²³ Nphwinkwaawe waahaana alopwana ekonto talaathiini nathanu niimiya tjesse. ²⁴ Miphwinko tjoothukumana wamotja naaheema aEfraim ooteene yaari alopwana ekonto emotja nanaane niimiya. Ayenatja an'hala okhalatja oneeraru ooteka enupa. ²⁵ Nloko naDa an'hala okhala nphantte wootjulu waheema, woorukureerya epanteraaya. Aiezer mwaana Amisadai, n'hala okhala n'hooleli wonphwinko wa Da. ²⁶ Nphwinkwaawe waarina alopwana ekonto suthwiini neeli niimiya sita. ²⁷ Nloko na Aser nin'hala okhala nphantte wonloko naDa. Pagiel. mwaana Ocra n'hala okhala n'hooleli wonphwinko wa Aser. ²⁸ Nphwinkwaawe waahaana alopwana ekonto arupayini nan'motja niimiya thanu. ²⁹ Nloko na Naftali nin'hala okhala nphanttiru. Aira, mwaana Ena n'hala okhala n'hooleli wonphwinko wa Naftali. ³⁰ Nphwinkwaawe waahaana alopwana ekonto hanssiini natthaaru niimiya tjesse. ³¹ Miphwinko tjoothukumana wamotja naaheema aDa ooteene yaari alopwana ekonto emiya wohanssiini wosaapa niimiya sita. Ayenatja an'hala okhala oomaliheratja oteka enupaaya niipanteraaya. ³² Alatja phinun'muru nomiphwinko omaisraelita owaalikeliya nimalokwaaya. Miphwinko tjooteene tjowaalikeliya n'mapaaiwaya ooteene yaari alopwana ekonto emiya sita ni tthaaru niimiya thanu wohanssiini. ³³ Massi, malevita khayaalikeliye naatthu owiisrael. Eyo yiiranyaale toko Pwiya tjaamwiirelalwaawe Moises. ³⁴ Atthu owiisrael yaahopanka tjooteene Pwiya tjaamwiirelalyaawe Moises. Ayenatja yaahomakatja tjitjon'mo niipanteratjaya. Ayenatja yaahotekatja enupa wonan'na niittharihelo tjomalokwaaya.